ພິທີເປີດງານບຸນບັ້ງໄຟປະຈໍາປີ 2023 ຂອງເມືອງປາກລາຍ ແຂວງໄຊຍະບູລີ ໄດ້ຈັດຂຶ້ນໃນວັນທີ 5ພຶດສະພາ ນີ້ ທີ່ເດີນທ່າເຮືອຂອງເມືອງ ຊຶ່ງປີນີ້ແມ່ນບ້ານສີສະຫວ່າງເປັນເຈົ້າພາບ ໃຫ້ກຽດເຂົ້າຮ່ວມມີທ່ານ ກອງສີ ວົງສີ ເຈົ້າເມືອງປາກລາຍ, ມີຄະນະນໍາເມືອງ, ອໍານາດການປົກຄອງບ້ານ, ນັກທຸລະກິດ, ຜູ້ປະກອບການ, ຕະຫຼອດຮອດປະຊາຊົນບັນດາເຜົ່າພາຍໃນເມືອງເຂົ້າຮ່ວມ.

ທ່ານ ກອງແກ້ວ ເຂັມດີ ນາຍບ້ານສີສະຫວ່າງ ປະທານຈັດງານບຸນ ກ່າວວ່າ: ການຈັດງານບຸນບັ້ງໄຟປະຈໍາປີ 2023 ເປັນການຈູດບູຊາຕາມຮີດຄອງ ຊຶ່ງບັ້ງໄຟທີ່ນໍາມາຈູດໃນຄັ້ງນີ້ແມ່ນມາຈາກຄະນະນໍາຂອງເມືອງ ຕາງໜ້າສໍານັກງານ, ຫ້ອງການ, ນັກທຸລະກິດ, ຜູ້ປະກອບການ ແລະ ບ້ານເທດສະບານເມືອງພາຍໃນງານໄດ້ຈັດໃຫ້ມີຫຼາຍກິດຈະກໍາເປັນຕົ້ນການວາງສະແດງຂາຍສິນຄ້າອຸປະໂພກ-ບໍລິໂພກ, ງານສະແດງສິລະປະ ແລະ ງານດົນຕີເສບງັນຢ່າງຄຶກຄື້ນ.

ການຈັດງານຄັ້ງນີ້, ເພື່ອເປັນການອະນຸລັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມຂອງຊາດ ກໍຄືຂອງຊາວເມືອງປາກລາຍ ຕາມຄວາມເຊື່ອຂອງຊາວພຸດທະສາສະນິກະຊົນ. ການເຮັດບຸນບັ້ງໄຟເພື່ອເປັນການຈູດບູຊາຂໍຟ້າ ຂໍຝົນເຂົ້າໃນການຜະລິດລະດູນາປີ ທັງເປັນການຮັດແໜ້ນຄວາມສາມັກຄີລະຫວ່າງອົງການປົກຄອງ, ພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າໃຫ້ນັບມື້ນັບເປັນປຶກແຜ່ນແໜ້ນໜາ ເພື່ອດຶງດູດຄວາມສົນໃຈແກ່ແຂກທັງພາຍໃນ ແລະ ຕ່າງປະເທດໃຫ້ຮັບຮູ້ ແລະ ເຂົ້າມາທຽ່ວງານບຸນ ສ້າງເງື່ອນໄຂໃຫ້ແກ່ນັກລົງທຶນມາດໍາເນີນທຸລະກິດການຄ້າ, ການບໍລິການທ່ອງທ່ຽວໃຫ້ນັບມື້ນັບຫຼາຍຂຶ້ນ ແນໃສ່ສ້າງສາພັດທະນາເມືອງປາກລາຍໃຫ້ເປັນເມືອງເຂັ້ມແຂງຮອບດ້ານ.

ຂ່າວ-ພາບ: ກ່າ ຄຸດທະວົງສັກ