ກະຊວງວັດທະນະທໍາ ແລະ ທ່ອງທ່ຽວ ສປ ຈີນ, ສູນວັດທະນະທຳຈີນປະຈຳລາວ ແລະ ພະແນກວັດທະນະທຳວິທະຍຸ-ໂທລະພາບທ່ອງທ່ຽວ ແລະ ກິລາ ນະຄອນເສິນເຈິ້ນ ສປ ຈີນ ຮ່ວມກັບຄະນະອັກສອນສາດ ມະຫາວິທະຍາໄລແຫ່ງຊາດ (ມຊ) ໄດ້ຈັດກິດຈະກຳເສັ້ນທາງສາຍໄໝແຫ່ງວັດທະນະທໍາ “ດົນຕີຈີນຟົດຟື້ນເມືອງລາວ” ງານດົນຕີພື້ນເມືອງ ແລະ ດົນຕີເອເລັກໂຕຣນິກຈີນຈັດຂຶ້ນເປັນຄັ້ງທຳອິດໃນລາວ, ສະແດງໂດຍຄະນະດົນຕີອໍເກັດຕຣາພື້ນເມືອງເສິນເຈິ້ນໂຊ້ເຝິ່ງ ຈັດຂຶ້ນໃນວັນທີ 8 ພຶດສະພານີ້ ທີ່ ມຊ. ໂດຍມີທ່ານນາງ ຫຼີຢີ່ຜິງ ຫົວໜ້າສູນວັດທະນະທໍາຈີນປະຈໍາລາວ, ມີທ່ານ ທອງສຸກ ແກ້ວມະນີ ຄະນະບໍດີ ຄະນະອັກສອນສາດ ມ.ຊ, ມີແຂກຖືກເຊີນ, ຄູ-ອາຈານ, ນັກສຶກສາເຂົ້າຮ່ວມ.

ກິດຈະກໍາໃນຄັ້ງນີ້ຖືເປັນກິດຈະກໍາທໍາອິດໃນຮອບ 3 ປີທີ່ຄະນະສິລະປະຂອງຈີນໄດ້ມາສະແດງສົດທີ່ປະເທດລາວ, ເຮັດໃຫ້ຜູ້ຊົມສອງຊາດລາວ-ຈີນໄດ້ຮັບຊົມຄວາມງົດງາມຂອງດົນຕີພື້ນເມືອງ ແລະ ດົນຕີເອເລັກໂຕຣນິກຈີນຢ່າງໃກ້ຊິດ, ເພື່ອຊຸກຍູ້ສາຍພົວພັນມິດຕະພາບອັນເປັນມູນເຊື້ອ ແລະ ຄວາມເຂົ້າໃຈຊຶ່ງກັນລະຫວ່າງປະຊາຊົນສອງຊາດລາວ-ຈີນ, ສືບຕໍ່ຮັດແໜ້ນຮາກຖານຄວາມຄິດຄວາມເຂົ້າໃຈກັນດ້ານສັງຄົມຂອງສອງປະເທດຢ່າງບໍ່ຢຸດຢັ້ງ, ຍິ່ງໄປກວ່ານັ້ນກິດຈະກໍານີ້ຍັງມີຄວາມໝາຍແຫ່ງການລິເລິ່ມການແລກປ່ຽນວັດທະນະທຳ ແລະ ທ່ອງທ່ຽວທີ່ຍິ່ງໃຫຍ່ໃນປີ 2023 ຂອງສອງປະເທດລາວ-ຈີນ. ລາຍການທີ່ນໍາມາສະແດງໃນຄັ້ງນີ້ມີທັງໝົດ 10 ກວ່າລາຍການ ທີ່ໄດ້ຮັບການຍອມຮັບຈາກຜູ້ຊົມວ່າເປັນໜຶ່ງໃນຄະນະດົນຕີ ອໍເກັດຕຣາລະດັບສູງ ຊຶ່ງຄະນະດົນຕີໄດ້ນໍາເອົາຄວາມທັນສະໄໝມາປະສົມປະສານເຂົ້າໃນດົນຕີພື້ນເມືອງ, ນໍາໃຊ້ເຕັກນິກການບັນເລງ ແລະ ການແຕ່ງເພງທີ່ຢູ່ໃນລະດັບສູງ, ມາປະສົມປະສານສຽງດົນຕີເອເລັກໂຕຣນິກ ແລະ ເຄື່ອງດົນຕີພື້ນເມືອງໃຫ້ເຂົ້າກັນຢ່າງລົງຕົວ, ທຸກໆໂນດເພງທີ່ເຄື່ອງດົນຕີບັນເລງອອກມາເຮັດໃຫ້ຜູ້ຊົມປະທັບໃຈ ພ້ອມທັງໄດ້ນໍາເອົາບົດເພງ “ຈຳປາເມືອງລາວ” ທີ່ເປັນບົດເພງພື້ນເມືອງຂອງລາວມາດັດແກ້ ແລະ ບັນເລງດ້ວຍເຄື່ອງດົນຕີຈີນ ຊຶ່ງໄດ້ຮັບສຽງຕອບຮັບເປັນຢ່າງດີຈາກຜູ້ຊົມຊາວລາວ. ກິດຈະກໍາດົນຕີ ໄດ້ສະແດງໃຫ້ເຫັນຄວາມສາມາດຂອງນັກດົນຕີ, ສະແດງໃຫ້ເຫັນຄວາມງົດງາມຂອງດົນຕີພື້ນເມືອງ ຊຶ່ງໄດ້ຮັບສຽງຕົບມືຢ່າງຟົດຟື້ນຈາກຜູ້ຊົມເປັນຢ່າງດີ.

ໃນວັນທີ 7 ພຶດສະພາຜ່ານມາ ງານດົນຕີດັ່ງກ່າວໄດ້ຈັດການສະແດງຂຶ້ນເປັນຄັ້ງທໍາອິດທີ່ຫ້ອງອາເນກປະສົງຂອງສູນວັດທະນະທໍາຈີນ ປະຈໍາລາວ, ໂດຍໃຫ້ກຽດເຂົ້າຮ່ວມມີທ່ານຫົວໜ້າກົມ, ຫົວ ໜ້າພະແນກ ແລະ ສຳນັກງານທີ່ກ່ຽວຂ້ອງຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວລາວ, ລວມທັງວິສາຫະກິດຂອງຈີນ, ຕາງໜ້າຊາວຈີນຕ່າງດ້າວ, ສື່ມວນຊົນລາວ-ຈີນ ແລະ ປະຊາ ຊົນລາວຫຼາຍກວ່າ 100 ຄົນເຂົ້າຮ່ວມ.

ຂ່າວ-ພາບ: ພູວັນ