ທ່ານ ດາລາພອນ ພົນສະຫວັດດີ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງບໍລິຄຳໄຊ ໄດ້ລາຍງານໃຫ້ຮູ້ໃນວັນທີ 8 ພຶດສະພານີ້, ມາຮອດປັດຈຸບັນຊາວກະສິກອນທົ່ວແຂວງບໍລິຄໍາໄຊເກັບກ່ຽວເຂົ້ານາ ແຊງສໍາເລັດແລ້ວ 72% ໃນເນື້ອທີ່ແຜນການ 1.891 ເຮັກຕາ, ສະມັດຖະພາບ 4 ໂຕ່ນຕໍ່ເຮັກຕາ ຜົນຜະລິດ 9 ພັນກວ່າໂຕນ ປະຕິບັດໄດ້ 1.624 ເຮັກຕາເທົ່າກັບ 86,30% ຂອງແຜນການ, ໃນນີ້ເນື້ອທີ່ເສຍຫາຍ 8 ເຮັກຕາຍັງເຫຼືອຕົວຈິງ 1.624 ເຮັກຕາເກັບກຽ່ວໄດ້ແລ້ວ 1.171 ເຮັກຕາເທົ່າກັບ 72% ຄາດວ່າຈະໃຫ້ສໍາເລັດໃນທ້າຍເດືອນພຶດສະພານີ້. ໄປຄຽງຄູ່ກັບການຜະລິດເຂົ້ານາແຊງ ຍັງໄດ້ຜະລິດພືດລະດູແລ້ງຕາມແຜນການ 11 ພັນກວ່າເຮັກຕາ ສະມັດຕະພາບ 7 ໂຕ່ນເຄິ່ງຕໍ່ເຮັກຕາຜົນຜະລິດ 91 ພັນກວ່າໂຕນ ປະຕິບັດໄດ້ 8 ພັນກວ່າເຮັກຕາເທົ່າກັບ 69,91% ຂອງແຜນການ ພ້ອມນີ້ຍັງໄດ້ກະກຽມເນື້ອທີ່ປູກພືດລະດູຝົນ 17 ພັນກວ່າເຮັກຕາ ຍັງໄດ້ສຸມໃສ່ການປູກພືດເພື່ອສະໜອງໃຫ້ໂຮງງານພາຍໃນແຂວງປູກໄມ້ໃຫ້ ໝາກເພື່ອບໍລິໂພກທົດແທນການນໍາເຂົ້າ ແລະ ສົ່ງອອກເພື່ອສຸມໃສ່ພືດທີ່ມີທ່າແຮງຂອງແຂວງ ຕິດພັນກັບຕະຫຼາດສົ່ງອອກທີ່ລັດຖະບານໄດ້ເປີດຕະຫຼາດກັບບັນດາປະເທດອ້ອມຂ້າງ.

ທ່ານ ດາລາພອນ ພົນສະຫວັດດີ ຍັງໄດ້ລາຍງານໃຫ້ຮູ້ອີກວ່າ: ແຜນການປູກເຂົ້ານາປີນີ້ມີເນື້ອທີ່ທັງໜົດ 37.239 ເຮັກຕາ. ມາຮອດປັດຈຸບັນນີ້ຊາວກະສິກອນໄດ້ລົງມືກຽມດິນ 80%, ຕົກກ້າໄດ້ແລ້ວ 60% ປະຕິບັດໄດ້ແລ້ວ 1.350 ເຮັກຕາ.

ຂ່າວ: ບໍລິຄຳໄຊ