ທ່ານ ຈັນທະບູນ ສອນທະວີ ຮອງຫົວໜ້າກົມກວດກາ ກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ຕິດຕາມ ແລະ ກວດກາ ການຈັດຕັ້ງປະຕິບັດ ໂຄງການຊົນລະກະເສດ ແລະ ການຜະລິດເປັນສິນຄ້າຂະໜາດນ້ອຍ (ຊກຂ) ຫຼື (IFAD) ເມື່ອ​ບໍ່​ດົນ​ມາ​ນີ້ ທີ່ນະຄອນ-ຫວງພະບາງ. ການເຄື່ອນໄຫວຄັ້ງນີ້ ໂດຍໄດ້ສົມທົບກັບທີມງານປະສານງານໂຄງການພັດທະນາພື້ນຖານໂຄງລ່າງຊົນນະບົດ ແລະ ຄຸ້ມຄອງອ່າງໂຕ່ງແບບຍືນຍົງ (ພຊຄ) ຫຼື (ADB) ແລະ ໂຄງການຊົນລະກະເສດ ແລະ ການຜະລິດເປັນສິນຄ້າຂະໜາດນ້ອຍ (ຊກຂ) ຫຼື (IFAD) ຂັ້ນສູນກາງ, ແຂວງ ແລະ ນະຄອນ- ຫຼວງພະບາງ ເປັນຕົ້ນແມ່ນການຊຸກຍູ້ ຕິດຕາມ ກວດກາ ການຈັດຕັ້ງປະຕິບັດງົບປະມານຂອງປີ 2022 ແລະ ແຜນການເຄື່ອນໄຫວປີ 2023 ຂອງໂຄງການດັ່ງກ່າວ ພາຍໃຕ້ການຈັດຕັ້ງປະຕິບັດຂອງຫ້ອງການປະສານງານໂຄງການຊົນລະກະເສດ ແລະ ການຜະລິດເປັນສິນຄ້າຂະໜາດນ້ອຍ ປະຈໍາ ນະຄອນ-ຫຼວງພະບາງ ທີ່ນໍາໄປຈັດຕັ້ງປະຕິບັດຕົວຈິງຢູ່ບັນດາບ້ານເປົ້າໝາຍ, ໃນນີ້ ໄດ້ລົງຢ້ຽມຢາມກິດຈະກໍາພາກສະໜາມຕົວຈິງ ຂອງໂຄງການ ເຊັ່ນ: ກຸ່ມຜະລິດສິນຄ້າ ບ້ານຜາວຽງ ຂອງກຸ່ມກອກຫວານ.

ທ່ານ ຈັນທະບູນ ສອນທະວີ ໄດ້ກ່າວວ່າ: ການເຄື່ອນໄຫວຄັ້ງນີ້ ເປັນການລົງຊຸກຍູ້ຕິດຕາມ ກວດກາ ແຜນການຈັດຕັ້ງປະຕິບັດໂຄງການພັດທະນາພື້ນຖານໂຄງລ່າງຊົນນະບົດ ແລະ ຄຸ້ມຄອງອ່າງໂຕ່ງແບບຍືນຍົງ ແລະ ໂຄງການຊົນລະກະເສດ ແລະ ການະລິດເປັນສິນຄ້າຂະໜາດນ້ອຍ ປະຈໍາປີ 2022 ແລະ ແຜນການ ປີ 2023 ຢູ່ນະຄອນ-ຫຼວງພະບາງ, ເພື່ອກວດກາເອກະສານຕ່າງໆ ແລະ ລົງເບິ່ງກິດຈະກໍາພາກສະໜາມຕົວຈິງ ຂອງຊາວກະສິກອນຂອງໃນໂຄງການ, ກວດກາພາຫະນະ ແລະ ອຸປະກອນຮັບໃຊ້ ເພື່ອແກ້ໄຂຂໍ້ຄົງຄ້າງ ແລະ ສືບຕໍ່ພັດທະນາບັນດາວຽກງານທີ່ກ່ຽວຂ້ອງ, ເປັນການອໍານວຍຄວາມສະດວກໃຫ້ແກ່ຊາວກະສິກອນຜູ້ຜະລິດ, ລວມທັງບັນດາຫົວໜ່ວຍທຸລະກິດ ໃນການເກັບຊື້ຜົນຜະລິດຕ່າງໆ ແລະ ການສະໜອງນໍ້າຊົນລະປະທານ ສູ່ການຜະລິດກະສິກໍາຂອງຊາວກະສິກອນ ຢ່າງພຽງພໍ ໃນເຂດເປົ້າໝາຍ ແລະ ໃຫ້ຄອບຄົວເປົ້າໝາຍ ໄດ້ເຂົ້າເຖິງການຊົມໃຊ້ ມີຜົນປະໂຫຍດສູງສຸດ ແກ້ໄຂຊີວິດການເປັນຢູ່ຂອງປະຊາຊົນໃຫ້ຂຶ້ນດີກວ່າເກົ່າ.

ຂ່າວ-ພາບ: ສົມແກ້ວຈົ່ວຈູ່ລີ (ຖວທ ນະຄອນຫຼວງພະບາງ )