ບ້ານຜາວຽງ ຕັ້ງຢູ່ເຂດນອກເທດສະບານນະຄອນ-ຫຼວງພະບາງ ແຂວງຫຼວງພະບາງ ຫ່າງຈາກຕົວນະຄອນໄປທາງທິດເໜືອ 42 ກິໂລແມັດ ມີເນື້ອທີ່ 343 ເຮັກຕາ, ມີ 106 ຄອບຄົວ ພົນລະເມືອງ 569 ຄົນ ຍິງ 269 ຄົນ ມີຊາຍແດນຕິດຈອດກັບ 4 ບ້ານ ຄື: ທິດເໜືອຕິດກັບບ້ານລ້ອງຍົມເກົ່າ, ທິດໃຕ້ຕິດກັບ ບ້ານລ້ອງລັນ, ທິດຕາເວັນອອກຕິດກັບ ບ້ານຫ້ວຍມັນ ເມືອງໂພນໄຊ ແລະ ທິດຕາເວັນຕົກຕິດກັບ ບ້ານຜາແດງ, ການດຳລົງຊີວິດຂອງປະຊາຊົນສ່ວນໃຫຍ່ແມ່ນຢຶດຖືເອົາການຜະລິດກະສິກຳປູກຝັງ ແລະ ລ້ຽງສັດ ຕິດພັນກັບການຄ້າຂາຍເປັນອາຊີບຕົ້ນຕໍ, ບ້ານຜາວຽງແມ່ນໄດ້ຮັບການຢັ້ງຢືນເປັນບ້ານແບບຢ່າງໃນການປູກພືກຜັກ, ໃນປີ 2022 ບ້ານແມ່ນໄດ້ຮັບທຶນຊ່ວຍເຫຼືອຈາກໂຄງການ ຊົນລະກະເສດ ແລະ ຂະໜາດນ້ອຍ ທີ່ໄດ້ມາຊ່ວຍເຫຼືອເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການເປັນຢູ່ທີ່ດີ. ຈົນເຮັດໃຫ້ມີຄອບຄົວຕົວແບບໃນການປູກຝັງຄື: ຄອບຄົວຂອງ ທ່ານ ນາງ ມອນ ໄດ້ກາຍເປັນຕົວແບບດ້ານການປູກພືດ ແລະ ການບໍລິການຄ້າຂາຍ ສາມາດສ້າງລາຍຮັບເຂົ້າໃນຄອບຄົວໄດ້ 720 ລ້ານກີບຕໍ່ປີ ແລະ ຄອບຄົວຂອງ ທ່ານ ສີສະຫວາດ ໄຊຍະສິດ ຕົວແບບໃນການປູກໝາກເລັ່ນ ສາມາດສ້າງລາຍຮັບເຂົ້າໃນຄອບຄົວໄດ້ 25 ຫາ 50 ລ້ານກີບຕໍ່ປີ.

ຍ້ອນຄວາມດຸໝັ່ນ ປະຕິບັດຕາມແນວທາງນະໂຍບາຍຂອງພັກ-ລັດ ຈຶ່ງເຮັດໃຫ້ປະຊາຊົນບ້ານຜາວຽງ ກາຍເປັນຄອບຄົວຕົວແບບ ແລະ ເປັນບ້ານພັດທະນາ, ທ່ານນາຍບ້ານຍັງເວົ້າຕື່ມວ່າ: ຈະສືບຕໍ່ປຸກລະດົມໃຫ້ປະຊາຊົນພາຍໃນບ້ານສ້າງເສດຖະກິດສົ່ງເສີມການປູກ-ການລ້ຽງໃຫ້ຫຼາຍຂຶ້ນ ໃຫ້ກາຍເປັນທ່າແຮງໃນການສົ່ງພືດຜັກອອກຂອງແຂວງຫຼວງພະບາງ.

ທັງໝົດນີ້ແມ່ນການໃຫ້ສຳພາດຂອງ ທ່ານ ສີສະຫວາດ ໄຊຍະສິດ ນາຍບ້ານໆຜາວຽງ ນະຄອນ-ຫຼວງພະບາງ, ຕໍ່ສື່ມວນຊົນແຂວງຫຼວງພະບາງທີ່ໄດ້ລົງເຄື່ອນໄຫວເກັບກຳຂ່າວ ຫວ່າງບໍ່ດົນມານີ້.

(ຂ່າວ-ພາບ: ທະນູສິນ)