ຕາມການລາຍງານຂອງ ສະຫາຍ ກອງດາວວັນ ວົງສາ ຄະນະພັກຮາກຖານ ຫົວໜ້າຂະແໜງແຜນການ ພະແນກແຜນການ ແລະ ການລົງທຶນແຂວງ ໃນກອງປະຊຸມກາງສະໄໝ ຄັ້ງທີ I ຄະນະພັກຮາກຖານ ພະແນກແຜນການ ແລະ ການລົງທຶນແຂວງ ໃຫ້ຮູ້ວ່າ: ອີງຕາມຜົນສຳເລັດການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ຂອງແຂວງ ຕະຫຼອດໄລຍະ 2 ປີເຄິ່ງຜ່ານມາ ເຫັນວ່າອັດຕາການຂະຫຍາຍຕົວຂອງເສດຖະກິດນັບມື້ດີຂຶ້ນເປັນກ້າວໆມາ ແລະ ຄາດຄະເນໝົດປີ 2023 ເສດຖະກິດຂອງແຂວງຈະຂະຫຍາຍຕົວໃນລະດັບ 5%.

ໃນໄລຍະ 2 ປີເຄິ່ງຜ່ານມາ ພະແນກແຜນການ ແລະ ການລົງທຶນແຂວງ ໄດ້ເຮັດໜ້າທີ່ຊຸກຍູ້, ຕິດຕາມ ແລະ ຄຸ້ມຄອງການຈັດຕັ້ງປະຕິບັດຄາດໝາຍດ້ານເສດຖະກິດ ແລະ GDP ເຫັນວ່າການຂະຫຍາຍຕົວຂອງເສດຖະກິດພາຍໃນແຂວງມີທ່າອ່ຽງເພີ່ມຂຶ້ນ. ໃນນີ້, ປີ 2021 ຂະຫຍາຍຕົວ 3,3% ລວມຍອດຜະລິດຕະພັນພາຍໃນ (GDP) ບັນລຸ 2.210 ຕື້ກີບ, ສະເລ່ຍໃສ່ພົນລະເມືອງເທົ່າກັບ 16,9 ລ້ານກີບ ຫຼື ປະມານ 1.735 ໂດລາຕໍ່ຄົນຕໍ່ປີ (ອັດຕາແລກປ່ຽນ 9.745 ກີບຕໍ່ 1 ໂດລາ); ປີ 2022 ຂະຫຍາຍຕົວ 4% ລວມຍອດຜະລິດຕະພັນພາຍໃນ (GDP) ບັນລຸ 2.531 ຕື້ກີບ, ສະເລ່ຍໃສ່ພົນລະເມືອງເທົ່າກັບ 18,75 ລ້ານກີບ ຫຼື ປະມານ 1.103 ໂດລາຕໍ່ຄົນຕໍ່ປີ (ອັດຕາແລກປ່ຽນ 17.000 ກີບຕໍ່ 1 ໂດລາ) ແລະ ຄາດຄະເນໝົດປີ 2023 ຈະຂະຫຍາຍຕົວໃນລະດັບ 5% ສູ້ຊົນເຮັດໃຫ້ລ GDP ບັນລຸ 2.657,4 ຕື້ກີບ, ສະເລ່ຍໃສ່ພົນລະເມືອງເທົ່າກັບ 19,43 ລ້ານກີບ ຫຼື ປະມານ 1.143 ໂດລາ ຕໍ່ຄົນຕໍ່ປີ (ອັດຕາແລກປ່ຽນ 17.000 ກີບຕໍ່ 1 ໂດລາ).

ສະຫາຍ ກອງດາວັນ ວົງສາ ໃຫ້ຮູ້ຕື່ມວ່າ: ໂດຍລວມແລ້ວ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ຂອງແຂວງ ຕະຫຼອດໄລຍະ 2 ປີເຄິ່ງຜ່ານມາ ອັດຕາການຂະຫຍາຍຕົວລວມຂອງເສດຖະກິດບັນລຸໄດ້ 4,1% ທຽບໃສ່ແຜນການເທົ່າກັບ 58,57% ເຊື່ອແນ່ວ່າຮອດປີ 2025 ອັດຕາການຂະຫຍາຍຕົວຂອງເສດຖະກິດຈະບັນລຸໄດ້ຕາມແຜນການທີ່ວາງໄວ້.

(ຂ່າວ: ພຸດທະສອນ)