ໃນວັນທີ 24 ພຶດສະພາ ນີ້, ໜ່ວຍພັກສາງອຸປະໂພກ-ບໍລິໂພກ, ໄດ້ຈັດຕັ້ງກອງປະຊຸມບັ້ນດໍາເນີນຊີວິການເມືອງຂອງໜ່ວຍພັກຂຶ້ນ ເພື່ອສໍາຫຼວດກວດກາຕີລາຄາການຄັດເລືອກຈັດແບ່ງປະເພດຄຸນນະພາບຂອງສະມາຊິກພັກ, ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາສົກປີ 2022-2023 ແລະ ທິດທາງແຜນການ ປະຈໍາສົກປີ 2023-2024, ໂດຍການເປັນປະທານຂອງ ສະຫາຍ ພົນຈັດຕະວາ ວົງສັກ ສີພັນດອນ ກໍາມະການຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ພະລາທິການ ຫົວໜ້າຄະນະກວດກາ ແລະ ຊຸກຍູ້ຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງກົມໃຫຍ່ພະລາທິການກອງທັບ, ມີຄະນະກວດກາ, ຄະນະພັກ-ຄະນະບັນຊາ ພ້ອມດ້ວຍສະມາຊິກພັກພາຍໃນໜ່ວຍເຂົ້າຮ່ວມ.

ສະຫາຍ ພັນໂທ ແສງອາລຸນ ແກ້ວອູທອງ ເລຂາໜ່ວຍພັກ ຫົວໜ້າການເມືອງສາງອຸປະໂພກ-ບໍລິໂພກກອງທັບ ໄດ້ຂຶ້ນຜ່ານບົດສະຫຼຸບຕີລາຄາການຄັດເລືອກຈັດແບ່ງປະເພດຄຸນນະພາບຂອງສະມາຊິກພັກ, ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາສົກປີ 2022-2023 ແລະ ທິດທາງແຜນການ ປະຈໍາສົກປີ 2023-2024 ຊຶ່ງໄດ້ຕີລາຄາການປັບປຸງກໍ່ສ້າງພັກຕາມ 5 ຫຼັກການ 3 ທິດນໍາຂອງພັກວາງອອກ, ເອົາໃຈໃສ່, ສຸມໃສ່ໃນການປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ທັງ 4, ດ້ານການເມືອງ, ດ້ານແນວຄິດ, ການຈັດຕັ້ງ ແລະ ແບບແຜນວິທີນໍາພາ, ການນໍາພາປະຕິບັດໜ້າທີ່ການເມືອງ ໂດຍຕິດພັນກັບ 4 ໜ້າທີ່ໃຫຍ່ 26 ແຜນງານຂອງອົງຄະນະພັກກະຊວງປ້ອງກັນປະເທດວາງອອກ, ສຶກສາອົບຮົມພະນັກງານ, ສະມາຊິກພັກ ດ້ວຍຮູບການຄົ້ນຄວ້າ, ເຊື່ອມຊຶມ, ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດ, ມະຕິກອງປະຊຸມໃຫຍ່ຄັ້ງທີ VI ຂອງຄະນະພັກອົງການກົມໃຫຍ່ພະລາທິການ, ເວົ້າລວມ ເວົ້າສະເພາະແມ່ນໜ້າທີ່ໃຫຍ່ທີ 3 ຮັບປະກັນພະລາທິການແກ້ໄຂຊີວິດການເປັນຢູ່ຂອງພະນັກງານ-ສະມາຊິກພັກ, ນັກຮົບ, ກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກໍານົດ, ກົດລະບຽບຂອງກອງທັບ, ຂອງກອງທັບ, ເຮັດໃຫ້ຖັນແຖວສະມາຊິກພັກມີຄວາມເຂົ້າໃຈຕໍ່ອຸດົມການຂອງພັກ, ພາຍໃນພັກມີຄວາມສະຫງົບ, ຮັກສາໄດ້ຄວາມໜັກແໜ້ນທາງດ້ານຄຸນທາດການເມືອງ, ຄວາມຈົງຮັກພັກດີຕໍ່ພັກ, ຕໍ່ປະເທດຊາດ ຕໍ່ປະຊາຊົນບັນດາເຜົ່າ, ປັດຈຸບັນພາຍໃນໜ່ວຍພັກ ມີ ຈໍານວນສະມາຊິກພັກທັງໝົດ 48 ສະຫາຍ ຍິງ 12 ສະຫາຍ, ຜ່ານການຈັດຕັ້ງກອງປະຊຸມສະຫຼຸບກວດກາຕີລາຄາຄັດເລືອກການຈັດແບ່ງປະເພດຄຸນນະພາບຂອງສະມາຊິກພັກ ແລະ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາສົກປີ 2022-2023 ເຫັນວ່າ, ຄະນະໜ່ວຍພັກ ແລະ ສະມາຊິກພັກແຕ່ລະສະຫາຍ, ກໍໄດ້ເອົາໃຈໃສ່ຕັ້ງໜ້າສຶກຄົ້ນຄວ້າ, ຂຽນບົດສໍາຫຼວດຂອງຕົນເອງ ເພື່ອອ່ານຜ່ານໃນໝູ່ຄະນະໜ່ວຍພັກ, ໂດຍສະເພາະຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີປັບປຸງແກ້ໄຂຕົນເອງໃນຕໍ່ໜ້າຂອງສະມາຊິກພັກ, ພ້ອມທັງຮັບເອົາການຕໍານິຕິຊົມ, ກໍ່ສ້າງຊ່ວຍເຫຼືອຊຶ່ງກັນ ແລະ ກັນ ເພື່ອພ້ອມກັນກ້າວໜ້າ ແລະ ເຮັດສໍາເລັດໜ້າທີ່ວຽກງານການເມືອງທີ່ການຈັດຕັ້ງມອບໝາຍໃຫ້,ສະຫຼຸບຜົນໄດ້ຮັບການກວດກາ, ຕີລາຄາຄັດເລືອກຈັດແບ່ງປະເພດຄຸນນະພາບຂອງສະມາຊິກພັກ, ຄັດເລືອກໄດ້ສະມາຊິກພັກແຂງທັງໝົດ 48 ສະຫາຍ, ສະເລ່ຍເທົ່າກັບ 100%, ຄະແນນລວມສະເລ່ຍຂອງສະມາຊິກພັກແຕ່ລະສາຍແມ່ນໄດ້ 9 ຂຶ້ນໄປ, ໜ່ວຍພັກບັນລຸໄດ້ຄະແນນລວມ 9,5%, ນໍາສະເໜີຄະນະພັກຂັ້ນເທິງຄົ້ນຄວ້າຮັບຮອງ ແລະ ຢັ້ງຢືນເອົາໜ່ວຍພັກສາງອຸປະໂພກ-ບໍລິໂພກ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາສົກປີ 2023-2024 ເປັນສະໄໝທີ 5 ຕິດຕໍ່ກັນ.

ໂອກາດນີ້, ສະຫາຍ ພົນຈັດຕະວາ ວົງສັກ ສີພັນດອນ ປະທານກອງປະຊຸມ ກໍໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ຮຽກຮ້ອງໃຫ້ຄະນະພັກ-ຄະນະບັນຊາທຸກຂັ້ນ, ພ້ອມດ້ວຍພະນັກງານສະມາຊິກພັກທຸກສະຫາຍຢູ່ພາຍໃນໜ່ວຍພັກ, ຈົ່ງພ້ອມກັນສືບຕໍ່ເອົາໃຈໃສ່ຕໍ່ກັບວຽກງານສຶກສາອົບຮົມການເມືອງນໍາພາ - ແນວຄິດເປັນກົກ, ເຊື່ອມຊຶມກໍາແໜ້ນແນວທາງ, ແຜນນະໂຍບາຍ ແລະ ບັນດາມະຕິຂອງພັກ ໃຫ້ຖັນແຖວພະນັກງານ - ສະມາຊິກພັກຢ່າງເລິກເຊິ່ງ, ດ້ວຍຫຼາຍຮູບການ, ວິທີການ, ພ້ອມທັງຈັດຕັ້ງດໍາເນີນຊີວິດການເມືອງປົວແປງພາຍໃນພັກໃຫ້ເປັນປົກກະຕິ ແລະ ຕໍ່ເນື່ອງ, ຍົກສູງຄວາມໜັກແໜ້ນທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຈົ່ງຮັກພັກດີຕໍ່ພັກ, ຕໍ່ກອງທັບ ແລະ ປະເທດຊາດ, ຕີຖອຍໄດ້ທັດສະນະ, ທ່າອ່ຽງແນວຄິດຜິດເຂວ, ຫຼາຍພັກ, ຫຼາຍເຄົ້າ, ເຮັດໃຫ້ພາຍໃນພັກມີຄວາມເປັນເອກະພາບ, ຢຶດໝັ້ນ ແລະ ປະຕິບັດຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງວຽກງໃຫ້ບຸກຄົນຮັບຜິດຊອບ, ປຶກສາຫາລືຕົກລົງບັນຫາທີ່ສໍາຄັນເປັນໝູ່ຄະນະ, ມີການຕິດຕາມ, ກວດກາທຸກໆວຽກງານ, ມີການສະຫຼຸບຖອດຖອນບົດຮຽນເປັນແຕ່ລະໄລຍະ, ພ້ອມທັງສ່ອງແສງລາຍງານເພື່ອຂໍທິດຊີ້ນໍາຈາກຄະນະພັກ - ຄະນະບັນຊາຂັ້ນເທິງຢ່າງເປັນປົກກະຕິ.

ຂ່າວ: ກົມໃຫຍ່ພະລາທິການກອງທັບ.