ພິທີປະກາດບ້ານນ້ຳແລ ເມືອງຫ້ວຍຊາຍ ແຂວງບໍ່ແກ້ວ ເປັນບ້ານວັດທະນະທຳໃໝ່ໄດ້ຈັດຂຶ້ນໃນວັນທີ 24 ພຶດສະພາ ນີ້ ທີ່ເດີ່ນໂຮງຮຽນປະຖົມບ້ານນໍ້າແລ ໂດຍການເປັນປະທານຂອງທ່ານ ຫົງແກ້ວ ວິໄນວົງ ເຈົ້າເມືອງຫ້ວຍຊາຍ, ມີທ່ານ ບຸນຄົງ ວົງຄຳຈັນ ປະທານກວດກາພັກ-ລັດເມືອງ, ທ່ານ ສົມສັກ ມະຫາພົນ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ເຢັງ ມົວ ນາຍບ້ານໆນ້ຳແລ ກ່າວວ່າ: ບ້ານນໍ້າແລ ມີພົນລະເມືອງທັງໝົດ 563 ຄົນ ຍິງ 265 ຄົນ, ມີ 82 ຄົວເຮືອນ, ມີຄອບຄົວເຫຼືອກິນ 11 ຄອບຄົວ, ຄອບຄົວກຸ້ມກິນ 64 ຄອບຄົວ, ມີໂຮງສີເຂົ້າ 4 ເຄື່ອງ, ປະຊາຊົນພາຍໃນບ້ານໄດ້ຖືເອົາອາຊີບເຮັດໄຮ່, ເຮັດນາ, ເຮັດສວນເປັນອາຊີບຕົ້ນຕໍ, ປູກຝັງ, ລ້ຽງສັດ, ຄ້າຂາຍເປັນອາຊີບສຳຮອງ, ມີເນື້ອທີ່ທຳການຜະລິດທັງໝົດ 1.800 ເຮັກຕາ, ສະເລ່ຍລາຍຮັບໃສ່ແຮງງານໄດ້ 15.330.000 ກີບຕໍ່ຄົນຕໍ່ປີ, ປະຊາຊົນມີຄວາມເຂັ້ມແຂງທາງດ້ານການເມືອງ-ແນວຄິດ, ມີຄວາມສະຫງົບ, ມີລະບົບໂທລະໂຄ່ງ ເປັນເຈົ້າການປະຕິບັດຫຼັກອະນາໄມ 3 ສະອາດ ແລະ ວຽກງານອື່ນໆ. ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການມອບໃບຢັ້ງຢືນໃຫ້ຄອບຄົວວັດທະນະທຳໃໝ່, ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການມອບໃບຢັ້ງຢືນບ້ານວັດທະນະທຳໃໝ່ ພ້ອມທັງລັ່ນຄ້ອງ 9 ບາດ ແລະ ເປີດປ້າຍບ້ານວັດທະນະທຳໃໝ່ຢ່າງເປັນທາງການ.

ໂອກາດນີ້, ທ່ານ ຫົງແກ້ວ ວິໄນວົງ ກ່າວວ່າ: ການສ້າງຄອບຄົວ ແລະ ບ້ານວັດທະນະທຳແມ່ນໄປຕາມທິດ 3 ສ້າງຄື: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ແນໃສ່ກໍ່ສ້າງຮາກຖານການເມືອງໃຫ້ໜັກແໜ້ນ, ເຂັ້ມແຂງ, ຊຸກຍູ້ການພັດທະນາດ້ານວັດຖຸ ແລະ ຈິດໃຈຂອງຄອບຄົວ ແລະ ບ້ານໃຫ້ດີຂຶ້ນ, ເສີມຂະຫຍາຍສິດເປັນເຈົ້າຂອງປະຊາ ຊົນລາວບັນດາເຜົ່າ, ສ້າງສະຕິໃຫ້ເຄົາລົບ ແລະ ປະຕິບັດກົດໝາຍ, ອະນຸລັກຮັກສາ, ສົ່ງເສີມຄຸນຄ່າມູນເຊື້ອວັດທະນະທຳອັນດີງາມຂອງຊາດ, ຂອງເຜົ່າຢ່າງເລືອກເຟັ້ນ ແລະ ຮັບເອົາສິ່ງຍອດຍິ່ງ ທີ່ສອດຄ່ອງທາງດ້ານວັດທະນະທຳຂອງຍຸກສະໃໝ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.

ຂ່າວ-ພາບ: ສອນໄຊ ບຸບຜາປັນໂຍ