ບ້ານວັງເງິນ ກຸ່ມພູເຫຼັກຈະເລີນ ນະຄອນ-ຫຼວງພະບາງ ແຂວງຫຼວງພະບາງ ເປັນບ້ານສ້າງຕັ້ງຂຶ້ນໃໝ່ ລວມມີ 420 ຄອບຄົວ, ມີພົນລະເມືອງທັງໝົດ 2.151 ຄົນ ຍິງ 1.009 ຄົນ, ມີ 3 ເຜົ່າຢູ່ຮ່ວມກັນຄື: ເຜົ່າລາວ 68 ຄອບຄົວ, ເຜົ່າກຶມມຸ 159 ຄອບຄົວ, ເຜົ່າມົ້ງ 193 ຄອບຄົວ.

ສໍາລັບການສ້າງບ້ານວັງເງິນໃຫ້ກາຍເປັນຄອບຄົວວັດທະນະທຳຕາມ 3 ມາດຖານ ແລະ 23 ຕົວຊີ້ວັດນັ້ນ ແມ່ນໄດ້ແບ່ງເປັນ 2 ໄລຍະຄື: ໄລຍະທີ 1 ເລີ່ມປີ 2020 ສາມາດປະເມີນຜ່ານ ຕາມມາດຖານ ມີ 207 ຄອບ ຄົວ, ໄລຍະທີ 2 ເລີ່ມເດືອນກໍລະກົດ 2021 ປະເມີນໄດ້ 95 ຄອບຄົວ ລວມທັງໝົດໄດ້ 302 ຄອບຄົວ, ກວມເອົາ 71,9%, ຍັງ 118 ຄອບຄົວ, ມາຮອດ ຕົ້ນປີ 2022 ຄະນະຮັບຜິດຊອບໄດ້ຈັດກອງປະຊຸມປະເມີນການສ້າງບ້ານວັດທະນະທຳຕາມ 4 ມາດຖານ ແລະ 26 ຕົວຊີ້ວັດ, ຜ່ານການປະເມີນສາມາດສັງລວມຄະແນນສະເລ່ຍໄດ້ 90% ເມື່ອທຽບກັບມາດຖານການສ້າງບ້ານວັດທະນະທຳທີ່ໄດ້ລະບຸ ຄະນະແນນສະເລ່ຍແມ່ນ 80% ຂຶ້ນໄປ ເຫັນວ່າບ້ານວັງເງິນສາມາດປະເມີນລື່ນຄາດໝາຍ 10%.

ພິທີປະກາດ ແລະ ຮັບຮອງເອົາບ້ານວັງເງິນ ເປັນບ້ານວັດທະນະທຳ ໄດ້ຈັດຂຶ້ນໃນວັນທີ 23 ພຶດສະພາ ຜ່ານມາ, ໂດຍການເຂົ້າຮ່ວມ ແລະ ໃຫ້ກຽດມອບໃບຢັ້ງຢືນຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ມີທ່ານ ວຽງທອງ ຫັດສະຈັນ ເຈົ້ານະຄອນ-ຫຼວງພະບາງ, ມີແຂກຖືກເຊີນ ແລະ ປະຊາຊົນພາຍໃນບ້ານເຂົ້າຮ່ວມ.

ມາຮອດປັດຈຸບັນ ນະຄອນ-ຫຼວງພະບາງ ມີທັງໝົດ 115 ບ້ານ ແລະ ຖືກຮັບຮອງເປັນບ້ານວັດທະນະທຳໄດ້ 100%.

(ຂ່າວ-ພາບ: ແຂວງຫຼວງພະບາງ)