ກອງປະຊຸມສະຫຼຸບຖອດຖອນບົດຮຽນ ຂອງຄະນະສະພາທີ່ປຶກສາໂຮງຮຽນເຕັກນິກ-ວິຊາຊີບບໍລິຄຳໄຊ ໄດ້ຈັດຂຶ້ນໃນວັນທີ 24 ພຶດສະພາ ຜ່ານມາ ຢູ່ຫ້ອງປະຊຸມໂຮງຮຽນແຫ່ງດັ່ງກ່າວ ໂດຍການເປັນປະທານກ່າວເປີດຂອງ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ຜູ້ຊີ້ນຳວຽກງານຂົງເຂດວັດທະນາທຳ-ສັງຄົມ, ມີຄະນະສະພາທີ່ປຶກສາໂຮງຮຽນເຕັກນິກ-ວິຊາຊີບບໍລິຄຳໄຊ ຂັ້ນແຂວງ ແລະ ຄູ-ອາຈານເຂົ້າຮ່ວມ.

ທ່ານ ອາຈານ ສົມຫັວງ ມະນີວັນ ຮອງຜູ້ອຳນວຍການໂຮງຮຽນເຕັກນິກວິຊາຊີບບໍລິຄຳໄຊ ໄດ້ຜ່ານບົດສະຫຼຸບຕີລາຄາຄືນຜົນການຈັດຕັ້ງແຜນພັດທະນາອາຊີວະສຶກສາ ແລະ ຝຶກອົບຮົມວິຊາຊີບ 2016-2020 ຍົກໃຫ້ເຫັນວຽກງານຫຼາຍດ້ານທີ່ພົ້ນເດັ່ນ, ບາງບົດຮຽນທີ່ສາມາດຖອດຖອນໄດ້, ຍຸດທະສາດພັດທະນາອາຊີວະສຶກສາ ແລະ ຝຶກອົບຮົມວິຊາຊີບ ຮອດປີ 2025. ໂຮງຮຽນເຕັກນິກ-ວິຊາຊີບບໍລິຄຳໄຊ ໄດ້ກຳນົດຈຸດປະສົງລວມ ແລະ ຈຸດປະສົງສະເພາະຄື: ຈຸດປະສົງລວມ ຈະພັດທະນາລະບົບອາຊີວະສຶກສາ ເພື່ອສ້າງກຳລັງແຮງງານໃຫ້ມີຄວາມຮູ້ ຄວາມສາມາດ, ມີຄຸນສົມບັດສິນທໍາປະຕິວັດ ແລະ ມີຄ່ານິຍົມທີ່ຖືກຕ້ອງ, ສາມາດຕອບສະໜອງໄດ້ກັບຄວາມຕ້ອງການຂອງຕະຫຼາດແຮງງານ, ມີຄວາມພ້ອມທີ່ຈະຮ່ວມມື ແລະ ແຂ່ງຂັນກັບບັນດາປະເທດໃນພາກພື້ນ. ສໍາລັບຈຸດປະສົງສະເພາະ ຈະສົ່ງເສີມການເຂົ້າຮຽນ ແລະ ຄວາມສະເໝີພາບຍິງ-ຊາຍໃນການເຂົ້າເຖິງອາຊີວະສຶກສາໂດຍເນັ້ນໃສ່ເພດຍິງ ແລະ ຜູ້ທີ່ດ້ອຍໂອກາດ. ປັບປຸງ ແລະ ສ້າງຄວາມເຂັ້ມແຂງໃນທຸກສາຂາວິຊາຂອງການຮຽນ-ການສອນ ເພື່ອຮັບປະກັນທາງດ້ານປະລິມານຂອງຜູ້ຮຽນຈົບສາມາດຕອບສະໜອງໄດ້ຕາມຄວາມຕ້ອງການຂອງຕະຫຼາດແຮງງານ, ຍົກລະດັບຄູສອນ ແລະ ພະນັກງານທາງດ້ານວິຊາການ ແລະ ວິຊາຄູ, ສົ່ງເສີມການສະ ໜອງທຶນການສຶກສາໃຫ້ແກ່ນັກຮຽນຈາກຄອບຄົວທຸກຍາກ ແລະ ຜູ້ທີ່ດ້ອຍໂອກາດ ເພື່ອໃຫ້ເຂົາເຈົ້າໄດ້ມີໂອກາດສືບຕໍ່ນໍາໃຊ້ພອນສະຫວັນ, ຄວາມສາມາດໃນການພັດທະນາຕົນເອງ ແລະ ສັງຄົມ. ຈະສ້າງໂຮງຮຽນເຕັກນິກ-ວິຊາຊີບບໍລິຄຳໄຊໃຫ້ກາຍເປັນວິທະຍາໄລໃນລະຫວ່າງປີ 2021-2025. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ປະກອບຄຳເຫັນ, ປຶກສາຫາລື ແລະ ຖອດຖອນບົດຮຽນຮ່ວມກັນ. ທັ້ງນີ້, ກໍເພື່ອເປັນບ່ອນອີງແຜນຍຸດທະສາດພັດທະນາອາຊີວະສຶກສາ ແລະ ຝຶກອົບຮົມວິຊາຊີບ ຮອດປີ 2025.

ໃນຕອນທ້າຍ ທ່ານຮອງເຈົ້າແຂວງບໍລິຄຳໄຊ ໄດ້ໃຫ້ທິດຊີ້ນຳຫຼາຍດ້ານເປັນຕົ້ນ: ສຶກສາອົບຮົມການເມືອງ-ແນວຄິດໃຫ້ແກ່ພະນັກງານ, ຄູ-ອາຈານ, ນັກຮຽນ-ນັກສຶກສາໃຫ້ອຸ່ນອ່ຽນທຸ່ນທ່ຽງຕໍ່ແນວທາງປ່ຽນແປງໃໝ່ຢ່າງມີຫຼັກການຂອງພັກ-ລັດ ແຕ່ລະໄລຍະ. ນໍາເອົາເນື້ອໃນກອງປະຊຸມຄັ້ງນີ້, ໄປຜັນຂະຫຍາຍຈັດຕັ້ງປະຕິບັດໃຫ້ປະກົດຜົນເປັນຈິງໂດຍຫັນເປັນໂຄງການ, ແຜນການ ແລະ ກິດຈະກຳອັນລະອຽດ, ຍາດາດແຍ່ງການຊ່ວຍເຫຼືອຈາກສັງຄົມ, ບຸກຄົນ, ນິຕິບຸກຄົນ ແລະ ອົງການຈັດຕັ້ງຕ່າງໆ ທັງພາຍໃນ ແລະ ຕ່າງປະເທດ.

(ຂ່າວ-ພາບ: ສາຍສະໝອນ)