ກົມປະເມີນຜົນ ກະຊວງແຜນການ ແລະ ການລົງທຶນ ຮ່ວມກັບ ພະແນກແຜນການ ແລະ ການລົງທຶນແຂວງເຊກອງ ຈັດກອງປະຊຸມທາບທາມຮ່າງຄໍາແນະນໍາກ່ຽວກັບການຈັດຕັ້ງປະຕິບັດວຽກງານການປະເມີນຜົນໂຄງການລົງທຶນຂອງລັດ ໃນວັນທີ 23 ພຶດສະພາ ຜ່ານມາ ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງເຊກອງ, ໂດຍມີທ່ານ ນາງ ອຸດາລອນ ສີໂພວົງ ຮອງຫົວໜ້າກົມປະເມີນຜົນ ກະຊວງແຜນການ ແລະ ການລົງທຶນ, ທ່ານ ບົວຈອນ ແກ້ວປະດັບສີ ຮອງຫົວໜ້າພະແນກແຜນການ ແລະ ການລົງທຶນແຂວງເຊກອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ອຸດາລອນ ສີໂພວົງ ກ່າວວ່າ: ຈຸດປະສົງກອງປະຊຸມຄັ້ງນີ້ ເພື່ອຄົ້ນຄວ້າທາບທາມຮ່າງຄໍາແນະນຳວ່າດ້ວຍການຈັດຕັ້ງ ປະຕິບັດວຽກງານໂຄງການລົງທຶນຂອງລັດ ແລະ ເຜີຍແຜ່ເອກະສານການຄຸ້ມຄອງໂຄງການລົງທຶນຂອງລັດ ໃຫ້ມີຄວາມເຂົ້າໃຈລະອຽດຊັດເຈນ ນຳໄປຈັດຕັ້ງປະຕິບັດໃຫ້ສອດຄ່ອງ ກັບໜ້າທີ່ວຽກງານ ເປັນຕົ້ນແມ່ນ: ການນຳໃຊ້ແບບພິມ (ແບບຟອມ), ປະກອບເອກະສານໂຄງການ, ການກຳນົດເວລາ ແລະ ຂັ້ນຕອນການນຳສົ່ງເອກະສານ ແລະ ຂັ້ນຕອນການປະເມີນໂຄງການລົງທຶນຂອງລັດ, ການປະເມີນຜົນໂຄງການລົງທຶນຂອງລັດໃນແຕ່ລະໄລຍະ ແລະ ວຽກງານອື່ນທີ່ກ່ຽວຂ້ອງ.

ທ່ານ ບົວຈອນ ແກ້ວປະດັບສີ ໄດ້ມີຄໍາເຫັນເນັ້ນໜັກໃຫ້ຜູ້ເຂົ້າຮ່ວມເອົາໃຈໃສ່ໃນການຄົ້ນຄວ້າປະກອບຄໍາຄິດຄໍາເຫັນແລກປ່ຽນບົດຮຽນຊຶ່ງກັນ ແລະ ກັນ ເພື່ອສ້າງຄວາມເຂົ້າໃຈ ແລະ ຄວາມເປັນເອກະພາບ ຕໍ່ວຽກງານປະເມີນຜົນໂຄງການລົງທຶນຂອງລັດ ທັງສາມາດນໍາໄປຈັດຕັ້ງປະຕິບັດ ໃນຂະ ແໜງການຕົນ ໃຫ້ໄດ້ຮັບຜົນດີຂຶ້ນກ່ວາເກົ່າ

ຫຼັງຈາກຜູ້ເຂົ້າຮ່ວມໄດ້ຮັບຟັງການນຳສະເໜີຮ່າງຄຳແນະນຳ ກ່ຽວກັບການຈັດຕັ້ງປະຕິບັດວຽກງານປະເມີນຜົນການລົງທຶນຂອງລັດ, ການປະກອບເອກະສານ ແລະ ການປະເມີນຂອງການລົງທຶນຂອງລັດໃນ 4 ໄລຍະ, ແບບຟອມການລົງທຶນຂອງລັດ, ກົນໄກ ແລະ ການຮັບຮອງຜົນການປະເມີນໂຄງການລົງທຶນລັດ ຢູ່ຂັ້ນກະຊວງ ແລະ ຂັ້ນແຂວງ ແລ້ວ ຜູ້ເຂົ້າຮ່ວມໄດ້ຜັດປ່ຽນກັນແລກປ່ຽນຄໍາຄິດຄໍາເຫັນກ່ຽວກັບການຈັດຕັ້ງປະຕິບັດໃນທ້ອງຖິ່ນຕົນ ມີທັງຂໍ້ສະດວກ ແລະ ຂໍ້ຫຍຸ້ງຍາກ, ທັງນີ້ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານປະເມີນຜົນໃຫ້ສາມາດປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ ແລະ ມີຄວາມເປັນເອກະພາບໃນຂອບເຂດທົ່ວປະເທດ.

ຂ່າວ-ພາບ: ພຸດທະສອນ