ໜັງສືພິມ ປະຊາຊົນ

ທູດປະເທດເພື່ອນມິດ ອວຍພອນຄະນະພົວພັນຕ່າງປະເທດສູນກາງພັກ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 24/03/2020 08:40:07 ຈຳນວນຢ້ຽມຊົມ 2265 ຄັ້ງ

ເນື່ອງໃນໂອກາດສະເຫຼີມ ສະຫຼອງວັນສ້າງຕັ້ງພັກປະຊາ ຊົນ ປະຕິວັດລາວ ຄົບຮອບ 65 ປີ. ທ່ານ ຫວງຽນບາຮຸ່ງ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ທ່ານ ຈຽງຈາຍດົງ ເອກອັກຄະລັດຖະທູດແຫ່ງ ສປ ຈີນ ປະຈໍາ ສປປ ລາວ ແລະ ທ່ານ ເອກອັກຄະລັດຖະທູດ ແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ຜັດປ່ຽນກັນເຂົ້າຢ້ຽມຂໍ່ານັບ ສະຫາຍ ນາງ ສູນທອນ ໄຊຍະຈັກ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ເພື່ອອວຍພອນຄະນະນໍາ ແລະ ພະນັກງານຄະນະພົວພັນຕ່າງປະເທດສູນກາງພັກ.
ໃນໂອກາດນີ້, ບັນດາທູດ ປະເທດອ້າຍນ້ອງໄດ້ຕີລາຄາ ສູງຕໍ່ການຊີ້ນໍາ-ນໍາພາອັນສະ ຫຼາດສ່ອງໃສຂອງພັກປະຊາຊົນ ປະຕິວັດລາວ ຕະຫຼອດໄລຍະ 65 ປີທີ່ຜ່ານມາ, ພິເສດແມ່ນ ພາຍຫຼັງ 35 ປີແຫ່ງການຈັດ ຕັ້ງປະຕິບັດແນວທາງການປ່ຽນ ແປງໃໝ່ຂອງພັກປະຊາຊົນ ປະຕິວັດລາວ ໄດ້ນໍາພາປວງຊົນ ລາວທັງຊາດຜ່ານຜ່າບັນດາຄວາມຫຍຸ້ງຍາກ, ສິ່ງທົດສອບນາໆປະການ ຈຶ່ງສາມາດຍາດໄດ້ບັນດາຜົນສໍາເລັດອັນໃຫຍ່ຫຼວງ, ຮອບດ້ານ ແລະ ມີຄວາມໝາຍປະຫວັດທີ່ສໍາຄັນ ໂດຍສະເພາະແມ່ນວຽກງານການຕ່າງປະເທດກໍໄດ້ຮັບການເປີດກວ້າງ, ເຮັດໃຫ້ບົດບາດ ແລະ ອິດທິພົນຂອງພັກປະຊາຊົນປະ ຕິວັດລາວນັບມື້ຍິ່ງໄດ້ຮັບການ ຍົກສູງຂຶ້ນໃນເວທີພາກພື້ນ ແລະ ສາກົນ.
ສະຫາຍ ນາງ ສູນທອນ ໄຊຍະຈັກ ໄດ້ສະແດງຄວາມຂອບໃຈຢ່າງຈິງໃຈຕໍ່ການຕີລາຄາສູງບັນດາຜົນສໍາເລັດຮອບດ້ານໃນການຊີ້ນໍາ-ນໍາພາຂອງພັກປະຊາຊົນ ປະຕິວັດລາວ ຕະຫຼອດໄລຍະ 65 ປີທີ່ຜ່ານມາ ແລະ ໄດ້ຕີລາຄາສູງການພົວພັນຮ່ວມມື ລະຫວ່າງພັກປະຊາຊົນ ປະຕິວັດລາວ ແລະ ບັນດາພັກອ້າຍນ້ອງ ແລະ ໄດ້ສະ ແດງຄວາມຮູ້ບຸນຄຸນຕໍ່ການສະ ໜັບສະໜູນ ແລະ ຊ່ວຍເຫຼືອຢ່າງລໍ້າຄ່າຂອງບັນດາພັກ, ລັດ ແລະ ປະຊາຊົນປະເທດອ້າຍນ້ອງໃນພາລະກິດຕໍ່ສູ້ປະຕິວັດຕ້ານພວກຮຸກຮານຕ່າງຊາດ.
ພິເສດ, ໃນການເຂົ້າຢ້ຽມຂໍ່ານັບ ສະຫາຍ ນາງ ສູນທອນ ໄຊຍະຈັກ ໃນຄັ້ງນີ້ບັນດາທູດປະເທດອ້າຍນ້ອງຍັງໄດ້ສົ່ງສານອວຍພອນ ແລະ ກະຕ່າດອກໄມ້ອວຍພອນຈາກ ຄະນະບໍລິຫານງານສູນກາງພັກກອມມູນິດຫວຽດນາມ, ຄະນະບໍລິຫານງານສູນກາງພັກກອມມູນິດຈີນ ແລະ ຄະນະບໍລິຫານງານສູນກາງພັກແຮງງານເກົາຫຼີ ສົ່ງເຖິງຄະນະບໍລິຫານງານສູນກາງພັກປະຊາຊົນ ປະຕິວັດ ລາວ. ນອກຈາກນັ້ນ, ຄະນະບໍລິຫານງານສູນກາງພັກປະຊາຊົນ ກໍາປູເຈຍ ກໍໄດ້ສົ່ງສານອວຍ ພອນເຖິງຄະນະບໍລິຫານງານສູນກາງພັກປະຊາຊົນ ປະຕິວັດລາວ ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 65 ປີ ເຊັ່ນກັນ.
(ຂ່າວ: ຄຕພ)