ຫົວ​ຂໍ້ : ລາວຄັນທຣີ ຄລັບ ຈັດແຂ່ງຂັນກັອຟລະດົມທຶນຊ່ວຍເຫຼືອ ໂຮງຮຽນເຂດຫ່າງໄກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 24/03/2020 08:44:24 ຈຳ​ນວນ​ຜູ້​ເຂົ້າ​ຢ້ຽມ​ຊົມ 710 ຄັ້ງ

  ສະ​ໜາມ​ກັອຟ​ລາວ​ຄັນ​ທຣີຄ​ລັບ (ຫຼັກ 14) ນຳ​ເອົາ​ເງິນ 35 ລ້ານ​ກວ່າ​ກີບ ທີ່​ລະດົມ​ໄດ້​ຈາກ​ການ​ແຂ່ງ​ຂັນ​ກັອຟ​ການ​ກຸສົນ ເພື່ອ​ລະດົມ​ທຶນ​ໄປ​ຊ່ວຍ​ສ້າງ​ໂຮງຮຽນຫໍ​ພັກ ແລະ ອື່ນໆ ຢູ່​ເຂດ​ຊົນນະບົດ​ຫ່າງ​ໄກສອກ​ຫຼີກແນໃສ່​ເຮັດ​ໃຫ້​ເຍົາວະ​ຊົນ​ໄດ້​ເຂົ້າ​ເຖິງ​ການ​ສຶກສາ​ຢ່າງ​ເທົ່າ​ທຽມ. ພິທີ​ມອບ​-​ຮັບ​ເງິນ​ຈຳນວນ​ດັ່ງກ່າວ ໄດ້​ມີ​​ໃນຂຶ້ນ​ວັນ​ທີ 13 ມີນາ ຜ່ານ​ມາ ຢູ່​ສູນ​ກາງ​ຊາວ​ໜຸ່ມ​ປະຊາຊົນ ປະຕິວັດ​ລາວ ຊຶ່ງ​ມອບ​ໂດຍ​ທ່ານ ວຽງ​ທອງ ຈັນ​ລີ​ວົງ ຜູ້ອຳນວຍການ​ບໍລິສັດ​ລ້ານ​ຊ້າງ​ມີ​ເດຍ ຕາງໜ້າກຸ່ມ​ບໍລິສັດ​ໂຄ​ລາວ ແລະ ຮັບ​ໂດຍ​ທ່ານ ນວນ​ທອງ ສຸວັນ​ວິ​ໄຊ ຫົວໜ້າ​ຫ້ອງການ​ສູນ​ກາງ​ຊາວ​ໜຸ່ມ ປະຊາຊົນ ​ປະຕິວັດ​ລາວ ມີ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.
  ທ່ານ ນວນ​ທອງ ສຸວັນ​ວິ​ໄຊ ໄດ້​ສະແດງ​ຄວາມ​ຊົມເຊີຍ ແລະ ຂອບໃຈ​ມາ​ຍັງ​ສະ​ໜາມ​ກັອຟ ລາວ​ຄັນ​ທຣີ ຄ​ລັບ ທີ່​ໄດ້​ນຳ​ເອົາ​ເງິນ​ຈາກ​ການ​ລະດົມ​ທຶນ​ມາ​ມອບ​ໃຫ້​ສູນ​ກາງ​ຊາວ​ໜຸ່ມ​ປະຊາຊົນ​ ປະຕິວັດ​ລາວ ເຊິ່ງ​ພວກ​ເຮົາ​ຈະ​ນຳ​ເອົາ​ເງິນ​ຈຳນວນ​ນີ້​ໄປ​ຊ່ວຍ​ສ້າງ​ໂຮງຮຽນ, ຫໍ​ພັກ ແລະ ອື່ນໆ ໃຫ້​ເຂດ​ຫ່າງໄກ​ສອກຫຼີກ ແຕ່​ຈຳນວນ​ເງິນ​ດັ່ງກ່າວ ຍັງ​ບໍ່​ພຽງພໍ​ຕໍ່​ການ​ຕອບ​ສະໜອງ​ຊ່ວຍເຫຼືອ​ພາກສ່ວນ​ທີ່​ຍັງ​ຂາດເຂີນ ຊຶ່ງ​ໃນຕໍ່ໜ້າ​ພວກ​ເຮົາ​ຈະ​ສືບຕໍ່​ຈັດການ​ແຂ່ງ​ຂັນ​ກັອຟ ເພື່ອ​ປຸກລະດົມ​ໃນ​ການ​ບໍລິຈາກ​ຜ່ານ​ການ​ຈັດການ​ແຂ່ງ​ຂັນ​ກັອຟ ພ້ອມ​ທັງ​ເປັນ​ການ​ສ້າງ​ຂະບວນ​ການ​ຕ້ອນຮັບ ແລະ ສະເຫຼີມສະຫຼອງ​ວັນ​ສຳຄັນ​ຕ່າງໆ​ຂອງ​ຊາດ ອີກ​ດ້ວຍ
  ທ່ານ ວຽງ​ທອງ ຈັນ​ລີ​ວົງ ໄດ້​ສະແດງ​ຄວາມ​ຂອບໃຈ​ມາ​ຍັງ​ສູນ​ກາງ​ຊາວ​ໜຸ່ມ​ປະຊາຊົນ ​ປະຕິວັດ​ລາວ ທີ່​ໄດ້​ຮ່ວມ​ກັນ​ຈັດການ​ແຂ່ງ​ຂັນ​ກັອຟ​ລາຍການ​ດີໆ​ແບບ​ນີ້​ຂຶ້ນ ເພື່ອ​ຊ່ວຍເຫຼືອ​ສັງຄົມ​ລາວ ແລະ ຕ້ອນຮັບ​ວັນ​ສຳຄັນ​ຕ່າງໆ​ຂອງ​ຊາດ. ສະໜາມ​ກັອ​ຟ​ລາວ​ຄັນ​ທຣີ ຄ​ລັບ ມີ​ຄວາມ​ຍິນດີ ແລະ ພ້ອມ​ຮັບ​ໃຊ້​ສັງຄົມ​ຕໍ່​ໄປ ແລະ ຈະ​ມີ​ການ​ວາງ​ແຜນການ​ຮອງ​ຮັບ​ໃນ​ການ​ຈັດການ​ແຂ່ງຂັນ​ຄັ້ງ​ຕໍ່​ໄປ​ໃຫ້​ເປັນ​ຂະບວນ​ການ​ຟົດ​ຟື້ນ.ການ​ແຂ່ງຂັນ​ໃນ​ຄັ້ງ​ນີ້​ມີ​ນັກ​ກິລາ​ເຂົ້າ​ຮ່ວມ 200 ກວ່າ​ຄົນ.
(ຂ່າວ: ວົງ​ຈອນ​ກິລາ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110