ໜັງສືພິມ ປະຊາຊົນ

ຫົວຂໍ້ : ສານສະແດງຄວາມຊົມເຊີຍ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 24/09/2020 08:37:16 ຈຳນວນຜູ້ເຂົ້າຢ້ຽມຊົມ 3962 ຄັ້ງ

ວັນທີ 22 ກັນຍາ 2020, ທ່ານ ສະເຫຼີມໄຊ ກົມມະສິດລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄຳຊົມເຊີຍເຖິງ ສົມເດັດ ຟາຍຊໍ ບິນ ຟາຮັນ ອໍ ຊາວ ລັດຖະມົນຕີຕ່າງ ປະເທດ ແຫ່ງ ຣາຊະອານາຈັກ ຊາອຸດິດ ອາຣາບີ ທີ່ຣີຢັດ ຊຶ່ງມີເນື້ອໃນວ່າ: ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄຳຊົມເຊີຍອັນຈິງໃຈ ແລະ ພອນໄຊອັນປະເສີດມາຍັງ ສົມເດັດ, ລັດຖະບານ ແລະ ປະຊາຊົນ ແຫ່ງ ຣາຊະອານາຈັກ ຊາອຸດິດ ອາຣາບີ ເນື່ອງໃນໂອກາດວັນຊາດ ແຫ່ງ ຣາຊະອານາຈັກ ຊາອຸດິດ ອາຣາບີ ຄົບຮອບ 88 ປີ ແລະ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ຊາອຸດິດ ອາຣາບີ ຄົບຮອບ 30 ປີ.
ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ຊາອຸດິດ ອາຣາບີ ມີສາຍພົວພັນມິດຕະພາບ ແລະ ການຮ່ວມມືກັນດີ ໃນໄລຍະຜ່ານມາ, ຂ້າພະເຈົ້າ ຫວັງຢ່າງຍິ່ງວ່າຈະໄດ້ຮ່ວມເຮັດວຽກ ກັບສົມເດັດ ຢ່າງໃກ້ຊິດ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດພວກເຮົາ ໃນຊຸມປີຕໍ່ໜ້າ ເພື່ອຜົນປະໂຫຍດຮ່ວມກັນ ຂອງສອງຊາດພວກເຮົາ.
ຂ້າພະເຈົ້າ ຂໍຖືໂອກາດນີ້ ອວຍພອນໄຊອັນປະເສີດມາຍັງ ສົມເດັດ ຈົ່ງມີພະລານາໄມເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນສູງສົ່ງ ຂອງພະອົງ ແລະ ປະຊາຊົນຊາອຸດິດ ອາຣາບີ.