ໜັງສືພິມ ປະຊາຊົນ

ຫົວຂໍ້ : ຈົດໝາຍສະແດງຄວາມເຫັນໃຈ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 03/11/2020 09:16:39 ຈຳນວນຜູ້ເຂົ້າຢ້ຽມຊົມ 3266 ຄັ້ງ

ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງຈົດໝາຍສະແດງຄວາມເຫັນໃຈເຖິງ ສົມເດັດ ອັກຄະມະຫາເສນາບໍດີ ເຕໂຈ ຮຸນ ແຊນ ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ ທີ່ ນະຄອນຫຼວງພະນົມເປັນ ຊຶ່ງມີເນື້ອໃນວ່າ:

ຂ້າພະເຈົ້າ ໄດ້ຮັບຂ່າວດ້ວຍຄວາມເປັນຫ່ວງເປັນຢ່າງຍິ່ງ ຕໍ່ເຫດການຝົນຕົກໜັກ ແລະ ນໍ້າຖ້ວມ, ເຮັດໃຫ້ເກີດນ້ຳຖ້ວມ ຢູ່ນະຄອນຫຼວງພະນົມເປັນ ແລະ ຫຼາຍແຂວງ ຂອງກຳປູເຈຍ, ຊຶ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງປະຊາຊົນກຳປູເຈຍ ຈຳນວນຫຼວງຫຼາຍ.

ໃນນາມລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນໃຈຢ່າງສຸດຊຶ້ງມາຍັງ ສົມເດັດ, ລັດຖະບານ ແລະ ປະຊາຊົນ ແຫ່ງ ຣາຊະອານາຈັກ ກຳປູເຈຍ ໂດຍສະເພາະ ສະມາຊິກຄອບຄົວຂອງຜູ້ປະສົບໄພທຳມະຊາດໃນຄັ້ງນີ້.

ຂ້າພະເຈົ້າ ມີຄວາມເຊື່ອໝັ້ນວ່າ ດ້ວຍຄວາມເອົາໃຈໃສ່ ແລະ ການຊີ້ນຳ-ນຳພາອັນໃກ້ຊິດ ຂອງ ສົມເດັດ ກໍຄື ຄວາມສາມັກຄີອັນເປັນປຶກແຜ່ນຂອງປະຊາຊົນກຳປູເຈຍ, ຣາຊະອານາຈັກກຳປູເຈຍ ຈະສາມາດຜ່ານຜ່າຄວາມຫຍຸ້ງຍາກ ໃນຄັ້ງນີ້ ແລະ ສາມາດຟື້ນຟູເຂດທີ່ໄດ້ຮັບຜົນກະທົບດັ່ງກ່າວ ໃຫ້ກັບຄືນສູ່ສະພາບປົກກະຕິໂດຍໄວ. ດ້ວຍຄວາມນັບຖືຢ່າງສູງ.