ໜັງສືພິມ ປະຊາຊົນ

ຫົວຂໍ້ : ສານອວຍພອນວັນຊາດ ຈາກການນຳ ກຳປູເຈຍ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 08/12/2020 09:14:48 ຈຳນວນຜູ້ເຂົ້າຢ້ຽມຊົມ 3663 ຄັ້ງ

ພະນະທ່ານ ຮຸນ ແຊນ ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ ໄດ້ສົ່ງສານອວຍພອນ ເຖິງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ ນະຄອນຫຼວງວຽງຈັນ ເນື່ອງໃນໂອກາດວັນຊາດ ສປປ ລາວ ຄົບຮອບ 45 ປີ ຊຶ່ງມີເນື້ອໃນວ່າ:
ພະນະທ່ານ,
ໃນນາມລັດຖະບານ ແຫ່ງ ຣາຊະອານາຈັກ ແລະ ປະ ຊາຊົນກຳປູເຈຍ, ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ແລະ ອວຍພອນໄຊອັນປະເສີດ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງ ປະຊາຊົນລາວ ເພື່ອນມິດ ເນື່ອງໃນໂອກາດອັນສະຫງ່າລາສີ ແຫ່ງ ວັນຊາດ ຂອງສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ.
ຂ້າພະເຈົ້າ ມີຄວາມປິຕິຍິນດີ ທີ່ໄດ້ເຫັນມິດຕະພາບທີ່ເຂັ້ມແຂງ ແລະ ການຮ່ວມມືອັນໃກ້ຊິດຮອບດ້ານ ລະຫວ່າງ ກຳປູເຈຍ ແລະ ລາວ. ຂ້າພະເຈົ້າ ຂໍຢືນຢັນພັນທະອັນໜັກແໜ້ນ ຂອງຂ້າພະເຈົ້າ ທີ່ຈະເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ສອງປະເທດພວກເຮົາ ບົນຈິດໃຈຂອງການເປັນເພື່ອນບ້ານທີ່ດີ ແລະ ຄວາມສາມັກຄີແບບພິເສດ. ຂ້າພະເຈົ້າ ຫວັງວ່າ ຈະໄດ້ເຮັດວຽກຮ່ວມກັບ ພະນະທ່ານ ຢ່າງໃກ້ຊິດ ເພື່ອສືບຕ່ໍສົ່ງເສີມຄວາມມຸ່ງມາດປາຖະໜາຮ່ວມກັນ ທັງໃນຂອບສອງຝ່າຍ ແລະ ຫຼາຍຝ່າຍ ເພື່ອຮັກສາສັນຕິພາບ, ສະຖຽນລະພາບ ແລະ ການພັດທະນາເສດຖະກິດ-ສັງຄົມແບບຍືນຍົງ ຂອງສອງປະເທດພວກເຮົາ ກໍຄືປະຊາຄົມອາຊຽນ ແລະ ໃນໂລກ.
ຂ້າພະເຈົ້າ ຂໍຖືໂອກາດ ອັນເບີກບານມ່ວນຊື່ນນີ້, ອວຍພອນໄຊອັນປະເສີດ ມາຍັງ ພະນະທ່ານ ຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງ ຂອງພະນະທ່ານ ແລະ ຂໍໃຫ້ປະຊາຊົນລາວ ຈົ່ງມີຄວາມສຸກ ແລະ ຈະເລີນຮຸ່ງເຮືອງຍິ່ງໆຂຶ້ນ.
ດ້ວຍຄວາມເຄົາລົບ ແລະ ນັບຖືຢ່າງສູງ
ໃນໂອກາດດຽວກັນ,ພະນະທ່ານ ປຣາກ ໂຊຄົນ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາຈັກ ກຳປູເຈຍ ກໍໄດ້ສົ່ງສານອວຍພອນ ເຖິງ ພະນະທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ສາທາລະນະລັດ ປະຊາທິປະໄຕ ປະຊາຊົນລາວ ເຊັ່ນດຽວກັນ.