ໜັງສືພິມ ປະຊາຊົນ

ຫົວຂໍ້ : ທາງດ່ວນວຽງຈັນ-ວັງວຽງຈະເປີດນຳໃຊ້ຢ່າງເປັນທາງການໃນວັນທີ 20 ທັນວານີ້

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 11/12/2020 14:31:42 ຈຳນວນຜູ້ເຂົ້າຢ້ຽມຊົມ 5437 ຄັ້ງ

ທາງດ່ວນວຽງຈັນ-ວັງວຽງຈະເປີດນຳໃຊ້ຢ່າງເປັນທາງການໃນວັນທີ 20 ທັນວາຈະເຖິງນີ້ ໂດຍຈະບໍ່ເກັບຄ່າທຳນຽມເປັນເວລາ 3 ວັນ ແຕ່ວັນທີ 21-23 ທັນວາ.

ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການສະບັບເລກທີ 1349/ຫສນຍ ລົງວັນທີ 11 ທັນວາ 2020, ເນື້ອໃນແຈ້ງການລະບຸວ່າ: ຫ້ອງວ່າການສຳນັກງານນາຍົກລັດຖະມົນຕີ ຂໍເປັນກຽດແຈ້ງການຕົກລົງ ແລະ ເຫັນດີຂອງທ່ານນາຍົກລັດຖະມົນຕີມາຍັງທ່ານ ຊາບດັ່ງນີ້:

ເຫັນດີໃຫ້ອະນຸມັດເປີດການນຳໃຊ້ທາງດ່ວນຊ່ວງນະຄອນຫຼວງວຽງຈັນ ຫາ ວັງວຽງຢ່າງເປັນທາງການໃນວັນທີ 20 ທັນວາ 2020 ໂດຍບໍ່ເສຍຄ່າທຳນຽມຜ່ານທາງເປັນເວລາ 3 ວັນ, ແຕ່ວັນທີ 21-23 ທັນວາ 2020 ເພື່ອເປັນການຊົມເຊີຍວັນຊາດທີ 2 ທັນວາ ຄົບຮອບ 45 ປີ ຕາມການສະເໜີຂອງກະຊວງແຜນການ ແລະ ການລົງທຶນ
ມອບໃຫ້ກະຊວງແຜນການ ແລະ ການລົງທຶນ ເປັນໄຈກາງປະສານສົມທົບກັບ ກະຊວງໂຍທາທິການ ແລະ ຂົນສົ່ງ, ກະຊວງການຕ່າງປະເທດ, ນະຄອນຫຼວງ, ແຂວງວຽງຈັນ ແລະ ພາກສ່ວນກ່ຽວຂ້ອງ ເພື່ອກຽມຄວາມພ້ອມຮອບດ້ານໃນການເປີດນຳໃຊ້ເສັ້ນທາງດ່ວນດັ່ງກ່າວ.