ໜັງສືພິມ ປະຊາຊົນ

ຫົວຂໍ້ : ການນຳເຮົາ ສົ່ງສານອວຍພອນວັນຊາດກູບາ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 05/01/2021 09:21:17 ຈຳນວນຜູ້ເຂົ້າຢ້ຽມຊົມ 1877 ຄັ້ງ

ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານອວຍພອນເຖິງ ສະຫາຍ ມີເກັນ ດີເອັສ-ກາແນນ ແບຣມູເດັສ ປະທານປະເທດ ແຫ່ງ ສາທາລະນະລັດ ກູບາ ເມື່ອບໍ່ດົນມານີ້ ທີ່ ລາຮາວານ ເນື້ອໃນສານລະບຸວ່າ:
ເນື່ອງໃນໂອກາດສະເຫຼີມສະຫຼອງວັນຊາດ ແຫ່ງ ສາທາ ລະນະລັດ ກູບາ ຄົບຮອບ 62 ປີ, ໃນນາມປະຊາຊົນລາວທຸກຖ້ວນໜ້າ ແລະ ໃນນາມສ່ວນຕົວ, ຂ້າພະເຈົ້າ ຂໍຖືເປັນກຽດສົ່ງຄໍາຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ສະຫາຍ ແລະ ຜ່ານສະຫາຍ ໄປຍັງປະຊາຊົນກູບາເພື່ອນມິດທຸກຖ້ວນໜ້າ.
ຂ້າພະເຈົ້າເຊື່ອໝັ້ນວ່າ ບົນພື້ນຖານແຫ່ງຄວາມເປັນມິດສະຫາຍ ແລະ ຄວາມສາມັກຄີອັນແໜ້ນແຟ້ນ, ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຖານອ້າຍນ້ອງ ລະຫວ່າງ ສອງປະເທດພວກເຮົາ ຈະສືບ ຕໍ່ຮັດແໜ້ນ ແລະ ເສີມຂະຫຍາຍສູ່ລະດັບສູງຍິ່ງໆຂຶ້ນ ເພື່ອຜົນປະໂຫຍດລວມຂອງປະຊາຊົນສອງຊາດພວກເຮົາ, ກໍຄືເພື່ອສັນຕິພາບ, ສະຖຽນລະພາບ, ຄວາມຍຸຕິທໍາ ແລະ
ການພັດທະນາໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊໃຫ້ສະຫາຍ ມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ອັນສູງສົ່ງຂອງສະຫາຍ ແລະ ປະຊາຊົນກູບາ ຈົ່ງສືບຕໍ່ມີຄວາມກ້າວໜ້າ ແລະ ຈະເລີນຮຸ່ງ ເຮືອງຍິ່ງໆຂຶ້ນ.
ໃນໂອກາດດຽວກັນນີ້ ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແລະ ສະຫາຍ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດກໍໄດ້ສົ່ງສານອວຍ ພອນເຖິງຄູ່ຮ່ວມຕຳແໜ່ງເຊັ່ນດຽວກັນ.