ໜັງສືພິມ ປະຊາຊົນ

ຫົວຂໍ້ : ສານອວຍພອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ VIII ຂອງພັກແຮງງານເກົາຫຼີ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 07/01/2021 08:54:27 ຈຳນວນຜູ້ເຂົ້າຢ້ຽມຊົມ 3740 ຄັ້ງ

ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສົ່ງສານອວຍພອນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ VIII ຂອງພັກແຮງງານເກົາຫຼີ ທີ່ນະຄອນຫຼວງພຽງຢາງ ຊຶ່ງ ມີເນື້ອໃນວ່າ:

ເນື່ອງໃນໂອກາດເປີດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ VIII ຂອງພັກແຮງງານເກົາຫຼີ, ໃນນາມຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ສະມາຊິກພັກ ແລະ ປະຊາຊົນລາວ ບັນດາເຜົ່າໃນທົ່ວປະເທດ, ພວກຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດ ຖານສະຫາຍອ້າຍນ້ອງ ມາຍັງຄະນະບໍລິຫານງານສູນກາງພັກແຮງງານເກົາຫຼີ, ບັນດາຜູ້ແທນກອງປະຊຸມໃຫຍ່ ແລະ ໂດຍຜ່ານກອງປະຊຸມໃຫຍ່ ໄປຍັງສະມາຊິກພັກແຮງງານເກົາຫຼີ ແລະ ປະຊາຊົນ ສປປ ເກົາຫຼີ ອ້າຍນ້ອງທຸກຖ້ວນໜ້າ.

ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ VIII ຂອງພັກແຮງງານເກົາຫຼີ ແມ່ນເຫດການການເມືອງທີ່ມີຄວາມໝາຍທາງປະຫວັດສາດໃນການເຄື່ອນໄຫວຂອງພັກແຮງງານ ເກົາຫຼີ ແລະ ປະຊາຊົນ ສປປ ເກົາຫຼີ ອ້າຍນ້ອງ ຊຶ່ງກອງປະຊຸມຈະໄດ້ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ແລະ ກໍານົດແນວທາງຂອງພັກ ໃນຕໍ່ໜ້າ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສັງຄົມນິຍົມທີ່ຮັ່ງມີເຂັ້ມແຂງ, ຈະເລີນຮຸ່ງເຮືອງ ຕາມແນວຄິດຈຸເຊ, ແນວທາງຊົງກຸນ ແລະ ບັນລຸຜົນສຳເລັດໃນການທ້ອນໂຮມປະເທດຊາດ ໂດຍສັນຕິວິທີ.

ພວກຂ້າພະເຈົ້າເຊື່ອໝັ້ນວ່າ, ດ້ວຍທິດຊີ້ນຳອັນຖືກຕ້ອງ ແລະ ເດັດດ່ຽວໜຽວແໜ້ນ ຂອງພັກແຮງງານເກົາຫຼີ ທີ່ມີ ປະທານ ກິມອິນຊຸງ ແລະ ປະທານ ກິມເຈິງອິນ ເປັນຜູ້ນຳທີ່ຍິ່ງໃຫຍ່ໃນເມື່ອກ່ອນ ແລະ ສະຫາຍ ກິມເຈິງອຸນ ທີ່ເປັນຜູ້ສືບທອດພາລະກິດອັນຍິ່ງໃຫຍ່ໃນປັດຈຸບັນນັ້ນ, ພັກ, ລັດ ແລະ ປະຊາຊົນ ສປປ ເກົາຫຼີ ອ້າຍນ້ອງ ຈະສາມາດຈັດຕັ້ງຜັນຂະຫຍາຍບັນດາມະຕິກອງປະຊຸມໃຫຍ່ ຄັ້ງທີ VIII ຂອງພັກແຮງງານເກົາຫຼີ ຢ່າງມີຜົນສໍາເລັດອັນຈົບງາມ ແລະ ນໍາເອົາຄວາມສົມບູນພູນສຸກມາສູ່ປະຊາຊົນ ສປປ ເກົາຫຼີ ອ້າຍນ້ອງ ທຸກຖ້ວນໜ້າ.

ໃນໂອກາດອັນສະຫງ່າລາສີນີ້, ພວກຂ້າພະເຈົ້າ ຂໍສະແດງຄວາມຊົມເຊີຍ ຢ່າງສຸດອົກສຸດໃຈ ຕໍ່ຜົນສຳເລັດອັນໃຫຍ່ຫຼວງທີ່ ພັກແຮງງານເກົາຫຼີ ແລະ ປະຊາຊົນ ສປປ ເກົາຫຼີ ອ້າຍນ້ອງ ຍາດມາໄດ້ໃນຕະຫຼອດໄລຍະຜ່ານມາ ແລະ ຂໍອວຍພອນໃຫ້ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ VIII ຂອງ ພັກແຮງງານເກົາຫຼີ ຈົ່ງປະສົບຜົນສໍາເລັດຢ່າງສະ ຫງ່າງາມ.

ຂໍອວຍພອນໃຫ້ ສາຍພົວພັນມິດຕະພາບ ອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ - ສປປ ເກົາຫຼີ ຈົ່ງສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ກໍຄືເພື່ອພາລະກິດສັນຕິພາບ, ມິດຕະ ພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.