ໜັງສືພິມ ປະຊາຊົນ

ຫົວຂໍ້ : ຖະແຫຼງການຮ່ວມ ລາວ - ຫວຽດນາມ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 30/06/2021 09:08:03 ຈຳນວນຜູ້ເຂົ້າຢ້ຽມຊົມ 962 ຄັ້ງ

1. ໂດຍຕອບສະໜອງຕາມການເຊື້ອເຊີນຂອງສະຫາຍ ຫງວຽນ ຝູ ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ພ້ອມດ້ວຍພັນລະຍາ ແລະ ສະຫາຍ ຫງວຽນຊວັນຟຸກ ປະທານປະເທດ ແຫ່ງ ສາທາລະນະລັດ ສັງຄົມນິຍົມຫວຽດນາມ ພ້ອມດ້ວຍພັນລະຍາ; ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ໄດ້ນໍາພາຄະນະຜູ້ແທນຂັ້ນສູງພັກ, ລັດ ສປປ ລາວ ຢ້ຽມຢາມສັນ ຖະວະໄມຕີ ສາທາລະນະລັດ ສັງຄົມນິຍົມຫວຽດນາມ ຢ່າງເປັນທາງການ ແຕ່ວັນທີ 28 ເຖິງ 29 ມິຖຸນາ 2021.
ໃນການຢ້ຽມຢາມຄັ້ງນີ້, ສະຫາຍ ທອງລຸນ ສີສຸລິດ ເລຂາ ທິການໃຫຍ່ ປະທານປະເທດ ແຫ່ງ ສປປ ລາວ ໄດ້ພົບປະ ເຈລະຈາກັບ ສະຫາຍ ຫງວຽນ ຝູ ຈ້ອງ ເລຂາທິການໃຫຍ່; ສະຫາຍ ຫງວຽນ ຊວັນ ຟຸກ ປະທານປະເທດ; ສະຫາຍ ຟາມ ມິງ ຈິງ ນາຍົກລັດຖະມົນຕີ, ສະຫາຍ ເວືອງ ດິ່ງ ເຫວະ ປະທານສະພາແຫ່ງຊາດ; ພ້ອມນັ້ນ, ກໍໄດ້ຢ້ຽມຢາມ ແລະ ໂອ້ລົມກັບພະນັກງານ, ນັກສຶກສາຂອງສະຖາບັນການເມືອງແຫ່ງຊາດໂຮ່ຈິມິນ; ໄດ້ຕ້ອນຮັບການເຂົ້າຢ້ຽມຂາໍ່ນັບຂອງຄະນະກໍາມະການສູນກາງແນວໂຮມປະເທດຊາດຫວຽດນາມ, ສະມາຄົມມິດຕະພາບ ຫວຽດນາມ-ລາວ, ຄະນະປະສານງານອະດີດທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ; ວາງ ພວງມາລາ ທີ່ອະນຸສາວະລີນັກຮົບນິລະນາມ ແລະ ສຸສານ ປະທານ ໂຮ່ຈິມິນ.
2. ໃນທ່າມກາງບັນຍາກາດທີ່ເຕັມໄປດ້ວຍໄມຕີຈິດມິດ ຕະພາບອັນດູດດື່ມ, ຄວາມສາມັກຄີພິເສດ ແລະ ການເຊື່ອໝັ້ນຊຶ່ງກັນ ແລະ ກັນນັ້ນ, ສອງຝ່າຍ ໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ; ໄດ້ແລກປ່ຽນ ແລະ ເປັນເອກະພາບກັນ ກ່ຽວກັບບັນດາແຜນນະໂຍບາຍ, ມາດຕະການ ເພື່ອສືບຕໍ່ນຳເອົາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ຂະຫຍາຍຕົວເຂົ້າສູ່ລວງກວ້າງ ແລະ ລວງເລິກ, ມີປະສິດທິຜົນ ແລະ ແທດເໝາະກັບສະພາບຕົວຈິງໃນ ແຕ່ລະຂົງເຂດ, ປະກອບສ່ວນເຂົ້າໃນການຈັດຕັ້ງປະຕິບັດມະ ຕິກອງປະຊຸມໃຫຍ່ຂອງແຕ່ລະພັກ, ຈັດຕັ້ງປະຕິບັດແຜນຍຸດ ທະສາດການຮ່ວມມື 10 ປີ
ລະຫວ່າງລາວ ແລະ ຫວຽດນາມ ຢ່າງມີໄຊ; ພ້ອມດຽວກັນນັ້ນຍັງໄດ້ແລກປ່ຽນຄໍາຄິດເຫັນກ່ຽວກັບສະພາບການພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ.
3. ສະຫາຍ ຫງວຽນຝູຈ້ອງ ເລຂາທິການໃຫຍ່ ພ້ອມດ້ວຍບັນດາສະຫາຍການນໍາ ພັກ-ລັດ ຫວຽດນາມ ແລະ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງ, ມີຄວາມໝາຍປະຫວັດສາດທີ່ແຕ່ລະພັກ, ແຕ່ ລະປະເທດ ຍາດມາໄດ້ໃນພາ ລະກິດການປ່ຽນແປງໃໝ່; ສະ ແດງຄວາມເຊື່ອໝັ້ນຢ່າງໜັກ ແໜ້ນວ່າ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ແລະ ພັກກອມມູນິດ ຫວຽດນາມ, ພາລະກິດການປ່ຽນແປງໃໝ່, ການປົກປັກຮັກ ສາ ແລະ ສ້າງສາພັດທະນາປະເທດຊາດຂອງລາວ ແລະ ຫວຽດນາມ ຈະສືບຕໍ່ຍາດໄດ້ບັນດາຜົນສໍາເລັດທີ່ໃຫຍ່ຫຼວງກວ່າເກົ່າ, ປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ຢ່າງມີໄຊ, ສ້າງສາປະເທດລາວ ແລະ ຫວຽດນາມ ໃຫ້ນັບມື້ມັ່ງຄັ່ງເຂັ້ມແຂງ, ຍົກສູງບົດບາດ, ອິດທິພົນຂອງແຕ່ລະປະເທດຢູ່ພາກພື້ນ ແລະ ສາກົນ ຢ່າງບໍ່ຢຸດຢັ້ງ, ກ້າວຂຶ້ນຕາມເສັ້ນທາງສັງຄົມນິຍົມຢ່າງໜັກແໜ້ນ.
4. ສອງຝ່າຍ ຢືນຢັນວ່າ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແມ່ນຊັບສົມ ບັດລວມອັນລໍ້າຄ່າຂອງສອງຊາດ, ເປັນປັດໄຈຮັບປະກັນການຄົງຕົວ ແລະ ຂະຫຍາຍຕົວຂອງສອງປະເທດ. ສອງພັກ, ສອງລັດ ແລະ ປະຊາຊົນສອງຊາດ ມີຄວາມຮັບຜິດຊອບຮ່ວມ ກັນຖະໜຸຖະໜອມ ແລະ ເພີ່ມ ພູນຄູນສ້າງສາຍພົວພັນມິດຕະ ພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານ ລາວ-ຫວຽດນາມ ໃຫ້ນັບມື້ນັບໄດ້ຮັບການຂະ ຫຍາຍຕົວເຂົ້າສູ່ລວງກວ້າງ ແລະ ລວງເລິກໃນທຸກຂົງເຂດວຽກງານ ບົນພື້ນຖານການເສີມຂະຫຍາຍຈິດໃຈຄວາມເປັນເອກະລາດ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ໃຫ້ບຸລິມະສິດພິເສດ, ສະໜັບສະໜູນ ແລະ ສ້າງເງື່ອນໄຂອໍານວຍຄວາມສະດວກໃຫ້ແກ່ກັນ ເພື່ອ ພ້ອມກັນພັດທະນາ, ເພື່ອຄວາມສົມ ບູນພູນສຸກຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະ ນາຢູ່ອາຊີຕາເວັນອອກສ່ຽງໃຕ້ ແລະ ໃນໂລກ. ສອງຝ່າຍເນັ້ນ ໜັກ ຢຶດໝັ້ນເປົ້າໝາຍເອກະ ລາດແຫ່ງຊາດ ແລະ ສັງຄົມນິ ຍົມ; ສືບຕໍ່ຄຽງບ່າຄຽງໄຫຼ່, ສະ ໜັບສະໜູນຊຶ່ງກັນ ແລະ ກັນໃນພາລະກິດການສ້າງສາ ແລະ ພັດທະນາຢູ່ແຕ່ລະປະເທດ.
ສອງຝ່າຍ ສະແດງຄວາມຂອບໃຈຢ່າງຈິງໃຈຕໍ່ການສະ ໜັບສະໜູນ ແລະ ການຊ່ວຍ ເຫຼືອອັນໃຫຍ່ຫຼວງ, ລໍ້າຄ່າ, ໝົດຈິດໝົດໃຈທີ່ສອງພັກ, ສອງລັດ ແລະ ປະຊາຊົນສອງຊາດໄດ້ມີໃຫ້ແກ່ກັນ ແລະ ກັນ ຕະຫຼອດໄລຍະແຫ່ງການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດໃນເມື່ອກ່ອນ ກໍຄືໃນພາລະກິດແຫ່ງການປ່ຽນແປງໃໝ່, ປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.
5. ສອງຝ່າຍ ເປັນເອກະພາບກັນສືບຕໍ່ເຮັດໃຫ້ການພົວພັນດ້ານການເມືອງກ້າວເຂົ້າສູ່ລວງເລິກ, ມີປະສິດທິຜົນ ຫຼາຍກວ່າເກົ່າ; ຮ່ວມມືກັນຢ່າງແໜ້ນແຟ້ນ ໃນບັນດາບັນຫາຍຸດທະສາດທີ່ພົວພັນເຖິງຄວາມ ສະຫງົບ ແລະ ການພັດທະນາຢູ່ແຕ່ລະປະເທດ, ສືບຕໍ່ຍົກສູງປະສິດທິຜົນການຮ່ວມມືໃນທຸກຂັ້ນ, ທຸກຂະແໜງການ ແລະ ທ້ອງຖິ່ນຂອງສອງປະເທດ; ສືບຕໍ່ຮັກສາບັນດາການພົບປະ, ຢ້ຽມຢາມ ລະຫວ່າງການນໍາຂັ້ນ ສູງຂອງສອງພັກ, ສອງລັດ ດ້ວຍຫຼາຍຮູບການ; ເປັນເຈົ້າການເພີ່ມທະວີການແລກປ່ຽນຂໍ້ມູນຂ່າວສານ, ແລກປ່ຽນບົດຮຽນໃນວຽກງານກໍ່ສ້າງພັກ, ກໍ່ສ້າງລະບົບການເມືອງ, ບໍາລຸງກໍ່ສ້າງພະນັກງານການນໍາ-ຄຸ້ມຄອງແຕ່ລະຂັ້ນ; ພັດທະນາເສດຖະກິດ-ສັງຄົມ, ຮັບປະກັນສະຖຽນລະພາບເສດຖະກິດມະຫາພາກ, ເປີດກວ້າງການເຊື່ອມໂຍງສາກົນ; ຍູ້ແຮງການໂຄສະນາສຶກສາກ່ຽວກັບມູນເຊື້ອການພົວພັນພິເສດ ລາວ-ຫວຽດນາມ ໃນຖັນແຖວພະນັກງານ, ສະມາຊິກພັກ ແລະ ຊັ້ນຄົນຕ່າງໆ, ໂດຍສະ ເພາະແມ່ນຄົນຮຸ່ນໜຸ່ມຂອງ ສອງປະເທດ; ກໍ່ສ້າງບາງໂຄງ ການອະນຸສອນສະຖານທາງ ປະຫວັດສາດທີ່ມີຄວາມໝາຍຕໍ່ການພົວພັນ ລາວ-ຫວຽດນາມ.
6. ສອງຝ່າຍ ເປັນເອກະພາບໃນການອອກແຮງຊຸກຍູ້ ສ້າງບາດກ້າວບຸກທະລຸໃນການຍົກສູງປະສິດທິຜົນຂອງການຮ່ວມມືດ້ານເສດຖະກິດ, ວັດທະນະທໍາ, ວິທະຍາສາດ-ເຕັກນິກ ບົນພື້ນຖານເສີມຂະຫຍາຍທ່າແຮງບົ່ມຊ້ອນ ແລະ ຄວາມອາດສາມາດຂອງແຕ່ລະປະເທດໃຫ້ໄດ້ຫຼາຍທີ່ ສຸດ; ຍູ້ແຮງການປະຕິບັດບັນ ດາສົນທິສັນຍາ, ບົດບັນທຶກການຮ່ວມມືລະຫວ່າງສອງລັດຖະບານ ແລະ ບັນດາແຜນ ການຮ່ວມມື ລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ ຢ່າງມີປະສິດທິຜົນ. ສອງຝ່າຍມີບັນດາມາດຕະການອັນລະອຽດ ແນໃສ່ຊຸກຍູ້ການເຊື່ອມຕໍ່ສອງພື້ນຖານເສດຖະກິດ, ຮັບປະ ກັນຄວາມຄືບໜ້າ ແລະ ຄຸນນະພາບຂອງບັນດາໂຄງການລົງທຶນ, ສຸມໃສ່ຜັນຂະຫຍາຍບັນດາໂຄງການລົງທຶນຈຸດສຸມ; ຍູ້ແຮງການເຊື່ອມຕໍ່ໂຄງລ່າງຄົມມະນາຄົມ, ພະລັງງານ, ໂທລະຄົມມະນາຄົມ, ການທ່ອງທ່ຽວ; ເພີ່ມທະວີການແລກປ່ຽນບົດຮຽນໃນການຄຸ້ມຄອງເສດຖະກິດມະຫາພາກ ລະຫວ່າງສອງປະເທດ; ມີບັນດານະໂຍບາຍບຸລິມະສິດ ເພື່ອຊຸກຍູ້ສົ່ງເສີມບັນດາຫົວ ໜ່ວຍວິສາຫະກິດຂອງສອງປະເທດ ລົງທຶນເຂົ້າໃນຂົງເຂດຕ່າງໆທີ່ທັງສອງຝ່າຍມີຄວາມອາດສາມາດ ແລະ ມີທ່າແຮງບົ່ມຊ້ອນ, ເປັນຕົ້ນແມ່ນ ຂົງເຂດກະສິກໍາເຕັກໂນໂລຊີສູງ, ອຸດສາຫະກໍາປຸງແຕ່ງ, ການຜະລິດເຄື່ອງຈັກ; ຜັນຂະຫຍາຍບັນດາມາດຕະການຢ່າງພ້ອມພຽງ ເພື່ອແນໃສ່ເພີ່ມມູນຄ່າການຄ້າສອງສົ້ນ.
ສອງຝ່າຍ ປະສານສົມທົບກັນຢ່າງແໜ້ນແຟ້ນໃນການປ້ອງກັນ, ຄວບຄຸມການແຜ່ລະ ບາດຂອງພະຍາດໂຄວິດ-19 ແລະ ຍູ້ແຮງການຮ່ວມມື, ສະ ໜັບສະໜູນກັນ, ພ້ອມກັນຂ້າມຜ່ານຄວາມຫຍຸ້ງຍາກ ເພື່ອພັດທະນາເສດຖະກິດ-ສັງຄົມ.
ສອງຝ່າຍ ເພີ່ມທະວີບັນ ດາມາດຕະການຍົກສູງຄຸນນະພາບ ແລະ ປະສິດທິພາບຂອງການຮ່ວມມືໃນຂົງເຂດການສຶກ ສາ, ກໍ່ສ້າງ ແລະ ການພັດທະ ນາຊັບພະຍາກອນມະນຸດ, ໃນນັ້ນ ຖືສໍາຄັນການກໍ່ສ້າງຊັບ ພະຍາກອນມະນຸດທີ່ມີຄຸນນະພາບສູງ; ເລັ່ງນໍາເອົາບັນດາເນື້ອໃນປຶ້ມປະຫວັດສາດແຫ່ງ ການພົວພັນພິເສດ ລາວ-ຫວຽດນາມ ເຂົ້າໃນຫຼັກສູດການສິດສອນຢູ່ສະຖາບັນການສຶກສາຂອງສອງປະເທດ.
ສອງຝ່າຍ ສືບຕໍ່ປະຕິບັດສົນທິສັນຍາວ່າດ້ວຍ ຄົນຕ່າງດ້າວ, ສົນທິສັນຍາວ່າດ້ວຍກົງສູນ, ສົນທິສັນຍາວ່າດ້ວຍແຮງງານ ລະຫວ່າງສອງປະເທດ ໃຫ້ເປັນຢ່າງດີ; ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນຊາວຫວຽດນາມ ຢູ່ລາວ ແລະ ປະຊາຊົນຊາວລາວ ຢູ່ຫວຽດນາມ ໃນການດໍາລົງຊີວິດ, ທໍາມາຫາກິນ, ສຶກສາຮໍ່າຮຽນ ໂດຍສອດຄ່ອງຕາມລະບຽບກົດໝາຍຂອງແຕ່ລະປະເທດ ແລະ ປະເພນີສາກົນ.
7. ສອງຝ່າຍ ເນັ້ນໜັກເຖິງລະດັບຄວາມສໍາຄັນ ແລະ ເປັນເອກະພາບກັນໃນການເພີ່ມທະວີການຮ່ວມມືໃນເສົາ ຄໍ້າປ້ອງກັນຊາດ, ປ້ອງກັນ ຄວາມສະຫງົບໃຫ້ຫຼາຍກວ່າເກົ່າ, ຮັບປະກັນໃຫ້ເປັນບ່ອນອີງທີ່ໜັກແໜ້ນໃຫ້ກັນ ແລະ ກັນ ເພື່ອຮັບມືກັບສິ່ງທ້າທາຍຕ່າງໆຕໍ່ກັບຄວາມສະຫງົບທີ່ນັບມື້ຍິ່ງຫຼາກຫຼາຍ, ສັບສົນ, ປະກອບສ່ວນເຂົ້າໃນການປົກປັກຮັກສາສະຖຽນລະພາບດ້ານການເມືອງ, ປ້ອງກັນຊາດ ແລະ ປ້ອງກັນຄວາມສະຫງົບຢູ່ ແຕ່ລະປະເທດຢ່າງໜັກແໜ້ນ. ສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະ ພາບ, ສະຖຽນລະພາບ, ຮ່ວມມື ແລະ ພັດທະນາຢ່າງຍືນຍົງ. ປະຕິບັດອະນຸສັນຍາ ແລະ ແຜນ ການຮ່ວມມື ກ່ຽວກັບວຽກ ງານປ້ອງກັນຊາດ, ປ້ອງກັນຄວາມສະຫງົບ; ສັນຍາວ່າດ້ວຍລະບຽບການຄຸ້ມຄອງຊາຍ ແດນ ແລະ ດ່ານຊາຍແດນທາງ ບົກ; ອະນຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍ ແດນ ຢ່າງມີປະສິດທິຜົນ; ຮ່ວມມືຢ່າງແໜ້ນແຟ້ນໃນການຕ້ານ ແລະ ສະກັດກັ້ນ “ການຫັນ ປ່ຽນໂດຍສັນຕິ”, “ການສ້າງຄວາມວຸ້ນວາຍ ເພື່ອໂຄ່ນລົ້ມລະ ບອບ”, ຕ້ານ ແລະ ສະກັດກັ້ນບັນດາອາຊະຍາກຳຂ້າມຊາດ, ການຂົນສົ່ງ, ຊື້-ຂາຍສິ່ງເສບຕິດ; ສືບຕໍ່ຊອກຄົ້ນ ແລະ ສົ່ງອັດຖິອະດີດນັກຮົບ , ທະຫານອາສາ ສະໝັກຫວຽດນາມທີ່ເສຍສະ ຫຼະຊີວິດໃນປາງສົງຄາມຢູ່ລາວກັບຄືນປະເທດ.
8. ສອງຝ່າຍ ເປັນເອກະ ພາບກັນເພີ່ມທະວີການແລກ ປ່ຽນຂໍ້ມູນຂ່າວສານຢ່າງທັນ ການ, ປຶກສາຫາລືທາງການ ເມືອງ ແລະ ປະສານສົມທົບກັນຢ່າງແໜ້ນແຟ້ນ, ສະໜັບ ສະໜູນຊຶ່ງກັນ ແລະ ກັນຢ່າງມີປະສິດທິຜົນໃນເວທີສາກົນ ແລະ ພາກພື້ນ ໂດຍສະເພາະແມ່ນ ການຮ່ວມມືໃນກອບອາຊຽນ ແລະ ບັນ ດາກົນໄກການຮ່ວມມືຂອງອາຊຽນ, ອົງການສະຫະປະຊາຊາດ, ບັນດາກົນໄກຂອງການຮ່ວມມືໃນອະ ນຸພາກພື້ນແມ່ນໍ້າຂອງ, ອົງ ການການຄ້າໂລກ, ເວທີການ ຮ່ວມມືອາຊີ-ເອີຣົບ, ປະກອບ ສ່ວນເຂົ້າໃນການປົກປັກຮັກ ສາສັນຕິພາບ, ສະຖຽນລະ ພາບ, ການຮ່ວມມື ແລະ ພັດທະ ນາ ໃນພາກພື້ນ ແລະ ໃນໂລກ; ເພີ່ມທະວີການປະສານສົມ ທົບກັບ ກໍາປູເຈຍ ຈັດຕັ້ງປະຕິບັດບັນດາຂໍ້ຕົກລົງໃນກົນໄກການ ຮ່ວມມືເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດ ນາມ (CLV) ທີ່ລົງນາມ ໂດຍນາ ຍົກລັດຖະມົນຕີຂອງສາມປະ ເທດ, ຕັ້ງໜ້າຜັນຂະຫຍາຍແຜນປະຕິບັດງານ ວ່າດ້ວຍ ການເຊື່ອມຈອດເສດຖະກິດ ກໍາປູເຈຍ-ລາວ-ຫວຽດນາມຮອດປີ 2030.
ສອງຝ່າຍ ເປັນເອກະພາບກັນໃນການສືບຕໍ່ເພີ່ມທະວີ ການຮ່ວມມື, ປະສານສົມທົບ ກັນຢ່າງແໜ້ນແຟ້ນ ແລະ ປະ ສານສົມທົບກັບບັນດາປະເທດ, ບັນດາອົງການຈັດຕັ້ງສາກົນທີ່ ກ່ຽວຂ້ອງ ເພື່ອຄຸ້ມຄອງ, ພັດ ທະນາ, ນຳໃຊ້ແມ່ນໍ້າຂອງ ແລະ ຊັບພະຍາກອນທໍາມະຊາດທີ່ກ່ຽວຂ້ອງແບບຍືນຍົງ ແລະ ມີປະສິດທິຜົນ ເພື່ອຮັບປະກັນຜົນປະໂຫຍດຂອງບັນດາປະເທດທີ່ນໍາໃຊ້ແມ່ນໍ້າຂອງຢ່າງສົມເຫດສົມຜົນ;ສອງຝ່າຍ ຮ່ວມກັນປະສານສົມທົບຢ່າງແໜ້ນແຟ້ນໃນກອບຄະນະກໍາມະການແມ່ນໍ້າຂອງສາກົນ ແລະ ບັນດາກົນໄກການຮ່ວມມືອື່ນໆທີ່ກ່ຽວຂ້ອງ; ຊຸກຍູ້ເພີ່ມທະວີ ການຮັດແໜ້ນບັນດາກົນໄກຮ່ວມມືອະນຸພາກພື້ນກັບຂະບວນການສ້າງປະຊາຄົມອາຊຽນ; ຊຸກຍູ້ບັນດາປະເທດອາຊຽນ ແລະ ຄູ່ຮ່ວມມືຢູ່ນອກຂົງເຂດຕັ້ງໜ້າເຂົ້າຮ່ວມສະໜັບສະໜູນ ແລະ ລົງທຶນຢູ່ອະນຸພາກພື້ນແມ່ນໍ້າຂອງໃນບັນດາຂົງເຂດທີ່ສໍາຄັນເຊັ່ນ: ການເຊື່ອມໂຍງໂຄງລ່າງ, ພະລັງງານ, ກໍ່ສ້າງຊັບພະຍາກອນມະນຸດ.
ສອງຝ່າຍ ເນັ້ນໜັກຄວາມສຳຄັນຂອງການປົກປັກຮັກສາສັນຕິພາບ, ສະຖຽນລະພາບ, ຮັບປະກັນຄວາມສະຫງົບ, ຄວາມປອດໄພ, ເສລີພາບໃນການເດີນເຮືອ ແລະ ບິນຜ່ານຢູ່ ທະເລຈີີນໃຕ້ (ຫວຽດນາມ ເອີ້ນວ່າ: ທະເລຕາເວັນອອກ), ແກ້ໄຂບັນດາຂໍ້ຂັດແຍ່ງໃນທະເລຈີນໃຕ້ ໂດຍສັນຕິວິທີບົນພື້ນຖານກົດໝາຍສາກົນ, ລວມທັງສົນທິສັນຍາຂອງສະຫະປະຊາຊາດວ່າດ້ວຍກົດໝາຍທະເລ (UNCLOS) ປີ 1982, ຮ່ວມກັບບັນດາຝ່າຍທີ່ກ່ຽວຂ້ອງຊຸກຍູ້ປະຕິບັດຖະແຫຼງການ ວ່າດ້ວຍການປະພຶດຂອງບັນດາຝ່າຍທີ່ກ່ຽວຂ້ອງຢູ່ທະເລຈີນໃຕ້ (DOC) ຢ່າງຄົບຖ້ວນ, ມີປະສິດທິພາບ ແລະ ບັນລຸການສ້າງກົດແຫ່ງການປະພຶດຂອງບັນດາຝ່າຍຢູ່ທະເລຈີນໃຕ້ (COC) ທີ່ມີປະສິດທິພາບ ແລະ ມີເນື້ອໃນ, ສອດຄ່ອງກັບກົດ ໝາຍສາກົນ, ລວມທັງສົນທິສັນຍາ ວ່າດ້ວຍກົດໝາຍທະເລ (UNCLOS) ປີ 1982. ສອງຝ່າຍ ຢືນຢັນຄືນ ແລະ ເປັນເອກະພາບສູງ ຕໍ່ບັນດາທັດສະນະພື້ນຖານຂອງອາຊຽນ ກ່ຽວກັບບັນຫາທະເລຈີນໃຕ້ ທີ່ໄດ້ລະບຸຢູ່ໃນຖະແຫຼງການອາຊຽນ, ໂດຍສະເພາະແມ່ນ ຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 53 ແລະ ຜົນກອງປະຊຸມສຸດຍອດອາຊຽນ ຄັ້ງທີ 37.
9. ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະ ເທດ ແລະ ສະຫາຍ ຫງວຽນຝູຈ້ອງ ເລຂາທິການໃຫຍ່ ໄດ້ເປັນສັກຂີພິ ຍານໃນພິທີເຊັນບັນດາເອກະສານການຮ່ວມມື ລະຫວ່າງສອງປະເທດ, ໃນນັ້ນມີ ຂໍ້ຕົກລົງວ່າດ້ວຍຍຸດທະສາດຮ່ວມມືສອງຝ່າຍ ລາວ-ຫວຽດນາມ ໄລຍະ 2021-2030; ສັນຍາຮ່ວມມືສອງຝ່າຍ ລາວ-ຫວຽດນາມ ໄລຍະ 2021-2025; ຂໍ້ຕົກລົງວ່າດ້ວຍການຮ່ວມມື ລະຫວ່າງຫ້ອງວ່າການສູນກາງພັກປະຊາຊົນ ປະຕິວັດລາວ ແລະ ຫ້ອງວ່າການສູນກາງພັກກອມມູນິດ ຫວຽດນາມ ໄລຍະ 2021-2025; ຂໍ້ຕົກລົງວ່າດ້ວຍການຮ່ວມມື ລະຫວ່າງຄະນະກໍາມະການສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງພັກກອມມູນິດ ຫວຽດນາມ ໄລຍະ 2021-2025; ຂໍ້ຕົກລົງວ່າດ້ວຍການຮ່ວມມືລະ ຫວ່າງ ກະຊວງແຜນການ ແລະ ການລົງທຶນລາວ ແລະ ກະຊວງແຜນການ ແລະ ການລົງທຶນຂອງຫວຽດນາມ ໄລຍະ 2021-2023; ບົດບັນທຶກການຮ່ວມມື ລະຫວ່າງ ສອງກະຊວງຖະແຫຼງຂ່າວ ລາວ ແລະ ຫວຽດນາມ ໄລຍະ 2021-2025; ແຜນການຮ່ວມມືວັດທະນະທໍາ, ສິລະປະ ແລະ ທ່ອງທ່ຽວ ລະຫວ່າງ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວລາວ ແລະ ກະຊວງວັດທະນະທໍາ, ກິລາ ແລະ ທ່ອງທ່ຽວ ຫວຽດນາມ ໄລຍະ 2021-2025 ແລະ ບາງສັນຍາເສດຖະກິດລະຫວ່າງ ວິສາຫະກິດ ລາວ ແລະ ຫວຽດນາມ.
10. ສອງຝາຍ ຕີລາຄາສູງຜົນສໍາເລັດອັນຈົບງາມ ແລະ ມີຄວາມໝາຍປະຫວັດສາດຂອງການຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການຂອງ ສະຫາຍ ທອງລຸນ ສີສຸລິດ ເລຂາທິ ການໃຫຍ່ ປະທານປະເທດ ແຫ່ງ ສປປ ລາວ ໄດ້ປະກອບສ່ວນເຮັດໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບມື້ຍິ່ງຂະຫຍາຍຕົວກ້າວເຂົ້າສູ່ລວງເລິກ, ແທດເໝາະກັບສະພາບການຕົວຈິງ ແລະ ມີປະສິດທິຜົນ, ສາມາດຕອບສະໜອງຄວາມມຸ່ງມາດປາຖະໜາຂອງປະຊາຊົນສອງຊາດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.
ສະຫາຍ ທອງລຸນ ສີສຸລິດ ເລ ຂາທິການໃຫຍ່ ປະທານປະເທດ ພ້ອມດ້ວຍພັນລະຍາ ໄດ້ເຊື້ອເຊີນ ສະຫາຍ ຫງວຽນຝູຈ້ອງ ເລຂາທິການໃຫຍ່ ພ້ອມດ້ວຍພັນລະຍາ, ສະຫາຍ ຫງວຽນຊວັນຟຸກ ປະທານປະເທດ ພ້ອມດ້ວຍພັນລະຍາ, ເຊື້ອເຊີນບັນດາສະຫາຍການນຳຂັ້ນສູງພັກ, ລັດ ຫວຽດນາມ ມາຢ້ຽມຢາມທາງການ ສປປ ລາວ ຢ່າງເປັນທາງການ. ສະຫາຍ ຫງວຽນຝູຈ້ອງ ເລຂາທິການໃຫຍ່, ສະຫາຍ ຫງວຽນຊວັນຟຸກ ປະທານປະເທດ ແລະ ບັນດາສະຫາຍການນຳຂັ້ນສູງ ພັກ, ລັດ ຫວຽດນາມ ໄດ້ສະແດງຄວາມຂອບໃຈ ແລະ ຕອບຮັບຄໍາເຊື້ອເຊີນດ້ວຍຄວາມປິຕິຍິນດີ; ວັນເວລາລະອຽດຂອງການຢ້ຽມຢາມຈະໄດ້ກະກຽມ ແລະ ແຈ້ງຜ່ານທາງການທູດ.