ໜັງສືພິມ ປະຊາຊົນ

ຫົວຂໍ້ : ປະຫວັດແຫ່ງການກໍາເນີດຂອງກໍາລັງປ້ອງກັນຄວາມສະຫງົບປະຊາຊົນລາວ

ເຜີຍແຜ່ໂດຍ: ວິໄລສັກ ເວລາ: 27/03/2023 16:45:16 ຈຳນວນຜູ້ເຂົ້າຢ້ຽມຊົມ 5785 ຄັ້ງ

ເນື່ອໃນໂອກາດ ວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນລາວ (5 ເມສາ 1961-5 ເມສາ 2023) ຄົບຮອບ 62 ປີ

ວັນທີ 13 - 17 ສິງຫາ 1950 ຢູ່ເຂດທີ່ໝັ້ນປະຕິບັດ ກອງປະຊຸມໃຫຍ່ແນວລາວຕໍ່ຕ້ານທົ່ວປະເທດໄດ້ເປີດຂຶ້ນຢ່າງເປັນທາງການ. ກອງຊຸມໄດ້ຕົກລົງສ້າງຕັ້ງແນວລາວອິດສະຫຼະ ແລະ ສ້າງຕັ້ງລັດຖະບານລາວຕໍ່ຕ້ານຂຶ້ນ ຊຶ່ງປະກອບກົງຈັກການຈັດຕັ້ງ 5 ກະຊວງ, ໃນນັ້ນມີ ກະຊວງພາຍໃນ, ໂດຍແມ່ນ ທ່ານ ພູມີ ວົງວິຈິດ ເປັນລັດຖະເສນາ (ລັດຖະມົນຕີວ່າການ). ເວລານັ້ນມີພຽງແຕ່ຊື່ກະຊວງ ເພື່ອຕໍ່ລອງກັບຝ່າຍກົງກັນຂ້າມສ່ວນກໍາລັງຕົວຈິງແມ່ນບໍ່ທັນມີ.

ລະດູຝົນປີ 1954 ໄດ້ເຕົ້າໂຮມ 2 ແຂວງ: ຫົວພັນ ແລະ ຜົ້ງສາລີ, ເພື່ອປົກປັກຮັກສາອົງການ ນໍາຂອງພັກ, ອຳນາດການປົກຄອງປະຕິວັດຢູ່ 2 ແຂວງເຕົ້າໂຮມໄດ້ຕົກລົງຈັດຕັ້ງ ກໍາລັງປ້ອງກັນຂຶ້ນ.

ວັນທີ 10 ຕຸລາ 1954 ເນື່ອງໃນໂອກາດສະເຫຼີມສະຫຼອງວັນປະກາດເອກະລາດ 12 ຕຸລາ ຄົບຮອບ 9 ປີ, ສະເຫຼີມສະຫຼອງໄຊຊະນະໃຫຍ່ ໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ ຊົມເຊີຍຜົນສໍາເລັດໃນການເຕົ້າໂຮມ 2 ແຂວງ ທ່ານປະທານ ໄກສອນ ພົມວິຫານ ໄດ້ປະກາດສ້າງຕັ້ງ ຄະນະສັນຕິລາດສູນກາງ ຢ່າງເປັນທາງການຢູ່ບ້ານເລີຍ ຕາແສງເມືອງໂສຍ ແຂວງຫົວພັນ ຊຶ່ງມີກໍາລັງພົນ 35 ສະຫາຍ ໂດຍພາຍໃຕ້ການຊີ້ນໍາ - ບັນຊາໂດຍກົງຂອງ ທ່ານ ພູມີ ວົງວິຈິດ ຊຶ່ງເຮັດໜ້າທີ່ຕົ້ນຕໍຄື: ປ້ອງກັນຄະນະກໍາມະການກວດກາສາກົນ (ອິນເດຍ, ການາດາ ແລະ ໂປໂລຍ) ໃຫ້ມີຄວາມປອດໄພ; ປົກປັກຮັກສາອົງການນໍາຂອງພັກ-ລັດ; ສືບ ແລະ ກໍາສະພາບເປົ້າໝາຍສັດຕູ, ພວກຕ້ອງໂທດຄະດີອາຍາ; ປຸກລຸກຂົນຂວາຍ ແລະ ກໍ່ສ້າງຮາກຖານຢູ່ໃນຕົວເມືອງ.

ປີ 1957 ເພື່ອກຽມໃຫ້ແກ່ການປ້ອງກັນຜູ້ນໍາທີ່ເຂົ້າຮ່ວມລາວຄັ້ງທີ I ສູນກາງພັກ ໄດ້ຕົກລົງ ປ່ຽນຊື່ຈາກ ຄະນະສັນຕິລາດສູນກາງ ມາເປັນ ຄະນະປ້ອງກັນພາຍໃນ ເພື່ອເຮັດໜ້າທີ່ປ້ອງກັນ ລັດຖະບານປະສົມ ຄັ້ງທີ 1.

ວັນທີ 5-12 ເມສາ 1961 ຄະນະຊີ້ນໍາສູນກາງພັກປະຊາຊົນລາວ ໄດ້ເປີດກອງປະຊຸມຄົບຄະນະຂຶ້ນ ທີ່ຄັງໄຂ ແຂວງຊຽງຂວາງ.

ກອງປະຊຸມໄດ້ຕົກລົງປ່ຽນຊື່ ຄະນະປ້ອງກັນພາຍໃນ ມາເປັນ ຫ້ອງການປ້ອງກັນຄວາມສະຫງົບສູນກາງ ຊີ້ນຳ ໂດຍ ທ່ານ ສີສົມພອນ ລໍວັນໄຊ ແລະ ມອບໃຫ້ ທ່ານ ຊົມຊື່ນ ຄໍາພິທູນ ເປັນຜູ້ນໍາພາ - ບັນຊາຕົວຈິງ. ທ້າຍປີ 1961 ແມ່ນ ທ່ານ ຊົມຊື່ນ ຄໍາພິທູນ ເປັນຫົວໜ້າ ແລະ ທ່ານ ບຸນມາ ມີທອງ ເປັນຮອງ.

ວັນທີ 1 ກັນຍາ 2005 ລັດຖະບານໄດ້ຕົກລົງ ແລະ ອອກດໍາລັດສະບັບເລກທີ 277/ນຍ ຮັບຮອງເອົາວັນທີ 5 ເມສາ 1961 ເປັນມື້ສ້າງຕັ້ງກໍາລັງປ້ອງກັນຄວາມສະຫງົບ ຢ່າງເປັນທາງການ.