ຫົວ​ຂໍ້ : ພັກ ປະເທດເພື່ອນມິດ ອວຍພອນ ວັນສ້າງຕັ້ງພັກ ປປ ລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 23/03/2020 08:41:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 946 ຄັ້ງ

  ເນື່ອງ​ໃນ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 65 ປີ (22 ມີ​ນາ 1955-22 ມີ​ນາ 2020) ບັນດາພັກ​ປະເທດ​ເພື່ອນ​ມິດ​ ໄດ້​ສົ່ງ​ສານ​ອວຍພອນເຖິງ ຄະນະ​ບໍລິຫານ​ງານ​ສູນ​ກາງ​ພັກ ປປ ລາວ ​ຊຶ່ງປະກອບ​ມີ: 
  + ພັກ​ກອມ​ມູ​ນິດ​ຫວຽດນາມ, ມີ​ເນື້ອ​ໃນ​ດັ່ງ​ນີ້:
  ເນື່ອງ​ໃນ​ໂອກາດ​ສະເຫຼີມສະຫຼອງ​ວັນ​ສ້າງຕັ້ງ​ພັກ​ປະຊາຊົນ ປະຕິວັດ​ລາວ ຄົບຮອບ 65 ປີ (22 ມີ​ນາ 1955-22  ມີ​ນາ 2020)  ຕາງໜ້າ​ພັກ​ກອມ​ມູ​ນິດ ຫວຽດນາມ ແລະ ປະຊາຊົນ ຫວຽດນາມ, ພວກ​ຂ້າພະເຈົ້າ​ຂໍ​ສົ່ງ​ມິດ​ຈິດ​ມິດ​ໃຈ ຖານ​ສະຫາຍ​ອ້າຍ​ນ້ອງ ທີ່​ສະໜິດສະໜົມ ແລະ ຄໍາ​ອວຍພອນ​ອັນ​ອົບ​ອຸ່ນ​ທີ່​ສຸດ ມາ​ຍັງ​ຄະນະ​ບໍລິຫານ​ງານ​ສູນ​ກາງ​ພັກ, ພະນັກງານ, ສະ​ມາ​ຊິກ​ພັກ​ປະຊາຊົນ ປະຕິວັດ​ລາວ ແລະ ປະຊາຊົນ​ລາວ ທຸກ​ຖ້ວນ​ໜ້າ.
  ຕະຫຼອດ​ໄລຍະ 65 ປີ ທີ່​ຜ່ານ​ມາ ພາຍ​ໃຕ້​ການ​ນໍາ​ພາ​ອັນ​ສະຫຼາດ​ສ່ອງ​ໃສ​ຂອງ​ພັກ​ປະຊາຊົນ ປະຕິວັດ​ລາວ, ປະຊາຊົນ​ລາວ ອ້າຍ​ນ້ອງ ໄດ້​ຜ່ານ​ຜ່າ​ຄວາມ​ຫຍຸ້ງຍາກ, ສິ່ງ​ທົດ​ສອບ​ນາໆ​ປະການ, ຍາດ​ໄດ້​ໄຊຊະນະ​ອັນ​ໃຫຍ່​ຫຼວງ, ມີ​ຄວາມ​ໝາຍ​ປະຫວັດສາດ​ໃນ​ພາລະກິດ​ການ​ຕໍ່ສູ້​ປົດ​ປ່ອຍ​ຊາດ, ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ. ພິເສດ, ພາຍຫຼັງ 35 ປີ​ແຫ່ງ​ການຈັດຕັ້ງ​ປະຕິບັດ​ແນວທາງ​ ການ​ປ່ຽນແປງ​ໃໝ່ ໂດຍ​ແມ່ນ​ພັກ​ປະຊາຊົນ ປະຕິວັດ​ລາວ ເປັນ​ຜູ້​ລິ​ເລີ່ມ ແລະ ນໍາ​ພາ, ປະຊາຊົນ​ລາວ ອ້າຍ​ນ້ອງ ສາມາດ​ຍາດ​ໄດ້​ບັນດາ​ຜົນ​ສໍາ​ເລັດ​ອັນ​ໃຫຍ່​ຫຼວງ,  ຮອບດ້ານ,  ມີ​ຄວາມ​ໝາຍ​ປະຫວັດສາດ: ການ​ເມືອງ​-​ສັງຄົມ ມີ​ຄວາມ​ສະຫງົບ​ສຸກ, ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ, ຊີວິດ​ການ​ເປັນ​ຢູ່​ຂອງ​ປະຊາຊົນ ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ; ວຽກ​ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ​ມີ​ຄວາມ​ໜັກ​ແໜ້ນ, ການ​ພົວພັນ​ຕ່າງປະເທດ ໄດ້​ຮັບ​ການ​ເປີດ​ກວ້າງ, ບົດບາດ ແລະ ອິດ​ທິ​ພົນ​ຂອງ​ພັກ​ປະຊາຊົນ ປະຕິວັດ​ລາວ ແລະ ປະເທດ​ສາທາລະນະ​ລັດ ປະຊາທິປະໄຕ ປະຊາຊົນ​ລາວ ນັບ​ມື້​ຍິ່ງ​ໄດ້​ຮັບ​ການ​ຍົກ​ສູງ​ຂຶ້ນ​ໃນ​ເວທີ​ສາ​ກົນ.
ພັກ​ກອມ​ມູ​ນິດ ຫວຽດນາມ ແລະ ປະຊາຊົນ ຫວຽດນາມ ມີ​ຄວາມ​ປິ​ຕິ​ຍິນດີ​ເປັນ​ຢ່າງ​ຍິ່ງ, ຕີ​ລາຄາ​ສູງ ແລະ ຊົມເຊີຍ​ຕໍ່​ບັນດາ​ຜົນ​ສໍາ​ເລັດ ແລະ ໄຊຊະນະ​ອັນ​ໃຫຍ່​ຫຼວງ​ທີ່​ພັກ​ປະຊາຊົນ ປະຕິວັດ​ລາວ ຍາດ​ໄດ້​ຕະຫຼອດ​ໄລຍະ​ທີ່​ຜ່ານ​ມາ​ຢ່າງ​ສຸດ​ໃຈ. ບັນດາ​ຜົນ​ສໍາ​ເລັດ​ຂອງ​ພັກ​ປະຊາຊົນ ປະຕິວັດ​ລາວ ບໍ່​ພຽງ​ແຕ່​ມີ​ຄວາມ​ໝາຍ​ເລິກເຊິ່ງ ຕໍ່​ກັບ​ພາລະກິດ​ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ລາວ ເທົ່າ​ນັ້ນ ແຕ່​ຍັງ​ເປັນ​ການ​ປຸກ​ລະ​ດົມ​ກໍາ​ລັງ​ໃຈ​ອັນ​ແຮງ​ກ້າ​ຕໍ່​ພັກ, ລັດ ແລະ ປະຊາຊົນ ຫວຽດນາມ ໃນ​ພາລະກິດ​ການ​ປ່ຽນແປງ​ໃໝ່, ໃນ​ການ​ສ້າງສາ ແລະ ປົກ​ປັກ​ຮັກສາ​ປະເທດ​ຊາດ​ຂອງ​ຕົນ.
  ພວກ​ຂ້າພະເຈົ້າ ເຊື່ອ​​ໝັ້ນ​ວ່າ ດ້ວຍ​ການ​ເສີມ​ຂະຫຍາຍ​ມູນເຊື້ອ​ອັນ​ສະຫງ່າ​ງາມ ແລະ ຜົນ​ສໍາ​ເລັດ​ທີ່​ຍາດ​ມາ​ໄດ້​ນັ້ນ, ພັກ, ລັດ ແລະ ປະຊາຊົນ​ລາວ ອ້າຍ​ນ້ອງ ຈະ​ສືບຕໍ່​ຍາດ​ໄດ້​ບັນດາ​ຜົນ​ສໍາ​ເລັດໃໝ່​ໃຫຍ່​ຫຼວງ​ກວ່າ​ເກົ່າ​ໃນ​ພາລະກິດ​ການ​ປ່ຽນແປງ​ໃໝ່, ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ​ປະຊາຊົນ ປະຕິວັດ​ລາວ ຢ່າງ​ມີ​ໄຊ, ດໍາ​ເນີນ​ກອງ​ປະຊຸມ​ໃຫຍ່​ອົງຄະ​ນະ​ພັກ​ຂອງ​ແຕ່​ລະ​ຂັ້ນ ເພື່ອ​ກ້າວ​ເຖິງ​ການ​ຈັດ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງ​ທີ XI ຂອງ​ພັກ ໃນ​ຕົ້ນ​ປີ 2021 ຢ່າງ​ມີ​ຜົນ​ສໍາ​ເລັດ, ສ້າງ​ປະເທດ​ລາວ ສັນຕິພາບ, ເອກະລາດ, ປະຊາທິປະໄຕ, ເອກະ​ພາບ ແລະ ວັດທະນາ​ຖາວອນ ຕາມ​ຈຸດໝາຍ​​ສັງຄົມ​ນິຍົມ.
  ພວກ​ຂ້າພະເຈົ້າ ມີ​ຄວາມ​ປິ​ຕິ​ຍິນດີ​ເປັນ​ຢ່າງ​ຍິ່ງ ເມື່ອ​ເຫັນ​ວ່າ ຄຽງ​ຄູ່​ກັບ​ບັນດາ​ຜົນ​ສໍາ​ເລັດ​ອັນ​ສໍາ​ຄັນ​ທີ່​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ  ຍາດ​ມາ​ໄດ້​ໃນ​ໄລຍະ​ຜ່ານ​ມາ​ນັ້ນ, ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ແບບ​ພິເສດ, ບໍລິສຸດ, ຜຸດ​ຜ່ອງ, ການ​ຮ່ວມ​ມື​ຮອບດ້ານ ລະ ຫວ່າງ ຫວຽດນາມ​-​ລາວ ໂດຍ​ມີ​ປະທານ​ໂຮ່​ຈິ​ມິນ ຜູ້​ຍິ່ງ​ໃຫຍ່ ແລະ ປະທານ​ໄກສອນ ພົມວິຫານ, ປະທານ ສຸພາ​ນຸ​ວົງ ທີ່​ແສນ​ເຄົາລົບ​ຮັກ ໄດ້​ກໍ່​ຕັ້ງ, ຝຶກ​ຝົນ​ຫຼໍ່​ຫຼອມ ແລະ ໄດ້​ຮັບ​ການ​ເພີ່ມ​ພູນ​ຄູນ​ສ້າງ​ຈາກ​ບັນດາ​ຮຸ່ນ​ການ​ນຳ​ຂອງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ​ນັ້ນ​ໄດ້​ຮັບ​ການ​ເສີມ​ຂະຫຍາຍ ຢ່າງ​ບໍ່​ຢຸດ​ຢັ້ງ ແລະ ໄດ້​ຮັບ​ການ​ພັດທະນາ​ເຂົ້າ​ສູ່​ລ່ວງ​ເລິກ, ແທດ​ຕົວ​ຈິງ ແລະ ມີ​ປະສິດ​ທິ​ຜົນ​ໃນ​ທຸກ​ຂົງເຂດ, ປະກອບສ່ວນ​ເຂົ້າ​ໃນ​ພາລະກິດ​ການ​ປ່ຽນແປງ​ໃໝ່, ປົກ​ປັກ​ຮັກສາ ແລະ ສ້າງສາ​ພັດທະນາ​ຢູ່​ແຕ່​ລະ​ປະ​ເທດ.
  ໃນ​ໂອກາດ​ມີ​ຄວາມ​ໝາຍ​ສໍາ​ຄັນ​ນິີ້, ພວກ​ຂ້າພະເຈົ້າ ຂໍ​ສະແດງ​ຄວາມ​ຮູ້​ບຸນຄຸນ​ຢ່າງ​ເລິກເຊິ່ງ​ຕໍ່​ການ​ສະໜັບສະໜູນ, ການ​ຊ່ວຍເຫຼືອ​ອັນ​ໃຫຍ່​ຫຼວງ, ລໍ້າ​ຄ່າ, ໝົດ​ຈິດ​ໝົດ​ໃຈ  ແລະ  ມີ​ປະສິດ​ທິ​ຜົນ​ທີ່​ພັກ, ລັດ ແລະ ປະຊາຊົນ​ລາວ ອ້າຍ​ນ້ອງ ໄດ້​ມອບ​ໃຫ້​ພັກ, ລັດ ແລະ  ປະຊາຊົນ ຫວຽດນາມ ຕະຫຼອດ​ໄລຍະ​ແຫ່ງ​ຂະບວນ​ການ​ຕໍ່ສູ້​ປົດ​ປ່ອຍປະ​ເທດ​ຊາດ ກໍຄື​ພາລະກິດການ​ປ່ຽນແປງ​ໃໝ່, ສ້າງສາ​ພັດທະນາ, ປົກ​ປັກ​ຮັກສາ​ປະເທດ​ຊາດ ໃນ​ປັດ​ຈຸ​ບັນ. ພັກ, ລັດ ແລະ ປະຊາຊົນ ຫວຽດນາມ ຈະ​ເຮັດ​ສຸດ​ຄວາມ​ສາມາດ​ຂອງ​ຕົນ​ຮ່ວມ​ ກັບ​ພັກ, ລັດ ແລະ ປະຊາຊົນ​ລາວ ປົກ​ປັກ​ຮັກສາ ແລະ ເພີ່ມ​ພູນ​ຄູນ​ສ້າງ​ສາຍ​ພົວພັນ​ ຄວາມ​ສາມັກຄີ​ພິເສດ ຫວຽດນາມ​-​ລາວ ໃຫ້​ນັບ​ມື້​ນັບ​ພັດທະນາ​ຂຶ້ນ​ສູ່​ລະດັບ​ສູງ​ອັນໃໝ່​ຢ່າງ​ບໍ່​ຢຸດ​ຢັ້ງ ເພື່ອ​ຜົນ​ປະໂຫຍດ ​ຂອງ ​ປະຊາຊົນ ແຕ່​ລະ​ປະເທດ ເພື່ອ​ສັນຕິພາບ, ສະ​ຖຽນ​ລະ​ພາບ, ການ​ຮ່ວມ​ມື ແລະ ການ​ພັດທະນາ​ຢູ່​ພາກ​ພື້ນ ແລະ ໃນ​ໂລກ.
  ອວຍພອນ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ແບບ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ,  ສອງ​ລັດ ແລະ ປະຊາຊົນ​ສອງ​ຊາດ ຫວຽດນາມ​-​ລາວ ຈົ່ງ​ສວຍ​ສົດ​ງົດ​ງາມ ແລະ ​ໝັ້ນ​ຄົງ​ຂະ​​ໜົງ​ແກ່ນ​ຕະຫຼອດ​ກາລະ​ນານ”.
  ໃນ​ໂອກາດ​ດຽວ​ກັນ​ນີ້, ສະຫາຍ ຮ່ວງ ບິ່ງ ກວັນ ກໍາ​ມະ​ການ​ສູນ​ກາງ​ພັກ ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ​ກອມ​ມູ​ນິດ ຫວຽດນາມ ກໍໄດ້​ສົ່ງ​ສານ​ອວຍພອນເຖິງ ສະຫາຍ ນາງ ສູນ​ທອນ ໄຊ​ຍະ​ຈັກ ກໍາ​ມະ​ການ​ສູນ​ກາງ​ພັກ, ຫົວໜ້າ​ຄະນະ​ພົວພັນ​ຕ່າງປະເທດ​ສູນ​ກາງ​ພັກ​ປະຊາຊົນ ປະຕິວັດ​ລາວ ເຊັ່ນ​ດຽວ​ກັນ.
  + ພັກ​ກອມ​ມູ​ນິດ​ຈີນ, ມີ​ເນື້ອ​ໃນ​ດັ່​ງນີ້:
  ເນື່ອງ​ໃນ​ໂອກາດ​ວັນ​ສ້າງຕັ້ງ ພັກ​ປະຊາຊົນ​ປະຕິວັດ​ລາວ ຄົບຮອບ 65 ປີ, ພວກ​ຂ້າພະເຈົ້າ​ຕາງໜ້າ​ພັກ​ກອມ​ມູ​ນິດ​ຈີນ ແລະ ປະຊາຊົນ​ຈີນ ຂໍ​ສະແດງ​ຄວາມ​ຊົມເຊີຍ​ຢ່າງ​ສຸດ​ອົກ​ສຸດ​ໃຈ ມາ​ຍັງ ພັກ​ປະຊາຊົນ​ປະຕິວັດ​ລາວ ແລະ ປະຊາຊົນ​ລາວ​ອ້າຍ​ນ້ອງ​ທຸກ​ຖ້ວນ​ໜ້າ.
  65 ປີ ທີ່​ຜ່ານ​ມາ ພັກ​ປະຊາຊົນ​ປະຕິວັດ​ລາວ ໄດ້​ນຳພາ​ປະຊາຊົນ​ລາວ ສາມັກຄີ​ເປັນ​ປຶກ​ແຜ່ນ​ປະສົບ​ຜົນສຳເລັດ​ການ​ຕໍ່ສູ້​ປົດ​ປ່ອຍ​ຊາດ ແລະ ຍາດ​​ເອົາ​ເອກະລາດ​ຂອງ​ປະເທດ​ຊາດ, ບັນລຸ​ໄດ້​ໝາກຜົນ​ສະຫງ່າ​ງາມ​ຂອງ​ການ​ກໍ່ສ້າງ​ສັງຄົມ​ນິຍົມ ແລະ ປະຕິ​ຮູບ​ໃໝ່. ປັດຈຸບັນ ສປປ ລາວ ມີ​ສະ​​ຖຽນ​ລະ​ພາບ​ທາງ​ດ້ານ​ການເມືອງ​ທີ່​ໜັກ​ແໜ້ນ, ສັງຄົມ​ມີ​ຄວາມ​ເປັນ​ລະບຽບ​ຮຽບຮ້ອຍ, ເສດຖະກິດ​ມີ​ການ​ພັດທະນາ​ຢ່າງ​ຕໍ່​ເນື່ອງ, ຊີວິດ​ການ​ເປັນ​ຢູ່​ຂອງ​ປະຊາຊົນ​ນັບ​ມື້​ປົວແປງ​ດີ​ຂຶ້ນ, ບົດບາດ​ອິດ​ທິ​ພົນ​ໃນ​ເວທີ​ສາກົນ​ນັບ​ມື້​ເພີ່ມ​ຂຶ້ນ​ຢ່າງ​ບໍ່​ຢຸດ​ຢັ້ງ. ໃນ​ຖານະ​ທີ່​ເປັນ​ມິດ​ສະຫາຍ​ກັນ ພວກ​ຂ້າພະເຈົ້າ​ມີ​ຄວາມ​ປິ​ຕິ​ຊົມຊື່ນ​ນຳ​ບັນດາ​ສະຫາຍ​ຢ່າງ​ຈິງ​ໃຈ. ພວກ​ຂ້າພະເຈົ້າ​ເຊື່ອ​ໝັ້ນ​ວ່າ ພາຍ​ໃຕ້​ການ​ຊີ້​ນຳ​ນຳພາ​ຢ່າງ​ເຂັ້ມ​ເ​ເຂ​ງ​ຂອງ ສູນ​ກາງ​ພັກ​ປະຊາຊົນ​ປະຕິວັດ​ລາວ ທີ່​ມີ ສະຫາຍ​ເລຂາທິການ​ໃຫຍ່ ບຸນ​ຍັງ ວໍລະ​ຈິດ ເປັນ​ແກ່ນສານ​ຂອງ​ພັກ ແລະ ປະຊາຊົນ​ລາວ ບັນດາ​ສະຫາຍ ຈະ​ປັບປຸງ​ການ​ນໍາ​ພາ​ຂອງ​ພັກ ໃຫ້​ສົມບູນ ແລະ ຊຸກຍູ້​ພາລະກິດ​ການ​ກໍ່ສ້າງ​ສັງຄົມ​ນິຍົມ ແລະ ພາລະກິດ​ການ​ປ່ຽນແປງ​ໃໝ່​ຢ່າງ​ໜັກ​ແໜ້ນ ເພື່ອ​ຕ້ອນຮັບ​ການ​ເປີດ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ດ້ວຍ​ໝາກຜົນ​ທີ່​ດີ​ເດັ່ນ.
  ພັກ​ກອມ​ມູ​ນິດ​ຈີນ ໃຫ້​ຄວາມ​ສຳຄັນ​ຢ່າງ​ສູງ​ຕໍ່​ການ​ພັດທະນາ​ສາຍ​ພົວພັນ ຈີນ​-​ລາວ. ໃນ​ເດືອນ​ເມສາ 2019 ທີ່​ຜ່ານ​ມາ, ສະຫາຍ ສີ ຈິ້ນ​ຜິງ ເລຂາທິການ​ໃຫຍ່ ຄະນະ​ກຳມະການ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດ​ຈີນ ແລະ ສະຫາຍ  ບຸນ​ຍັງ  ວໍລະ​ຈິດ  ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ປະຕິວັດ​ລາວ ໄດ້​ຮ່ວມ​ກັນ​ລົງ​ນາມ ແຜນ​ແມ່​ບົດ​ວ່າ​ດ້ວຍ​ການ​ສ້າງ​ຄູ່​ຮ່ວມ​ຊາຕາກຳ ຈີນ​-​ລາວ ຊຶ່ງ​ໄດ້​ຊີ້​ນຳ​ທິດ​ທາງ​ໃຫ້​ແກ່​ການ​ເສີມ​ຂະຫຍາຍ​ສາຍ​ພົວພັນ​ສອງ​ປະເທດ​ໃນ​ຍຸກ​ສະໄໝ​ໃໝ່​ຢ່າງ​ຊັດ​ເຈນ. ນັບ​ແຕ່​ເກີດ​ມີ​ການ​ລະບາດ​ຂອງ​ເຊື້ອ​ພະຍາດ​ໂຄ​ວິດ-19 ເປັນຕົ້ນ​ມາ, ພັກ​-​ລັດ ແລະ ປະຊາຊົນ​ລາວ​ທຸກ​ຂະແໜງການ​ໃນ​ສັງຄົມ ໄດ້​ສະແດງ​ຄວາມ​ເຫັນໃຈ​ຕໍ່​ຝ່າຍ​ຈີນ ແລະ ໃຫ້ການ​ຊ່ວຍເຫຼືອ​ທຶນຮອນ ແລະ ວັດຖຸ​ອຸປະກອນ ຊຶ່ງ​ໄດ້​ສະແດງ​ໃຫ້​ເຫັນ​ເຖິງ​ຈິດໃຈ​ແຫ່ງ​ການ​ເປັນ​ຄູ່​ຮ່ວມ​ຊາຕາກຳ​ທີ່​ຮ່ວມ​ລົງ​ເຮືອ​ລຳ​ດຽວ​ກັນ ມີ​ການ​ຊ່ວຍເຫຼືອ​ຊຶ່ງ​ກັນ ແລະ ກັນ.
  ພັກ​ກອມ​ມູ​ນິດ​ຈີນ​ຍິນ​ດີ​ຈະ​ຮ່ວມ​ກັບ​ພັກ​ປະຊາຊົນ​ປະຕິວັດ​ລາວ ຈັດ​ຕັ້ງ​ປະຕິບັດ​ຂໍ້​ຕົກລົງ​ສຳຄັນ​ຂອງ​ສະຫາຍ​ເລຂາທິການ​ໃຫຍ່​ສອງ​ພັກ​ໃຫ້​ດີ ພ້ອມ​ກັນ​ສົ່ງເສີມ​ການ​ເ​ເລກ​ປ່ຽນ​ດ້ານ​ຍຸດທະສາດ, ເພີ່ມ​ທະວີ​ຄວາມ​ເຂົ້າໃຈ​ກັນ​ດ້ານ​ການເມືອງ, ລົງ​ເລິກ​ການ​ແລກປ່ຽນ ກ່ຽວ​ກັບ​ບົດຮຽນ​ດ້ານ​ການ​ຄຸ້ມ​ຄອງ​ພັກ​-​ບໍລິຫານ​ລັດ, ເສີມ​ຂະຫຍາ​ຍ​ການ​ຮ່ວມ​ມື​ທີ່​ເປັນ​ຮູບ​ປະ​ທຳ​ໃນ​ທຸກ​ຂະແໜງການ ແລະ ການ​ຊຸກຍູ້​ສ້າງ​ຄູ່​ຮ່ວມ​ຊາຕາກຳ ຈີນ​-​ລາວ, ຊຸກຍູ້​ພາລະກິດ​ສັງຄົມ​ນິຍົມ​ຂອງ​ສອງ​ປະເທດ​ໃຫ້​ມີ​ຄວາມ​ຄືບ​ໜ້າ​ໃໝ່ ແລະ ປະກອບສ່ວນ​ອັນ​ໃໝ່ ແລະ ໃຫຍ່​ຫຼວງ​ກວ່າ​ເກົ່າ​ເຂົ້າ​ໃນ​ພາລະກິດ​ແຫ່ງ​ຄວາມ​ກ້າວໜ້າ​ຂອງ​ມວນ​ມະ​ນຸດ.
  ຂໍ​ອວຍພອນ​ໃຫ້​ພາລະກິດ​ການ​ສ້າງ​ສັງຄົມ​ນິຍົມ ແລະ ປະຕິ​ຮູບ​ໃໝ່ ທີ່​ນຳພາ​ໂດຍ​ພັກ​ປະຊາຊົນ​ປະຕິວັດ​ລາວ ປະສົບ​ຜົນສຳເລັດ​ອັນ​ໃໝ່ ແລະ ໃຫຍ່​ຫຼວງ​ຍິ່ງໆ​ຂຶ້ນ​ໄປ.
  ຂໍ​ອວຍພອນ​ມິດຕະພາບ​ອັນ​ເປັນ​ມູນເຊື້ອ​ລະຫວ່າງ​ສອງ​ປະເທດ ຈີນ​-​ລາວ ສືບຕໍ່​ເສີມ​ຂະຫຍາຍ​ຕະຫຼອດ​ໃນ​ແຕ່​ລະ​ໄລຍະ ແລະ ໝັ້ນຄົງ​​ຂະ​ໜົງ​ແກ່ນ​ເລື້ອຍໆ​ໄປ.
  + ພັກ​ແຮງ​ງານ​ເກົາຫຼີ, ມີ​ເນື້ອ​ໃນ​ດັ່​ງນີ້:
  ເນື່ອງ​ໃນ​ໂອກາດ​ສະເຫຼີມສະຫຼອງ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ​ຄົບຮອບ 65 ປີ (22 ມີ​ນາ 1955-22 ມີ​ນາ 2020) ຕາງໜ້າ​ໃຫ້​ພັກ​ແຮງ​ງານ​ເກົາຫຼີ ແລະ ປະຊາຊົນ ສປປ ເກົາຫຼີ, ພວກ​ຂ້າພະເຈົ້າ ຂໍ​ສົ່ງ​ມິດຈິດ​ມິດ​ໃຈ​ຖານ​ສະຫາຍ​ອ້າຍ​ນ້ອງ ທີ່​ຮ່ວມ​ອຸດົມ​ການ​ດຽວ​ກັນ ແລະ ຄຳ​ອວຍພອນ​ອັນ​ອົບ​ອຸ່ນ​ທີ່​ສຸດ ມາ​ຍັງ​ຄະນະ​ບໍລິຫານ​ງານ​ສູນ​ກາງ​ພັກ, ພະນັກງານ, ສະມາຊິກ​ພັກ​ປະຊາຊົນ​ປະຕິວັດ​ລາວ ແລະ ປະຊາຊົນ​ລາວ​ທຸກ​ຖ້ວນ​ໜ້າ.
  ຕະຫຼອດ​ໄລຍະ 65 ປີຜ່ານມາ ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໄສ​ຂອງ​ພັກ​ປະຊາຊົນ​ປະຕິວັດ​ລາວ, ປະຊາຊົນ​ລາວ ອັນ​ມີ​ປະທານ  ​ໄກສອນ ພົມວິຫານ  ຜູ້ນຳ​ທີ່​ແສນ​ເຄົາລົບ​ຮັກ​ຂອງ​ປະຊາຊົນ​ລາວ​ບັນດາເຜົ່າ ເປັນ​ ຜູ້ນຳ​ໜ້າ​ໃນ​ເມື່ອ​ກ່ອນ ແລະ ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ປະຕິວັດ​ລາວ ປະທານ​ປະເທດ ແຫ່ງ ສປປ ລາວ ເປັນ​ຜູ້ນຳ​ພາ​ໃນ​ປັດຈຸບັນ, ປະຊາຊົນ​ລາວ​ສາມາດ​ຍາດ​ໄດ້ຜົນ​ສຳເລັດ​ອັນ​ໃຫຍ່​ຫຼວງ​ຮອບດ້ານ, ການເມືອງ​ມີ​ສະຖຽນ​ລະ​ພາບ, ວຽກ​ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ​ສຸກ ມີ​ຄວາມ​ໜັກ​ແໜ້ນ, ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ, ຊີວິດ​ການ​ເປັນ​ຢູ່​ຂອງ​ປະຊາຊົນ ​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ, ການ​ພົວພັນ​ກັບ​ຕ່າງປະເທດ  ໄດ້​ຮັບ​ການ​ເປີດ​ກວ້າງ, ບົດບາດ ແລະ ອິດ​ທິ​ພົນ​ຂອງ​ພັກ​ປະຊາຊົນ​ປະຕິວັດ ​ລາວ ແລະ ສາທາລະນະ​ລັດ​ປະຊາທິປະໄຕ​ປະຊາຊົນ​ລາວ ນັບ​ມື້​ນັບ​ໄດ້​ຮັບ ​ການ​ຍົກ​ສູງ​ຂຶ້ນ​ໃນ​ເວທີ​ສາ​ກົນ.
  ພວກ​ຂ້າພະເຈົ້າ​ເຊື່ອ​ໝັ້ນ​ວ່າ ພາຍ​ໃຕ້​ການ​ຊີ້​ນຳໆ​ພາ​ຂອງ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປປ     ລາວ, ປະທານ​ປະເທດ ແຫ່ງ ສປປ ລາວ ເປັນ​ຜູ້ນຳ, ປະຊາຊົນ​ລາວ ແລະ  ບັນດາ​ສະມາຊິກ​ພັກ​ທຸກ​ຖ້ວນ​ໜ້າ ຈະ​ສືບຕໍ່​ຍາດ​ໄດ້​ບັນດາ​ຜົນສຳເລັດ​ໃໝ່​ໃຫຍ່​ຫຼວງ​ກວ່າ​ເກົ່າ ໃນ​ພາລະກິດ​ການ​ປ່ຽນແປງ​ໃໝ່, ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ​ປະຊາຊົນ ປະຕິວັດ​ລາວ​ຢ່າງ​ມີ​ໄຊ.
  ອວຍພອນ​ໃຫ້​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ເປັນ​ມູນເຊື້ອ​ທີ່​ມີ​ມາ​ແຕ່​ດົນ​ນານ​ລະຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ​-ສປປ ເກົາຫຼີ ທີ່​ປະທານ ​ໄກສອນ ພົມວິຫານ ຜູ້ນຳ​ທີ່​ແສນ​ເຄົາລົບ​ຮັກ​ຂອງ​ປະຊາຊົນ​ລາວ​ບັນດາເຜົ່າ ແລະ ປະທານ ກິມ ອິນ ຊຸງ  ຜູ້ນຳ​ທີ່​ຍິ່ງ​ໃຫຍ່​ຂອງ ສປປ ເກົາຫຼີ ຮ່ວມ​ກັນ​ສ້າງ​ຂຶ້ນ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ນັບ​ມື້ ນັບ​ແໜ້ນ​ແຟ້ນ ແລະ ພັດທະນາ​ຢ່າງ​ບໍ່​ຢຸດ​ຢັ້ງ ເພື່ອ​ພາລະກິດ​ປະຕິວັດ​ຢູ່​ສອງ​ປະເທດ ກໍ​ຄື​ນຳ​ເອົາ​ຜົນ​ປະໂຫຍດ​ຕົວ​ຈິງ​ມາສູ່​ປະຊາຊົນ​ສອງ​ຊາດ​ໃຫ້​ນັບ​ມື້​ນັບ​ຫຼາຍ​ຂຶ້ນ​ກວ່າ​ເກົ່າ.
  + ພັກ​ປະຊາຊົນ ​ກຳປູເຈຍ, ມີ​ເນື້ອ​ໃນ​ດັ່ງນີ້:
  ເນື່ອງ​ໃນ​ໂອກາດ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ  65 ປີ, ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ກຳປູເຈຍ ຂໍ​ສະແດງ​ຄວາມ​ຊົມເຊີຍ ແລະ ສົ່ງ​ພອນ​ໄຊ​ອັນ​ປະເສີດ​ມາ​ຍັງ ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ປະຕິວັດ​ລາວ.
  ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ ​ກຳປູເຈຍ ຂໍ​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ ຕໍ່​ບັນດາ​ຜົນສຳເລັດ​ຂອງ​ພັກ, ລັດ ແລະ ປະຊາຊົນ​ລາວ ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ ໃນ​ການ​ພັດທະນາ​ເສດ​ຖະ​ກິດ​-​ສັງຄົມ ອັນ​ໄດ້​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ນັບ​ມື້​ນັບ​ໄດ້​ຮັບ​ການ​ປົວແປງ​ໃຫ້​ດີ​ຂຶ້ນ ແລະ ເພື່ອ​ສືບຕໍ່​ຍົກ​ສູງ​ບົດບາດ​ຂອງ​ພັກ​ໃຫ້​ນັບ​ມື້​ນັບ​ສູງ​ເດັ່ນ​ໃນ​ປະເທດ​ກໍຄື​ໃນ​ເວທີ​ສາ​ກົນ.
  ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ກຳປູເຈຍ ຕີ​ລາຄາ​ສູງ ແລະ ຂໍ​ສະແດງ​ຄວາມ​ຊົມເຊີຍ ຕໍ່​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ, ການ​ຮ່ວມ​ມື​ທີ່​ເປັນ​ມູນເຊື້ອ​ອັນ​ດີງາມ​ລະຫວ່າງ​ສອງ​ພັກ ແລະ ປະຊາຊົນ​ສອງ​ຊາດ ລາວ​-​ກຳປູເຈຍ  ທີ່​ໄດ້​ຍົກ​ລະດັບ​ການ​ພົວພັນ “ຄູ່​ຮ່ວມ​ຍຸດທະສາດ ຮອບດ້ານ ໝັ້ນຄົງ​ຍາວ​ນານ”.
  ພວກ​ຂ້າພະເຈົ້າ​ເຊື່ອ​ໝັ້ນ​ວ່າ ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ ຂອງ​ພັກ​ປະຊາຊົນ​ ​ປະຕິວັດ​ລາວ ອັນ​ມີ ພະນະ​ທ່ານ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ເປັນ​ຜູ້ນຳ​ພາ, ປະຊາຊົນ​ລາວ​ຈະ​ສືບຕໍ່​ຍາດ​ໄດ້ຜົນ​ສຳເລັດ​ອັນ​ໃໝ່ ໃນ​ການ​ປະຕິບັດ​ບັນດາ​ມະຕິ​ຂອງ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ​ປະຊາຊົນ​ປະຕິວັດ​ລາວ ວາງ​ອອກ.
  ໃນ​ໂອກາດ​ອັນ​ສະຫງ່າ​ລາສີ​ນີ້ ພວກ​ຂ້າພະເຈົ້າ​ຂໍ​ອວຍພອນ​ໄຊ​ອັນ​ປະເສີດ ໃຫ້​ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ປະຕິວັດ​ລາວ ຈົ່ງ​ປະສົບ​ຜົນສຳເລັດ​ໃໝ່​ໃຫຍ່​ຫຼວງ​ກວ່າ​ເກົ່າ ໃນ​ການ​ສ້າງສາ​ພັດທະນາ​ປະເທດ​ຊາດ ກ້າວ​ໄປ​ສູ່​ຄວາມ​ຈະເລີນ​ວັດ​ທະ​ນາ.
  ຂໍ​ອວຍພອນ​ໃຫ້ ສາຍ​ພົວພັນ​ມິດຕະພາບ ທີ່​ມີ​ມູນເຊື້ອ ແລະ ການ​ຮ່ວມ​ມື ລະຫວ່າງ​ພັກ,ລັດຖະບານ ແລະ ປະຊາຊົນ​ສອງ​ຊາດ​ພວກ​ເຮົາ ຈົ່ງ​ສືບຕໍ່​ໄດ້​ຮັບ​ການ​ເສີມ​ຂະຫຍາຍ​ຍິ່ງໆ​ຂຶ້ນ. 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110