ຊຽງຂວາງ ເປີດການຈັດງານແຂ່ງຂັນກິລາເປຕັງທ່ົວປະເທດ ຄັ້ງທີ 10 ຊີງຂັນ ພະນະທ່ານນາຍົກ


...

     ແຂວງຊຽງຂວາງ ໄດ້ເປີດງານແຂ່ງຂັນກິລາເປຕັງທົ່ວປະເທດ ຄັ້ງ ທີ 10 ຊີງຂັນ ພະ ນະທ່ານ ນາຍົກລັດຖະມົນຕີ ແຫ່ງ ສປປ ລາວ ຂຶ້ນຢ່າງເປັນ ທາງການ ໃນວັນທີ 2 ກໍລະ ກົດຜ່ານມາ ຢູ່ບ້ານລີ່ ເມືອງແປກ ໂດຍເປັນກຽດເຂົ້າຮ່ວມ ເປັນປະທານເປີດການແຂ່ງຂັນຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດ ຖະມົນຕີກະຊວງການເງິນ ປະທານທີ່ປຶກສາສະຫະພັນກິລາເປຕັງແຫ່ງຊາດລາວ, ທ່ານ ບຸນຕົ້ນ ຈັນທະພອນ ວ່າການເຈົ້າແຂວງ ແຂວງຊຽງຂວາງ ປະທານສະພາແຂວງຊຽງຂວາງ, ທ່ານ ບົວລານ ສີລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ, ຊຶ່ງບັນດາທ່ານ ຄະນະປະຈຳພັກແຂວງ-ກຳມະການພັກແຂວງ, ເມືອງ, ການນຳກະຊວງ-ອົງການ ແລະ ນັກກິລາ ຂອງທຸກພາກສ່ວນເຂົ້າຮ່ວມ. ທ່ານ ຄຳຫຼ້າ ວິນໄລທອງ ປະທານສະຫະພັນກິລາເປຕັງ ແຫ່ງຊາດລາວ, ຄະນະກຳມະ ການໂອແລັມປິກແຫ່ງຊາດ, ປະ ທານກິລາເປຕັງອາຊຽນ ໄດ້ໃຫ້ກຽດຂຶ້ນລາຍງານ ສຳລັບການແຂ່ງຂັນເປຕັງທົ່ວປະເທດຄັ້ງທີ 10 ນີ້ ກໍ່ໄດ້ຈັດຂຶ້ນທີ່ແຂວງຊຽງຂວາງ ຈຸດປະສົງ ເພື່ອ ເປັນການສືບຕໍ່ຊຸກຍູ້ສົ່ງເສີມພັດທະນາກິລາເປຕັງລາວ ໃຫ້ໄດ້ຮັບການຂະຫຍາຍວຽກງານກິລາ-ກາຍະກຳ ເຂົ້າສູ່ມວນຊົນບັນດາເຜົ່າໃຫ້ຫັນມາຫຼິ້ນກິລາຢ່າງກວ້າງຂວາງ ແລະ ຕໍ່ເນື່ອງ, ສ້າງນຳ້ໃຈຄວາມສາມັກຄີ ມີລະບຽບວິໄນຂອງຊາວໜຸ່ມນັກຮຽນນັກສຶກສາປັນຍາຊົນ ແລະ ປວງຊົນລາວບັນດາເຜົ່າ ແລະ ເປັນການພັດທະນາຮອບດ້ານ ໃນການກະກຽມການເປັນເຈົ້າພາບ ຈັດການແຂ່ງຂັນລະດັບສາກົນ. ພ້ອມກັນນີ້ ໄດ້ຄັດເລືອກເອົານັກກິລາທີ່ມີສີມືດີເດັ່ນເປັນນັກກິລາຮຸ່ນສືບທອດ ແລະ ເປັນເປົ້າໝາຍປະກອບເຂົ້າທີມຊາດ ເພື່ອໄປຮ່ວມແຂ່ງຂັນ ໃນລະ ດັບພາກພື້ນ ແລະ ລະດັບສາກົນ. ໂອກາດນີ້ ທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ ປະທານຈັດການແຂ່ງຂັນ ໄດ້ໃຫ້ກຽດຂຶ້ນກ່າວລາຍງານຄວາມພ້ອມການການຈັດແຂ່ງຂັນ ຊຶ່ງມີການແຂ່ງຂັນໄດ້ເລີ່ມແຂ່ງຂັນມາແຕ່ວັນທີ 30 ມິຖຸນາຜ່ານມາ ຊຶ່ງແຂ່ງຂັນຈົນມາເຖິງວັນທີ 5 ກໍລະກົດ 2018 ຈະໃຫ້ສຳເລັດໄປດ້ວຍດີ. ການແຂ່ງຂັນຄັ້ງນີ້ ມີ 10 ລາຍການແຂ່ງຂັນຄື: ຊຸດຕິ້ງຊາຍ, ຊຸດຕິ້ງຍິງ, ດ່ຽວຊາຍ, ດ່ຽວຍິງ, ຄູ່ຊາຍ, ຄູ່ຍິງ, ຄູ່ປະສົມ (1ຊາຍ+1ຍິງ), ຄູ່ VIP ລຸ້ນ 50 ປີ ຂຶ້ນໄປ, ທີມຊຸດຊາຍ ແລະ ທີມຊຸດຍິງ ມີຈຳນວນນັກກິລາເຂົ້າຮ່ວມ 300 ກວ່າຄົນ. ໂອກາດທີ່ມີຄວາມໝາຍຄວາມສຳຄັນນີ້ ທ່ານ ບຸນຕົ້ນ ຈັນທະພອນ ໄດ້ໃຫ້ກຽດຂຶ້ນກ່າວເປີດງານແຂ່ງຂັນໃນຄັ້ງນີ້ ຢ່າງເປັນທາງການ. ຫຼັງຈາກນັ້ນ ທ່ານ ສົມດີ ດວງດີ ໄດ້ໃຫ້ກຽດ ລັ່ນຄ້ອງ 9 ບາດ ເພື່ອເປັນສິລິມຸງຄຸນ ແລະ ໂຍນ ໝາກບູນ ເພື່ອເປີດການແຂ່ງຂັນ ເປັນທາງການ. ໂດຍ: ແສງມາລີຕິກ