ຮອງປະທານປະເທດ ຊົມເຊີຍນັກກິລາເຕະບານຍິງ ທີ່ສ້າງຊື່ສຽງໃຫ້ປະເທດຊາດ


...

     ທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສປປ ລາວ ໄດ້ສະແດງຄວາມຊົມເຊີຍຕໍ່ນັກກິລາເຕະບານຍິງ ຮຸ່ນອາຍຸບໍ່ເກີນ 15 ປີ ທີ່ສ້າງປະຫວັດສາດໜ້າໃໝ່ໃຫ້ກັບ ວົງການບານເຕະຍິງລາວ ທີ່ຍາດໄດ້ຮອງແຊັມ ດ້ວຍການ ຄອງຫຼຽນເງິນໃນການແຂ່ງຂັນ ຊີງແຊັມອາຊຽນ ຈັດຂຶ້ນທີ່ປະ ເທດໄທ ໃນລະຫວ່າງວັນທີ 9-22/5/2019 ຊຶ່ງປະກອບມີ 10 ປະເທດເຂົ້າຮ່ວມ. ໃນວັນທີ 24 ພຶດສະພາຜ່ານມານີ້ ທີ່ທຳນຽບປະທານປະເທດ, ທ່ານ ພັນຄຳ ວິພາວັນ ໄດ້ຕ້ອນຮັບນັກກິລາເຕະບານຍິງ ທີມຊາດລາວ ຮຸ່ນອາຍຸບໍ່ເກີນ 15 ປີ (ຢູ 15) ໃນໂອກາດດັ່ງກ່າວນີ້ ທ່ານ ຮອງປະທານປະເທດໄດ້ຮັບຟັງການລາຍງານຜົນການ ແຂ່ງຂັນໂດຍຫຍໍ້ ຈາກທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວໃຫ້ຮູ້ວ່າ: ການແຂ່ງຂັນລາຍການດັ່ງກ່າວນີ້ ທີມຊາດລາວ ເພດຍິງ ຮຸ່ນອາຍຸບໍ່ເກີນ 15 ປີ, ຢູ່ໃນກຸ່ມ B ໂດຍການແຂ່ງຂັນຮອບແບ່ງ, ກຸ່ມນັດທີ 1 ນັກກິລາລາວ ຊະນະມາເລເຊຍ 4-0 ປະຕູ, ນັດທີ 2 ຊະນະ ສິງກະໂປ 7-0 ປະຕູ, ນັດທີ 3 ຊະນະ ກຳປູເຈຍ 2-0 ປະຕູ, ນັດທີ 4 ຊະນະ ໄທ 5-2 ປະຕູ ເປັນອັນດັບ 1 ຂອງກຸ່ມ B. ສ່ວນຜົນການແຂ່ງຂັນຮອບຮອງຊະນະເລີດ ທີມຊາດລາວ ຊະນະ ຟີລິບປິນ 3-1 ປະຕູ, ຜ່ານເຂົ້າຮອບຊີງຊະນະເລີດ ໂຄຈອນມາພົບກັບທີມຊາດໄທ ເຈົ້າພາບ ທີ່່ເອົາຊະນະຫວຽດນາມ 1-0 ປະຕູ ໃນຮອບຮອງຊະນະເລີດ. ແຕ່ໜ້າເສຍດາຍຮອບຊີງຊະນະເລີດເສຍໃຫ້ທີມຊາດໄທ ດ້ວຍການຍິງຈຸດໂທດ 5-3 ປະຕູ ໄດ້ພຽງຮອງແຊັມມາຄອງ. ໃນໂອກາດດຽວກັນນີ້ ທ່ານ ຮອງປະທານປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານນັກກິລາເຕະບານຍິງຮຸ່ນອາຍຸບໍ່ເກີນ 15 ປີ ທີ່ໄດ້ສ້າງຊື່ສຽງໃຫ້ແກ່ປະເທດຊາດ ໂດຍ ສະເພາະແມ່ນສ້າງຊື່ສຽງໃຫ້ ແກ່ກິລາເຕະບານຍິງຮຸ່ນອາຍຸບໍ່ເກີນ 15 ປີທີ່ສາມາດຍາດ ໄດ້ຮອງແຊັມ ແລະ ຫວັງຢ່າງຍິ່ງວ່າ ພວກລູກຫຼານຈະສືບຕໍ່ຝຶກຝົນ ຫຼໍ່ຫຼອມຕົນເອງໃຫ້ເປັນນັກ ກິລາທີ່ເກັ່ງ ແລະ ຕັ້ງໃຈຮໍ່າຮຽນເອົາວິຊາຄວາມຮູ້ ເພື່ອເປັນເຍົາ ວະຊົນທີ່ດີຂອງຊາດຕໍ່ໄປ. ການຍາດໄດ້ຮອງແຊັມ ຂອງ ຢູ 15 ຄັ້ງນີ້ ລັດຖະບານ ແຫ່ງ ສປປ ລາວ ໄດ້ມອບເງິນ ເພື່ອເປັນຂວັນ ແລະ ກຳລັງໃຈ ໃຫ້ ຈຳນວນ 83 ລ້ານກີບ. ນອກ ຈາກນີ້ ສະຫະພັນບານເຕະ ແຫ່ງຊາດລາວ ຍັງມອບໃຫ້ອີກ ຈຳນວນ 80 ລ້ານກີບ ແລະ ບໍລິສັດແສງເພັດເກັບກູ້ລະເບີດ ມອບໃຫ້ຈຳນວນ 20 ລ້ານກີບ, ລວມທັງໝົດ183 ລ້ານກີບ. (ຂ່າວ-ພາບ : ສຸກສາຄອນ)