ເກັ່ງເກີນຄາດ ! ປິ່ງປ່ອງ ອຸດົມໄຊ ກວາດ 5 ຫຼຽນຄຳ ງານນົກກົກຄຳ ເກມ 2017


...

   ທັບນັກກິລາປິ່ງປ່ອງ ແຂວງອຸດົມໄຊ ສ້າງຜົນງານໄດ້ຢ່າງໂດດເດັ່ນ ພາຍຫຼັງຍາດມາໄດ້ 5 ຫຼຽນຄຳ ແລະ 1 ຫຼຽນເງິນ ຈາກການຊີງໄຊກັນທັງໝົດ 7 ລາຍການ ໃນງານມຫະກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ເປັນເຈົ້າພາບ ລະຫວ່າງວັນທີ 1-9 ກຸມພາ 2017. ການແຂ່ງຂັນກິລາປິ່ງປ່ອງ ໃນງານມຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ໄດ້ທຳການແຂ່ງຂັນກັນ ໃນລະຫວ່າງວັນທີ 2-4 ກຸມພາ 2017 ທີ່ສະໂມສອນໃນຮົ່ມ ພະແນກກະສິກຳ ແລະ ປ່າໄມ້ ແຂວງລິຄຳໄຊ ໂດຍມີນັກກິລາເຂົ້າຮ່ວມທັງໝົດ 60 ຄົນ, ຍິງ 27 ຄົນ ທີ່ມາຈາກນະຄອນຫຼວງວຽງຈັນ, ແຂວງຫຼວງພະບາງ, ສະຫວັນນະເຂດ, ຈຳປາສັກ, ຄຳມ່ວນ, ຊຽງຂວາງ ແລະ ແຂວງອຸດົມໄຊ ໂດຍມີການຊີງໄຊກັນທັງໝົດ 3 ປະເພດ ລວມ 7 ລາຍການ (7 ຫຼຽນຄຳ) ປະກອບມີ ປະເພດທີມຊາຍ-ຍິງ, ປະເພດດ່ຽວຍິງ-ຊາຍ, ຄູ່ຍິງ-ຊາຍ ແລະ ຄູ່ປະສົມ. ຜ່ານການແຂ່ງຂັນໃນໄລຍະເວລາ 2 ວັນ ຜົນປາກົດວ່າ ທັບນັກກິລາປິ່ງປ່ອງ ແຂວງອຸດົມໄຊ ສາມາດຍາດມາໄດ້ ເຖິງ 5 ຫຼຽນຄຳ ແລະ 1 ຫຼຽນເງິນ, ໂດຍ 5 ຫຼຽນຄຳ ໄດ້ຈາກປະເພດທີມຍິງ, ດ່ຽວຊາຍ (ທ້າວ ພຸດສະດີ), ດ່ຽວຍິງ (ນາງ ຍຸພິນ), ຄູ່ຍິງ (ນາງ ສຸນີລັກ+ນາງ ມອນມະລີ) ແລະ ຄູ່ປະສົມ (ທ້າວ ໄຊຈະເລີນ+ນາງ ດາສະຫວັນ). ສ່ວນ 4 ຫຼຽນເງິນ ໄດ້ຈາກທີມຊາຍ, ຄູ່ຍິງ, ຄູ່ຊາຍ ແລະ ຄູ່ປະສົມ ແລະ 1 ຫຼຽນທອງ ຈາກປະເພດດ່ຽວຍິງ.