ເສັ້ນທາງພັດທະນາຂອງພັກກອມມູນິດຈີນ ຖືເປັນບົດຮຽນທີ່ປະເສີດ ສຳລັບບັນດາປະເທດພວມພັດທະນາ ໃນການປົກຄອງປະເທດ


...

04.07.2019 11:47     

   (ທ່ານ ສົມພັນ ແພງຄຳມີ ໄດ້ໃຫ້ສຳພາດຕໍ່ນັກຂ່າວສະຖານີວິທະຍຸໂທລະພາບສູນກາງຈີນ) ໃນໂອກາດວັນສ້າງຕັ້ງພັກກອມມູນິດຈີນ, ຄົບຮອບ 98 ປີ, ວັນທີ 1 ກໍລະກົດ, ທ່ານ ສົມພັນ ແພງຄຳມີ ກຳມະການສູນກາງພັກ ຮອງປະທານສະພາແຫ່ງຊາດລາວ ໄດ້ໃຫ້ສຳພາດຕໍ່ນັກຂ່າວສະຖານີວິທະຍຸໂທລະພາບສູນກາງຈີນ (CMG ຫຼື ເອີ້ນວ່າ CRI) ຢູ່ທີ່ນະຄອນຫຼວງປັກກິ່ງ ໂດຍກ່າວວ່າ: ເສັ້ນທາງພັດທະນາຂອງພັກກອມມູນິດຈີນ ຖືເປັນບົດຮຽນທີ່ປະເສີດສຳລັບບັນດາປະເທດພວມພັດທະນາໃນການປົກຄອງປະເທດ.
ກ່ອນໜ້ານີ້, ພັກກອມມູນິດຈີນ ໄດ້ຈັດກອງປະຊຸມເຜີຍແຜ່ໂຄສະນາກ່ຽວກັບພຶດຕິກຳຂອງແນວຄິດ ສີຈິ້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ທີ່ເມືອງຫຼານຂ້າວ ແຂວງເຫີໜານຂອງຈີນ ຊຶ່ງເປັນຄັ້ງທຳອິດທີ່ພັກກອມມູນິຈີນ ແນະນຳກ່ຽວກັບສະພາບການພັດທະນາດ້ານຊົນນະບົດ, ກະສິກຳ ແລະ ຊາວກະສິກອນຂອງຈີນໃນຍຸກໃໝ່ ແລະ ຜົນສຳເລັດໃນການຈັດຕັ້ງປະຕິບັດນະໂຍບາຍຫຼຸດຜ່ອນຄວາມທຸກຍາກໃຫ້ພັກການເມືອງຂອງບັນດາປະເທດພວມພັດທະນາໄດ້ຮັບຊາບນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ.
ທ່ານ ກ່າວວ່າ: ພວກຂ້າພະເຈົ້າໄດ້ຮັບຟັງບົດຮຽນໃນການນຳພາພັດທະນາຊົນນະບົດຂອງຈີນ ແລະ ໄດ້ໄປເບິ່ງການພັດທະນາຕົວຈິງ, ຊຶ່ງບໍ່ພຽງແຕ່ຮັບຮູ້ທາງດ້ານທິດສະດີເທົ່ານັ້ນ, ແຕ່ຍັງໄດ້ໄປເບິ່ງການພັດທະນາຕົວຈິງເຫັນວ່າ ການພັດທະນານັ້ນ ຖືເປັນການພັດທະນາທີ່ເຮັດໃຫ້ຊົນນະບົດກາຍເປັນຕົວເມືອງກ້າວໜ້າທັນສະໄໝ, ມີຄວາມຈະເລີນສີວິໄລ, ເມື່ອໄປເບິ່ງໄປເຫັນແລ້ວບໍ່ຢາກເຊື່ອເລີຍວ່າເຂດນັ້ນເປັນຊົນນະບົດທີ່ເຄີຍທຸກຍາກມາກ່ອນ ແລະ ຊີວິດການເປັນຢູ່ຂອງປະຊາຊົນໄດ້ຮັບການພັດທະນາກ້າວຂຶ້ນຢ່າງບໍ່ຢຸດຢັ້ງ, ປະຊາຊົນຫຼາຍ ລ້ານຄົນ ໄດ້ຫຼຸດພົ້ນອອກຈາກຄວາມທຸກຍາກ, ຊາວນາທຸກຍາກໃນເມື່ອກ່ອນ ໄດ້ກາຍເປັນຊາວນາທີ່ຮັ່ງມີ.
ທ່ານ ສົມພັນ ແພງຄຳມີ ຍັງກ່າວອີກວ່າ: ການພັດທະນາຊົນນະບົດໃຫ້ຫຼຸດພົ້ນອອກຈາກຄວາມທຸກຍາກ ແລະ ລົບລ້າງຄວາມທຸກຍາກໃຫ້ທົ່ວເຖິງ ແມ່ນໜ້າທີ່ອັນໜັກໜ່ວງ ຂອງພັກການເມືອງປະເທດຕ່າງໆ ໂດຍສະເພາະ ແມ່ນປະເທດພວມພັດທະນາ. ໝາກຜົນຂອງພັກກອມມູນິດຈີນ ທີ່ໄດ້ຮັບໃນການພັດທະນາຊົນນະບົດໃຫ້ຈະເລີນຂຶ້ນນັ້ນ ໄດ້ກາຍເປັນບົດຮຽນທີ່ດີສຳລັບພັກປະຊາຊົນ ປະຕິວັດລາວ ໃນການຊຸກຍູ້ວຽກງານສ້າງສາພັດທະນາຊົນນະບົດຂອງປະເທດຕົນ. ທ່ານ ເວົ້າວ່າ: ຜົນສຳເລັດເຫຼົ່ານີ້ ແມ່ນຍ້ອນມີພັກກອມມູນິດຈີນ ເປັນຜູ້ຈັດຕັ້ງນຳພາ, ແຕ່ລະບ້ານ ແຕ່ລະບ່ອນມີໜ່ວຍພັກ ແລະ ສະມາຊິກພັກເປັນເຈົ້າການໃນການຈັດຕັ້ງປະຕິບັດແນວທາງຂອງພັກ ໂດຍສະເພາະ ແມ່ນແນວຄິດສີຈິ້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ເຂົ້າໃນພຶດຕິກຳຕົວຈິງ, ນັ້ນຄືຕ້ອງແກ້ໄຂຄວາມທຸກຍາກ, ພັດທະນາຊົນນະບົດໃຫ້ຖືກບ່ອນ, ໃຫ້ຖືກເວລາ ແລະ ໃຫ້ຖືກເປົ້າໝາຍ. ຜົນສຳເລັດເຫຼົ່ານີ້ ບໍ່ພຽງແຕ່ຈະເປັນຜົນສຳເລັດສຳລັບປະຊາຊົນຈີນເທົ່ານັ້ນ, ແຕ່ຍັງແມ່ນສຳລັບພວກຂ້າພະເຈົ້າທີ່ສາມາດຖອດຖອນເປັນບົດຮຽນອັນປະເສີດທີ່ສຸດຂອງຕົນ, ເພາະປັດຈຸບັນ ພັກ ແລະ ລັດຖະບານລາວ ກໍ່ພວມຈັດຕັ້ງນຳພາປະຊາຊົນ ສູ້ຊົນຈັດຕັ້ງແຜນການໂຄງການເພື່ອພັດທະນາຊົນນະບົດ, ແກ້ໄຂຄວາມທຸກຍາກຢູ່ ສປປ ລາວ.
ທ່ານ ຮອງປະທານສະພາກ່າວຕື່ມວ່າ: ໃນຕະຫຼອດຂະບວນການພັດທະນາເກືອບ 100 ປີມາ, ໂດຍສະເພາະແມ່ນ ພາຍຫຼັງໄດ້ປົດປ່ອຍທົ່ວປະເທດຈີນ ສະຖາປະນາສາທາລະນະລັດປະຊາຊົນຈີນ ຂຶ້ນມາແລ້ວ, ພັກກອມມູນິດຈີນ ແມ່ນບໍ່ເຄີຍຫຼົງລືມອຸດົມການແຕ່ຫົວທີທີ່ສະແຫວງຫາຄວາມຜາສຸກໃຫ້ແກ່ປະຊາຊົນ, ຊຶ່ງເຮັດໃຫ້ການສ້າງສາສັງຄົມນິຍົມທີ່ມີສີສັນພິເສດຂອງຈີນໄດ້ຮັບຜົນງານອັນຍິ່ງໃຫຍ່ໃນຫຼາຍດ້ານ ພາຍໃຕ້ການນຳພາອັນໜັກແໜ້ນຂອງພັກກອມມູນິດຈີນ ທີ່ມີທ່ານ ສີຈິ້ນຜິງ ເປັນແກນນຳນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ, ທ່ານ ກ່າວວ່າ: ປັດຈຸບັນ, ການເມືອງ ສປ ຈີນ ມີສະຖຽນລະພາບໜັກແໜ້ນ, ສັງຄົມມີຄວາມສະຫງົບ, ປະຊາຊົນມີຄວາມສາມັກຄີປອງດອງ, ເສດຖະກິດຂະຫຍາຍຕົວຢ່າງວ່ອງໄວ, ຕໍ່ເນື່ອງ, ເຂັ້ມແຂງ ແລະ ຮອບດ້ານ, ການພົວພັນຕ່າງປະເທດນັບມື້ນັບກວ້າງຂວາງ ໂດຍສະເພາະແມ່ນຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ຂອງ ສປ ຈີນ ໄດ້ຮັບການສະໜັບສະໜູນຢ່າງກວ້າງຂວາງຈາກສາກົນ, ໄດ້ເຮັດໃຫ້ບົດບາດອິດທິພົນຂອງພັກ - ລັດຈີນ ນັບມື້ນັບກວ້າງຂວາງ ແລະ ສູງສົ່ງຢູ່ໃນເວທີຂອງພາກພື້ນ ແລະ ໃນໂລກ. ຫຼາຍປະເທດໄດ້ພາກັນກ່າວວ່າ: ຜົນສຳເລັດຂອງຈີນ ຈະກາຍເປັນບົດຮຽນຂອງປະເທດຕ່າງໆ ໃນໂລກ ໂດຍສະເພາະແມ່ນປະເທດທີ່ພວມພັດທະນາ.
ສຸດທ້າຍ ທ່ານ ສົມພັນ ແພງຄຳມີ ໄດ້ກ່າວໄດ້ຜ່ານສະຖານີວິທະຍຸໂທລະພາບສູນກາງຈີນ ສົ່ງຄຳອວຍພອນອັນປະເສີດມາຍັງສະມາຊິກພັກກອມມູນິຈີນ ແລະ ປະຊາຊົນຈີນທຸກຖ້ວນໜ້າ ເນື່ອງໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 98 ປີ ໃນວັນທີ 1 ກໍລະກົດນີ້ ແລະ ການສະຖາປະນາ ສປ ຈີນ ຄົບຮອບ 70 ປີ, ໃນວັນທີ 1 ຕຸລາ ທີ່ຈະໝູນວຽນມາເຖິງນີ້ ເພື່ອຂໍອວຍພອນໃຫ້ພັກກອມມູນິດຈີນ ຈົ່ງສືບຕໍ່ນຳພາປະຊາຊົນຈີນ ບຸກໜ້າບືນຕົວ, ບັນລຸເປົ້າໝາຍສູ້ຊົນ 100 ປີສອງເຫດການ, ບັນລຸຄວາມໃຝ່ຝັນຂອງຈີນ ທີ່ຈະຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ ແລະ ຂໍອວຍພອນໃຫ້ຄວາມສາມັກຄີການພົວພັນທີ່ເປັນມູນເຊື້ອການຮ່ວມມືແບບເພື່ອນມິດຍຸດທະສາດ ຮອບດ້ານ ຍາວນານ ບົນພື້ນຖານ 4 ດີຂອງສອງພັກ, ສອງລັດ ກໍ່ຄືປະຊາຊົນສອງຊາດ ລາວ-ຈີນ ຈົ່ງໝັ້ນຄົງຂະໜົງແກ່ນ, ແຕກດອກອອກຜົນງົດງາມຕະຫຼອດໄປ.