ຜູ້­ນຳ​ຫວຽດ­ນາມ ເນັ້ນ​ບົດ­ບາດ​ການ​ລົງ­ທຶນ​ພາກ​ລັດ

30.09.2019 9:47     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 26 ກັນຍາ​ຜ່ານ​ມາ, ຢູ່​ສໍາ​ນັກ​ງານ​ລັດຖະບານ, ທ່ານ ຫ​ງວຽນ​ຊວັນ​ຟຸກ ນາຍົກລັດຖະມົນຕີ ຫວຽດນາມ ໄດ້​ເປັນ​ປະທານ​ກອງ​ປະຊຸມ​ໂດຍ​ກົງ​ຜ່ານ​ເຄືອ​ຂ່າຍ​ອິນ​ເຕີ​ເນັດ​ທົ່ວ​ປະເທດ ກ່ຽວ​ກັບ​ການ​ຊຸກຍູ້​ການ​ຈັດ​ແບ່ງ ແລະ ປ່ອຍ​ເງິນ​ລົງທຶນ​ພາກ​ລັດ​ປີ 2019.

   ຂ່າວ​ລາຍ​ງານ​ວ່າ: ໃນ​ພິ ທີ​ເປີດ​ກອງ​ປະຊຸມ, ທ່ານນາຍົກ ລັດຖະມົນຕີ ຫວຽດນາມຊີ້​ແຈງ ວ່າ: ໃນ​ຫຼາຍ​ປີ​​ຜ່ານ​ມາ, ການ​ປ່ອຍ​ເງິນ​ລົງທຶນ​ພາກ​ລັດເຫັນ​ວ່າ​ຍັງ​ມີ​ຄວາມ​ຊັກ​ຊ້າ, ສົ່ງ​ຜົນ​ກະທົບ​ບໍ່​ດີ​ຕໍ່​ການ​ພັດທະນາ​ເສດຖະກິດ​ສັງຄົມ ພ້ອມ​ທັງ​ເນັ້ນ​ໜັກ​ເຖິງ​ບົດ​ບາດ​ສໍາ​ຄັນ​ຂອງ​ການ​ລົງທຶນ​ພາກ​ລັດ​ສໍາ​ລັບ​ການ​ພັດທະນາ​ເສດ​ຖະ​ກິດ​-​ສັງຄົມ ຂອງ​ປະເທດ​ຊາດ, ໃນ​ນັ້ນ ມີ​ການ​ກໍ່ສ້າງ​ບັນດາ​ກິດ​ຈະ​ກໍາ​ພື້ນຖານ​ໂຄງ​ລ່າງ​ທີ່​ສໍາ​ຄັນ, ປ່ຽນແປງ​ໂສມ​ໜ້າ​ຂອງ​ປະເທດ​ຊາດ, ທ່ານ ນາຍົກລັດຖະມົນຕີ ຫວຽດນາມ ໃຫ້​ຮູ້​ຕື່ມ​ວ່າ: ເງິນ​ລົງທຶນ​ພາກ​ລັດ ກວມ​ເອົາ 10,7% ຂອງ​ມູນ​ຄ່່າ GDP, ກວມ 32% ຍອດ​ເງິນ​ ລົງທຶນ​ທັງ​ໝົດ​ໃນ​ທົ່ວ​ສັງຄົມ ປີ 2019.

   ທ່ານນາຍົກລັດຖະມົນຕີ​ຫວຽດນາມ ໄດ້​ຍົກ​ໃຫ້​ເຫັນ​ບາງ​ຂໍ້​ດັ່ງນີ້: ໜຶ່ງ, ເລື່ອງ​ການ​ປ່ອຍ​ເງິນ​ລົງທຶນ​ພາກ​ລັດ ໄດ້​ສົ່ງ​ຜົນ​ສະທ້ອນ​ເຖິງ​ລະດັບ​ການ​ເຕີບ​ໂຕ​ເສດ​ຖະ​ກິດ. ດັ່ງນັ້ນ ເງິນ​ລົງທຶນ​ແມ່ນ​ໜຶ່ງ​ໃນ​ບັນດາ​ປັດ​ໄຈ​ສໍາ​ຄັນ​ສໍາ​ລັບ​ການ​ເຕີບ​ໂຕ. ສອງ, ເງິນ​ລົງທຶນ​ພາກ​ລັດ ແມ່ນ​ໜຶ່ງ​ໃນ​ບັນດາ​ແຫຼ່ງ​ກໍາ​ລັງ​ຂອງ​ບັນດາ​ໂຄງການ​ໃຫຍ່, ບັນດາ​ພື້ນຖານ​ໂຄງ​ລ່າງ​ສໍາ​ຄັນ. ຖ້າ​ຫາກ​ປ່ອຍ​ງົບປະມານ​ຊັກ​ຊ້າ ຈະ​ເຮັດ​ໃຫ້​ຄວາມ​ໄວ້​ເນື້ອ​ເຊື່ອ​ໃຈ​ຂອງ​ນັກ​ລົງທຶນ ແລະ ຜູ້​ອຸ​ປະ​ຖໍາ​ຫຼຸດ​ລົງ.

   ພ້ອມ​ກັນ​ນີ້, ທ່ານ ຫ​ງວຽນ ​ຊວັນ​ຟຸກ ໄດ້​ຮຽກຮ້ອງ​ໃຫ້​ບັນ ດາ​ກະຊວງ, ຂະແໜງການ,ທ້ອງ ຖິ່ນຕ່າງໆ ຄວນ​ເຮັດ​ແຈ້ງ​ສາ ເຫດ​ພາວະ​ວິໄສ ແລະ ອັດ​ຕະ​ວິໄສທີ່​ເຮັດ​ໃຫ້ການ​ປ່ອຍ​ເງິນ​ລົງທຶນ​ພາກ​ລັດ​ມີ​ຄວາມ​ຊັກ​ຊ້າ, ສະເໜີ​ບັນດາ​ມາດ​ຕະການ​ແກ້​ໄຂ​ເພື່ອ​ຍູ້​ໄວ​ການ​ປ່ອຍ​ເງິນ.