ງານສະເຫຼີມສະຫຼອງວັນສະຖາປະນາ ສປ ຈີນຄົບຮອບ 70 ປີຈັດຂຶ້ນຢ່າງຍິ່ງໃຫຍ່ຄືກຄື້ນ

01.10.2019 16:41     

   ງານສະເຫຼີມສະຫຼອງວັນສະຖາປະນາ ສປ ຈີນຄົບຮອບ 70 ປີ (1/10/1949-1/10/2019) ພິທີສວນສະໜາມໄດ້ຈັດຂື້ນຢ່າງຍິ່ງໃຫຍ່ມະໂຫລານ ແລະ ຄຶກຄື້ນ ມີມວນຊົນເຂົ້າຮ່ວມຢ່າງຫຼວງຫຼາຍ ໃນຕອນເຊົ້າຂອງວັນທີ 1 ຕຸລາ 2019 ນີ້ຢູ່ສະໜາມຫຼວງທ່ຽນອ່ານເໝີນທີ່ນະຄອນຫຼວງປັກກິ່ງ.
    ທ່ານສີຈິ້ນຜິງເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສສຳຄັນແລະກວດແຖວທະຫານ. ທ່ານກ່າວເນັ້ນວ່າ, ໃນ 70 ປີມານີ້, ປະຊາຊົນຈີນຮ່ວມຈິດຮ່ວມໃຈ, ບາກບັ່ນສູ້ຊົນແລະໄດ້ຮັບຜົນສຳເລັດອັນຍິ່ງໃຫຍ່ທີ່ເຮັດໃຫ້ໂລກເບິ່ງດ້ວຍສາຍຕາໃໝ່. ຊູ່ມື້ນີ້, ສັງຄົມນິຍົມຈີນໄດ້ຕັ້ງສະຫງ່າຢູ່ພາກຕາເວັນອອກຂອງໂລກ, ເຊິ່ງບໍ່ມີກ້ອນກຳລັງໃດທີ່ສາມາດສັ່ນຄອນຖານະຂອງຈີນແລະສາມາດສະກັດກັ້ນຄວາມກ້າວໜ້າຂອງປະຊາຊົນຈີນແລະຊົນຊາດຈີນ. ນອກນີ້, ທ່ານສີຈິ້ນຜິງຍັງຊີ້ອອກວ່າ, ກ່ອນໜ້ານີ້ 70 ປີ, ການສະຖາປະນາຂອງສປ ຈີນໄດ້ປ່ຽນແປງໂຊກຊາຕາທີ່ໜ້າສັງເວດທີ່ທຸກຍາກລຳບາກ ແລະ ຖືກຂົ່ມເຫັງ 100 ກວ່າປີ. ພາຍຫຼັງປະຫວັດສາດກ້າວເຂົ້າສູ່ສະໄໝໃໝ່, ຊົນຊາດຈີນໄດ້ກ້າວໄປສູ່ເສັ້ນທາງກວ້າງໃຫຍ່ທີ່ບັນລຸການຟື້ນຟູຄວາມຈະເລີນຮຸ່ງເຮືອງຄືນໃຫມ່ທີ່ຍິ່ງໃຫຍ່.
    ທ່ານສີຈິ້ນຜິງກ່າວເນັ້ນຕື່ມອີກວ່າ: ບົນເສັ້ນທາງກ້າວໜ້າຂອງຈີນ, ຕ້ອງຍຶດໝັ້ນການນຳພາຂອງພັກກອມມູນິດຈີນ, ຍຶດໝັ້ນຖານະໃຈກາງຂອງປະຊາຊົນ, ຍຶດໝັ້ນເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ຜັນຂະຫຍາຍ ແລະຈັດຕັ້ງປະຕິບັດທິດສະດີພື້ນຖານ, ເສັ້ນທາງພື້ນຖານແລະຍຸດທະສາດພື້ນຖານຂອງພັກກອມມູນິດຈີນ, ຕອນສະໜອງຕາມຄວາມມຸ້ງມາດປາຖະໜາຂອງປະຊາຊົນທີ່ມີຕໍ່ຊີວິດການເປັນຢູ່ທີ່ດີ ແລະສ້າງຜົນສຳເລັດໃໝ່ອັນຍິ່ງໃຫຍ່ຄັ້ງປະຫວັດສາດຢ່າງບໍ່ຢຸດຢັ້ງ. ຂະນະດຽວກັນທ່ານຍັງກ່າວຕື່ມວ່າ: "ບົນເສັ້ນທາງກ້າວເດີນໄປໜ້າ, ພວກເຮົາຕ້ອງຍຶດໝັ້ນທິດທາງ "ໂຮມປະເທດຊາດເຂົ້າເປັນເອກະພາບກັນໂດຍສັນຕິແລະປະເທດດຽວສອງລະບອບ", ປົກປັກຮັກສາຄວາມຈະເລີນຮຸ່ງເຮືອງແລະສະຖຽນລະພາບຖາວອນຂອງຮົງກົງແລະມາກາວ, ຊຸກຍູ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນໃຫ້ຂະຫຍາຍຕົວໂດຍສັນຕິ, ສາມັກຄີພີ່ນ້ອງປະຊາຊາດຈີນທຸກຖ້ວນໜ້າ, ສືບຕໍ່ບາກບັ່ນສູ້ຊົນເພື່ອໂຮມປະເທດຊາດເຂົ້າເປັນເອກະພາບກັນຢ່າງສົມບູນ. ບົນເສັ້ນທາງກ້າວເດີນໄປໜ້າ, ພວກເຮົາຕ້ອງຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ປະຕິບັດຍຸດທະສາດເປີດປະຕູສູ່ພາຍນອກແບບຕ່າງຝ່າຍຕ່າງມີຜົນປະໂຫຍດ, ສືບຕໍ່ຮ່ວມກັບປະຊາຊົນບັນດາປະເທດ ພື່ອຮ່ວມກັນຊຸກຍູ້ການຮ່ວມກັນສ້າງປະຊາຄົມຮ່ວມຊາຕາກຳມວນມະນຸດ."
    ໃນເວລາກ່າວຄຳປາໄສ, ຜູ້ນຳສູງສຸດຂອງຈີນໄດ້ຮຽກຮ້ອງໃຫ້ປະຊາຊົນທົ່ວປະເທດຈົ່ງສາມັກຄີເປັນປຶກແຜ່ນແໜ້ນໜາ ເພື່ອບັນລຸການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນ. ທ່ານກ່າວວ່າ: "ຈີນໃນອະດີດໄດ້ຈາລຶກໄວ້ໃນປະຫວັດສາດຂອງມວນມະນຸດ, ແລະຊູ່ມື້ນີ້ ປະຊາຊົນຈີນ1.400 ລ້ານຄົນພວມສ້າງສາພັດທະນາໃຫ້ກ້າວຂຶ້ນເລື້ອຍໆ, ຈີນໃນອະນາຄົດຍ່ອມຈະສວຍດີງາມກວ່າເກົ່າ. ທົ່ວພັກ, ທົ່ວກອງທັບແລະ ປະຊາຊົນບັນດາເຜົາໃນທົ່ວປະເທດຕ້ອງສາມັກຄີຢ່າງແໜ້ນແຟ້ນກວ່າເກົ່າ, ບໍ່ລືມອຸດົມການແຕ່ຫົວທີ, ຈົດຈຳພາລະກຳ, ສືບຕໍ່ພັດທະນາແລະ ປັບປຸງສາທາລະນະລັດປະຊາຊົນຈີນຂອງພວກເຮົາໃຫ້ດີຂຶ້ນກວ່າເກົ່າ, ສືບຕໍ່ບາກບັ່ນສູ້ຊົນເພື່ອບັນລຸເປົ້າໝາຍສູ້ຊົນ "ໜຶ່ງຮ້ອຍປີສອງເຫດການ", ບາກບັ່ນສູ້ນຊົນເພື່ອບັນລຸຄວາມໃຝ່ຝັນຂອງຈີນທີ່ຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນ."
(ຂ່າວຈາກ: CRI)