ສິງ­ກະ­ໂປ  ເປັນ​ປະ­ເທດ​ທີ່​ມີ​ຄວາມ​ສາ­ມາດ​ດ້ານ​ການ​ແຂ່ງ­ຂັນ

 

 

11.10.2019 9:10     

   ຂ່າວ​ຕ່າງປະເທດ​ລາຍ​ງານ​ໃນ​ວັນ​ທີ 9 ຕຸລາ​ຜ່ານມາ ວ່າ: ຜົນ​ການ​ຈັດ​ອັນ​ດັບ​ເວທີ​ປຶກສາ​ຫາລື​ເສດຖະກິດ​ໂລກ (World Economic Forum) ໄດ້​ຍົກ​ໃຫ້ ສິງກະໂປ ເປັນ​ປະເທດ​ທີ່​ມີ​ຄວາມ​ສາມາດ​ດ້ານ​ການ​ແຂ່ງຂັນ​ທາງ​ທຸລະ​ກິດ​ສູງ​ທີ່​ສຸດ ໂດຍ​ແຊງ​ໜ້າ​ອາ​ເມ​ຣິ​ກາ.

   ປີ​ນີ້, World Economic Forum ໄດ້​ຍົກ​ໃຫ້ສິງກະໂປ ເປັນ​ປະເທດ​ທີ່​ມີ​ຄວາມ​ສາມາດ​ດ້ານການ​ແຂ່ງຂັນ​ສູງ​ສຸດ ຊຶ່ງ​ລື່ນ​ກາຍ​ອາ​ເມ​ຣິ​ກາ ຈາກ​ຄວາມ​ພ້ອມ​ດ້ານ​ພື້ນຖານ​ໂຄງ​ລ່າງ, ຕະຫຼາດ​ແຮງ​ງານ ແລະ ການ​ພັດທະນາ​ລະບົບ​ການ​ເງິນ. ການ​ຈັດ​ອັນ​ດັບ World Economic Forum ໄດ້​ປະ​ເມີນ​ທ່າແຮງ​ຂອງ 141 ປະເທດ ແລະ ເຂດ​ແຄວ້ນ​ໃນ​ທົ່ວ​ໂລກ. ສຳລັບ​ເຂດ​ປົກຄອງ​ທີ່​ມີ​ຄວາມ​ສາມາດ​ດ້ານ​ການ​ແຂ່ງຂັນ​ສູງ​ສຸດ​ເປັນ​ອັນ​ດັບ 3 ແມ່ນ​ເຂດບໍ​ລິມ​ຫານ​ພິເສດ​ຮົງ​ກົງ, ເລື່ອນ​ຂຶ້ນ​ຈາກ​ອັນ​ດັບ​ທີ 7 ໃນ​ປີ​ກາຍ​ນີ້. ຈາກ​ຄວາມ​ໂດດ​ເດັ່ນ​ດ້ານ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ ແລະ ການ​ພັດທະນາ​ສາທາລະນະ​ສຸກ. ສ່ວນ​ຍີ່ປຸ່ນ ຫຼຸດ​ຈາກ​ອັນ​ດັບ 5 ລົງ​ມາ​ເປັນ​ອັນ​ດັບ 6 ຈາກ​ຈຸດ​ເດັ່ນ​ດ້ານ​ອັດຕາ​ການ​ເກີດ​ອາ​ຊະ​ຍາ​ກຳ​ຕໍ່າ, ສາທາລະນະ​ສຸກ ແລະ ພື້ນຖານ​ໂຄງ​ລ່າງ.

   ໃນ​ຂະນະ​ທີ່​ຫວຽດນາມ ເປັນ​ປະເທດ​ທີ່​ກ້າວ​ກະໂດດ​ທີ່​ສຸດ ໂດຍ​ຂຶ້ນ​ຈາກ​ອັນ​ດັບ 77 ມາ​ຢູ່​ອັນ​ດັບ​ທີ 67. ລາຍ​ງານ​ຍັງ​ລະບຸ​ອີກ​ວ່າ: ອາຊີ - ປາ​ຊີ​ຟິກ ເປັນ​ເຂດ​ທີ່​ມີ​ຄວາມ​ສາມາດ​ໃນ​ການ​ແຂ່ງຂັນ​ທາງເສດຖະກິດ​ສູງ​ທີ່​ສຸດ​ໃນ​ໂລກ.