ການ​ນຳ​ເຂົ້າ­ຂອງ​ມາ​ເລ​ເຊຍ ຫຼຸດ​ລົງຕາໍ່​ສຸດ​ໃນ​ຮອບ 10 ປີ

 

 

11.10.2019 9:13     

   ຂ່າວ​ຕ່າງປະເທດ​ລາຍ​ງານ​ວ່າ: ຍອດ​ການ​ນຳ​ເຂົ້າຂອງ​ມາ​ເລ​ເຊຍ ປັບ​ໂຕ​ຫຼຸດ​ລົງ​ຫຼາຍ​ທີ່​ສຸດ​ໃນ​ຮອບ 10 ປີ, ນັບ​ແຕ່​ປີ 2009 ເນື່ອງ​ຈາກ​ຄວາມ​ຕ້ອງການ​ສິນຄ້າ​ຫຼຸດ​ລົງ, ເປັນ ​ສັນຍານ​ບົ່ງ​ຊີ້​ວ່າ: ການ​ເຕີບ​ໂຕ​ຂອງ​ເສດຖະກິດມາເລເຊຍ ຈະ​ຊ້າ​ລົງ​ໃນ​ຊຸມ​ເດືອນ​ຕໍ່ໜ້າ ນີ້. ຍອດ​ການ​ນຳ​ເຂົ້າ​ຫຼຸດ​ລົງ 12,5% ໃນ​ເດືອນ​ສິງຫາ​ເມື່ອ​ທຽບ ​ລາຍ​ປີ ຊຶ່ງ​ຫຼາຍ​ກວ່າ​ໂຕ​ເລກ ​ການ​ຄາດ​ຄະເນ​ຂອງການ​ ວິເຄາະ​ຢູ່​ໃນ​ລະດັບ 8%. ສ່ວນ ​ຍອດ​ການ​ສົ່ງ​ອອກ​ຫຼຸດລົງ 0,8%, ກົງກັນຂ້າມ​ກັບ​ນັກ​ວິ ເຄາະ​ຄາດ​ວ່າຈະ​ປັບ​ຕົວ​ຂຶ້ນ 2,7%.

   ລາຍ​ງານ​ລະບຸ​ວ່າ: ຍອດ​ການ​ນໍາ​ເຂົ້າ​ສິນຄ້າ​ປະເພດ​ຕ່າງໆ​ຫຼຸດລົງ 31% ໃນ​ເດືອນ​ສິງຫາ ເນື່ອງ​ຈາກ​ຍອດ​ຊື້​ຊິ້ນ​ສ່ວນ ແລະ ອຸປະກອນ​ເຄື່ອງ​ຈັກ ປັບ​ໂຕ​ຫຼຸດ​ລົງ. ສ່ວນ​ຍອດ​ນຳ​ເຂົ້າ​ສິນຄ້າ​ອຸປະໂພກ, ບໍລິໂພກ ຫຼຸດ​ລົງ 12,8%. ໃນ​ຂະນະ​ທີ່​ຍອດ​ການ​ສົ່ງ​ອອກ​ສິນຄ້າ​ກະສິກຳ ປັບ​ໂຕ​ເພີ່ມ​ຂຶ້ນ 13% ໂດຍ​ສະເພາະ​ແມ່ນ​ນ້ຳມັນ​ປາມ. ເນື່ອງ​ຈາກ​ຈີນ​ປັບ​ຍອດ​ສັ່ງ​ຊື້​ຂຶ້ນ​ເປັນ​ສອງ​ເທົ່າ.

   ມາ​ເລ​ເຊຍ ກຽມ​ເປີດເຜີຍ​ງົບປະມານ​ເພີ່ມ​ເຕີມ​ໃນ​ວັນ​ທີ 11 ຕຸລາ​ນີ້, ເພື່ອ​ຮັບ​ມື​ກັບ​ຜົນ​ກະທົບ​ຂອງ​ສົງຄາມ​ການ​ຄ້າ ໂດຍ​ຄາດ​ຄະເນ​ວ່າ: ເສດຖະກິດ​ຈະ​ຊ້າ​ລົງ​ຢູ່​ໃນ​ລະດັບ 4,3% ໃນ​ປີ 2020, ຈາກ​ລະດັບ​ການ​ຄາດ​ຄະເນ​ຂອງ​ປີ​ນີ້​ຢູ່​ທີ່ 4,5%. ຂໍ້​ມູນ​ທັງ​ໝົດ​ຊີ້​ໃຫ້​ເຫັນ​ວ່າ: ສົງຄາມ​ການ​ຄ້າ ລະຫວ່າງ ອາ​ເມ​ຣິ ກາ​ ແລະ ຈີນ ສົ່ງ​ຜົນ​ກະທົບ​ຕໍ່​ ເສດ ຖະກິດ​ຂອງ​ມາ​ເລ​ເຊຍຢ່າງ ​ຫຼວງ​ຫຼາຍ. ນັກ​ວິເຄາະ​ໄດ້​ກ່າວ​ເຕືອນ​ວ່າ: ຄວາມ​ສ່ຽງ​ຈາກ​ປັດ ໄຈ​ຕ່າງໆ​ທົ່ວ​ໂລກ ຈະ​ສ້າງ​ແຮງ​ກົດ​ດັນ​ຕໍ່​ການ​ສົ່ງ​ອອກ ແລະ ການ​ບໍລິໂພກ ໃນ​ໄລຍະ​ທ້າຍ​ຂອງ​ປີ​ນີ້.