ຈີນ​-​ອິນ​ເດຍ ວາງ​ແຜນ​ພັດ­ທະ­ນາ​ຍຸດ­ທະ­ສາດ​ລະ­ຫວ່າງ​ສອງ​ປະ­ເທດ

 

 

15.10.2019 9:33     

ຮຽບຮຽງ​ໂດຍ​​ : ສີ​ວັນ

   ການ​ພົບ​ປະ​ບໍ່​ເປັນ​ທາງ​ການ ລະຫວ່າງ ຜູ້ນຳ​ຈີນ​-​ອິນ​ເດ​ຍ​ຄັ້ງ​ທີ 2 ຢູ່​ນະຄອນ​ເຊັນ​ນາຍ ທາງ​ພາກ​ໃຕ້​ອິນ​ເດຍ ໃນ​ລະຫວ່າງ ວັນ​ທີ 11 - 12 ຕຸລາ​. ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ແລະ ທ່ານ ນາ​ເຣັນ​ດຣາ ໂມ​ດີ ນາຍົກລັດຖະມົນຕີ​ອິນ​ເດຍ ໄດ້​ແລກປ່ຽນ​ຄວາມ​ຄິດ​ຢ່າງ​ກົງ​ໄປ​ກົງ​ມາ ແລະ ເລິກເຊິ່ງ​ກ່ຽວ​ກັບ​ການ​ພົວພັນ​ຈີນ​-​ອິນ​ເດຍ, ບັນຫາ​ສາກົນ ແລະ ພາກ​ພື້ນ​ທີ່​ສຳຄັນ ຊຶ່ງ​ສອງ​ຝ່າຍ​ສົນໃຈ​ຮ່ວມ​ກັນ.

   ຕາມ​ແຫຼ່ງ​ຂ່າວ​ຈາກ​ຊີ​ອາ​ໄອ, ໃນ​ເວລາ​ພົບ​ປະ, ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ຕ້ອງ​ວາງ​ແຜນການ​ພັດທະນາຮ້ອຍ​ປີ ລະຫວ່າງ ສອງ​ປະເທດ ຈາກ​ດ້ານ​ຍຸດທະສາດ ແລະ ດ້ານ​ຍາວ​ໄກ, ເພີ່ມ​ພະລັງ​ແຮງ​ເຂົ້າ​ໃນ​ການ​ຂະຫຍາຍ​ການ​ພົວພັນ ຈີນ​-​ອິນ​ເດຍ ຢ່າງ​ແຂງ​ແຮງ.

   ໃນ​ການ​ພົບ​ປະ​ບໍ່​ເປັນ​ທາງ​ການ​ຄັ້ງ​ນີ້, ຜູ້ນຳ​ສອງ​ປະເທດ ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ​ຢ່າງ​ກວ້າງຂວາງ​ກ່ຽວ​ກັບ​ຫຼາຍ​ຫົວຂໍ້​ເຊັ່ນ: ຄວາມ​ໝັ້ນຄົງ​ດ້ານ​ຍຸດທະສາດ, ເສດຖະກິດ, ການ​ຄ້າ​-​ການ​ລົງທຶນ, ການ​ແລກປ່ຽນ​ດ້ານ​ວັດທະນະທຳ, ການ​ຮ່ວມ​ມື​ສາກົນ ແລະ ພາກ​ພື້ນ. ກ່ອນ​ອື່ນ​ໝົດ, ຜູ້ນຳ​ທັງ​ສອງ ລ້ວນ​ແຕ່​ເຫັນ​ວ່າ: ການ​ທີ່​ມີ​ຄວາມ​ເຫັນ​ຕໍ່​ການ​ພັດທະນາ​ຂອງ​ກັນ ແລະ ກັນ​ຢ່າງ​ຖືກຕ້ອງ, ເພີ່ມ​ທະວີ​ຄວາມ​ໄວ້​ເນື້ອ​ເຊື່ອ​ໃຈ​ກັນ​ດ້ານ​ຍຸດທະສາດ​ຢ່າງ​ບໍ່​ຢຸດ​ຢັ້ງ​ນັ້ນ, ແມ່ນ​ຂໍກຸນແຈ​ທີ່​ຮັບປະກັນ​ການ​ພົວພັນ ລະ ຫວ່າງ ສອງ​ປະເທດ​ມີ​ການ​ຂະ ຫຍາຍຕົວ​ຢ່າງ​ຕໍ່​ເນື່ອງ ແລະ ໜັກ​ແໜ້ນ. ອັນ​ທີ​ສອງ; ພື້ນ ຖານ​ສຳຄັນ​ໃນ​ການ​ພົວພັນ​ລະ ຫວ່າງ​ສອງ​ປະເທດ ແມ່ນ​ການ​ຮ່ວມ​ມື​ດ້ານ​ເສດຖະກິດ​ການ​ຄ້າ​ລະຫວ່າງ ຈີນ​-​ອິນ​ເດຍ ມີ​ອະນາຄົດ​ຢ່າງ​ກວ້າງ​ຂວາງ. ນອກ​ນີ້, ຜູ້ນຳ​ສອງ​ປະເທດ ໄດ້​ຕົກລົງ​ວ່າ: ຈະ​ຮ່ວມ​ກັນ​ລິ​ເລີ່ມ ແລະ ຊຸກຍູ້​ການ​ແລກປ່ຽນ, ການ​ສົນທະນາ​ກັນ ລະຫວ່າງ ອະ ລິຍະ​ທຳ​ທີ່​ຕ່າງ​ກັນ ເພື່ອ​ເຮັດ​ໃຫ້​ອະລິຍະ​ທຳ​ອາຊີ​ມີ​ຄວາມ​ຈະເລີນ​ກ້າວໜ້າ​ໃໝ່.

   ສິ່ງ​ທີ່​ໜ້າ​ສົນໃຈ​ທີ່​ສຸດ ແມ່ນ​ຜູ້ນຳ​ສອງ​ປະເທດ​ເນັ້ນວ່າ: ຈະ​ຮ່ວມ​ມື​ກັນ​ຊຸກຍູ້​ໃຫ້​ບັນລຸ "ສັນຍາ​ວ່າ​ດ້ວຍ​ການ​ພົວພັນ​ຄູ່​ຮ່ວມ​ເສດຖະກິດ​ຮອບດ້ານ​ໃນ​ພາກ​ພື້ນ" ໂດຍ​ໄວ​ເທົ່າ​ທີ່​ຈະ​ໄວ​ໄດ້, ເພີ່ມ​ທະວີ​ການ​ຮ່ວມ​ມື​ດ້ານ​ການ​ເຊື່ອມ​ໂຍງ​ໃນ​ພາກ​ພື້ນ  ຊຶ່ງ​ມີ​ຄວາມ​ໝາຍ​ອັນ​ຕັ້ງໜ້າ​ໃນ​ການ​ລົງ​ເລິກ​ຂະບວນ​ການ​ທີ່​ເຮັດ​ໃຫ້​ເສດຖະກິດ​ພາກ​ພື້ນ​ຫັນ​ເປັນ​ອັນ​ໜຶ່ງ​ອັນ​ດຽວ ແລະ ຮັບ​ມື​ກັບ​ການ​ກະທົບ​ຈາກ​ການ​ຄັດຄ້ານ​ໂລກາ​ພິ​ວັດ.ເມື່ອ​ຫຼາຍ​ປີ​ກ່ອນ, ນັກ​ວິເຄາະ​ຊີ້​ໃຫ້​ເຫັນ​ວ່າ: ການ​ເຕີບ​ໂຕ​ຂຶ້ນ​ຮ່ວມ​ກັນ​ຂອງ​ຈີນ ແລະ ອິນ​ເດຍ, ຈະ​ເປັນ​ເຫດການ​ທີ່​ສຳຄັນ​ທີ່​ສຸດ​ໃນ​ປະຫວັດສາດ​ມວນ​ມະນຸດ​ໃນ​ສະຕະວັດ​ທີ 21. ຈີນ ແລະ ອິນ​ເດຍ ເປັນ​ເພື່ອນ​ບ້ານ​ໃກ້​ຄຽງ​ທີ່​ແຍກ​ບໍ່​ໄດ້, ຖ້າວ່າ​ສອງ​ປະເທດ​ສາມາດ​ພິຈາລະນາ ແລະ ກຳນົດ​ທິດ​ທາງ​ການ​ພົວ ພັນ​ລະຫວ່າງ​ສອງ​ຝ່າຍ​ຈາກ​ມຸມ​ສູງ​ແຫ່ງ​ຍຸດທະສາດ​ໄດ້, ກໍ​ຈະ​ສາມາດ​ແກ້​ໄຂ​ຄວາມ​ຂັດ​ແຍ່ງ​ຢ່າງ​ເໝາະ​ສົມ ແລະ​ບັນລຸ​ການ​ພັດທະນາ​ຮ່ວມ​ກັນ​ທີ່​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ.

   ສອງ​ຝ່າຍ​ລ້ວນ​ແຕ່​ເຫັນ​ວ່າ: ຄວນ​ສະໜັບສະໜູນ ແລະ ເພີ່ມ​ທະວີ​ລະບົບ​ການ​ຄ້າ​ຫຼາຍ​ຝ່າຍ​ບົນ​ພື້ນຖານ​ຫຼັກການ​ໃນ​ປັດ​ຈຸ​ບັນ. ຈີນ​-​ອິນ​ເດຍ ຈະ​ສືບຕໍ່​ຊຸກຍູ້​ໃຫ້​ບັນລຸ​ການ​ຄ້າ​ແບບ ເປີດ​ປະຕູ ແລະ ກວມ​ລວມ, ໃຫ້​ທຸກ​ປະເທດ​ໄດ້​ຮັບ​ຜົນ​ປະ ໂຫຍດ​ນຳ​ກັນ. ຜູ້ນຳ​ທັງ​ສອງ​ເຫັນ​ວ່າ: ສອງ​ປະເທດ​ຄວນ​ສຸມ​ໃສ່​ການ​ໂຈມ​ຕີ​ລັດທິ​ກໍ່​ການ​ຮ້າຍ​ທຸກ​ຮູບ​ແບບ, ຮຽກຮ້ອງ​ໃຫ້​ບັນດາ​ປະເທດ ເພີ່ມ​ທະວີ​ການ​ຮ່ວມ​ມື​ ເພື່ອ​ຕ້ານ​ການ​ກໍ່​ການ​ຮ້າຍ. ຈີນ ແລະ ອິນ​ເດຍ ຄວນ​ເພີ່ມ​ທະວີ​ການ​ສົນທະນາ​ກັນ, ໃຫ້​ປະຊາຊົນ​ສອງ​ປະເທດ​ເພີ່ມ​ຄວາມ​ເຂົ້າໃຈ​ຕໍ່​ວັດທະນະທຳ​ຊຶ່ງ​ກັນ ແລະ ກັນ. ສອງ​ຝ່າຍ​ຄວນ​ຮ່ວມ​ກັນ​ຊຸກຍູ້​ການ​ສົນທະນາ ແລະ ຄວາມ​ເຂົ້າໃຈ​ລະຫວ່າງ ວັດທະນະທຳ ແລະ ອາ​ລິ​ຍະ​ທຳ​ທີ່​ຕ່າງ​ກັນ. ຜູ້ນຳ​ສອງ​ປະເທດ​ໄດ້​ຢືນຢັນ​ວ່າ: ສະພາບ​ແວດ​ລ້ອມ​ທີ່​ເປີດປະຕູ​ສູ່​ພາຍ​ນອກ, ການ​ໂອບ​ເອື້ອ​ອາລີ, ຄວາມ​ຈະເລີນ​ຮຸ່ງເຮືອງ ແລະ ຄວາມ​ໝັ້ນຄົງ, ການ​ເຊື່ອມ​ຈອດ​ກັນ​ທີ່​ສົມບູນ​ກວ່າ​ເກົ່າ ແມ່ນ​ມີ​ຄວາມ​ໝາຍ​ສຳຄັນ​ຕໍ່​ຄວາມ​ຈະເລີນ​ຮຸ່ງເຮືອງ ແລະ ຄວາມ​ໝັ້ນຄົງ​ຂອງ​ພາກ​ພື້ນ. ຈີນຍິນດີ​ຮ່ວມ​ກັບ​ອິນ​ເດຍ ແລະ ປະເທດທີກ່ຽວຂ້ອງ​ຕັ້ງໜ້າ​ຊຸກຍູ້​ການຮ່ວມມືລະ ຫວ່າງ​ຈີນ​-​ອິນ​ເດ​ຍ-​ມຽນ​ມາ-​ບັງ​ກລາເດັດ ເພື່ອ​ລົງ​ເລິກການຮ່ວມ​ມື​ເສດ ຖະກິດ ລະ ຫວ່າງ ສອງ​ປະເທດ​ຕື່ມ​ອີກ. ນອກຈາກ​ນີ້, ຜູ້ນຳ​ສອງ​ປະເທດ​ໄດ້​ເຫັນ​ດີ​ຜ່ານ​ການ​ຄົ້ນຄວ້າ​ສ້າງ "ການ​ພົວພັນ​ຄູ່​ຮ່ວມ​ດ້ານ​ຂະແໜງການການ ​ຜະລິດ", ສົ່ງເສີມ​ສອງ​ຝ່າຍ​ລົງທຶນ​ຢູ່​ປະ ເທດ​ຂອງ​ກັນໃນ​ຂົງເຂດ​ທີ່​ມີກຳລັງ​ບົ່ມ​ຊ້ອນ ແລະ ກຳນົດ​ເຈົ້າ​ໜ້າທີ່​ທີ່​ກ່ຽວ ຂ້ອງ ເພື່ອ​ຊຸກຍູ້​ໂຄງ​ຄວາມ​ຄິດ​ດັ່ງກ່າວ ໃນ​ກອງ​ປະຊຸມ​ກົນ​ໄກ​ສົນທະນາ​ດ້ານ​ເສດຖະກິດ​ການ​ຄ້າ​ລະດັບ​ສູງ. ຜູ້ນຳ​ສອງ​ປະເທດ ໄດ້​ກ່າວຢ້ຳ​ຄວາມຮັບ ​ຮູ້​ທີ່​ເປັນ​ເອກະ​ພາບກັນ​ທີ່​ ໄດ້​ຕົກລົງ​ໃນ​ການ​ພົບ​ປະ​ຢ່າງ​ບໍ່​ເປັນ​ທາງ​ການ​ຄັ້ງ​ທຳອິດ​ທີ່​ຈັດ​ຂຶ້ນ​ຢູ່​ນະຄອນ​ອູ​ຮັ້ນ​ແຂວງ​ຫູ​ເປ​ ຂອງ​ຈີນ, ໃນ​ເດືອນ​ເມສາ ປີ 2018, ຈີນ ແລະ ​ອິນ​ເດຍຕ່າງ​ ຊ່ວຍ​ຊູ​ຍູ້​ໜູນ​ກັນ​ໃນການ​ພັດ ທະນາ​ຊຶ່ງ​ກັນ ແລະ ກັນ, ແມ່ນ​ປັດ​ໄຈ​ໝັ້ນ​ທ່ຽງ​ໃນ​ສະຖານະ​ການ​ສາກົນ​ຄື​ປັດ​ຈຸ​ບັນ.