ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ອາ​ຊຽນ - ຈີນ ຄັ້ງ​ທີ 18

 

 

17.10.2019 9:40     

  ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ກອງ​ປະຊຸມ​ເຈົ້າໜ້າທີ່​ອາວຸໂສ​ອາ​ຊຽ​ນ-​ຈີນ ກ່ຽວ​ກັບ​ການ​ປະຕິບັດຖະ ແຫຼງການ​ວ່າ​ດ້ວຍ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະເລ​ຕາ ເວັນ​ອອກ (DOC)  ຄັ້ງ​ທີ 18 ໄດ້​ດຳເນີນ​ໃນ​ວັນ​ທີ 15 ຕຸລາ​ຜ່ານ​ມາ, ຢູ່ ນະຄອນ​ດາ​ລາດ ແຂວງ​ເລີມ​ດົມ ປະເທດ​ຫວຽດນາມ.

  ຂ່າວ​ລະບຸ​ວ່າ: ກອງ​ປະຊຸມ ລະຫວ່າງ ອາ​ຊຽນ ກັບ ຈີນ ເພື່ອ​ແນໃສ່​ສຳຫຼວດ​ກວດຄືນ​ສະພາບ​ການ​ຢູ່​ທະເລ​ຕາເວັນ​ອອກ, ປະຕິບັດ DOC ແລະ ສ້າງ​ກົດ​ແຫ່ງ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະເລ​ຕາເວັນ​ອອກ (COC). ກ່ຽວ​ກັບ​ສະພາບ​ການ​ຢູ່​ທະເລ​ຕາເວັນ​ອອກ, ກອງ​ປະຊຸມ​ໄດ້​ປຶກສາ​ຫາລື​ກ່ຽວ​ກັບ​ການ​ຜັນ​ແປ​ທີ່​ສັບສົນ​ຢູ່​ພື້ນ​ທີ່​ຕົວ​ຈິງ. ບັນດາ​ປະເທດ​ມີ​ຄວາມ​ວິຕົກ​ກັງວົນ​ຕໍ່​ສະພາບ​ເຄັ່ງ​ຕຶງ​ໃນ​ປັດຈຸບັນ, ບັນດາ​ປະເທດ​ອາ​ຊຽນ ເນັ້ນ​ໜັກ​ເຖິງ​ຫຼັກການ​ອົດ​ກັ້ນ, ບໍ່​ຫັນ​ເປັນ​ການ​ທະຫານ, ບໍ່​ມີ​ການ​ກະທຳ​ເຮັດ​ໃຫ້​ສະພາບ​ການ​ສັບສົນ​ຂຶ້ນ​ຕື່ມ, ບໍ່​ນຳ​ໃຊ້​ອາວຸດ ຫຼື ນາບ​ຂູ່​ການ​ນຳ​ໃຊ້​ອາວຸດ, ແກ້​ໄຂ​ຄວາມ​ຂັດ​ແຍ້ງ​ໂດຍ​ສັນຕິ​ວິທີ ບົນ​ຫຼັກການ​ກົດໝາຍ​ສາກົນ ແລະ ສົນທິສັນຍາ ສປຊ ວ່າ​ດ້ວຍ​ທະເລ​ປີ 1982.

  ກ່ຽວ​ກັບ​ການ​ປະຕິບັດ DOC, ກອງ​ປະຊຸມ​ເຫັນ​ດີ​ສືບຕໍ່​ພະຍາຍາມ​ຮັບປະກັນ​ການ​ປະຕິບັດ DOC ຢ່າງ​ຄົບ​ຖ້ວນ, ມີ​ປະສິດ​ທິ​ຜົນ. ກ່ຽວ​ກັບ​ການ​ເຈລະຈາ COC, ບັນດາ​ປະເທດ​ຢືນຢັນ ຄວນ​ເພີ່ມ​ທະວີ​ຄວາມ​ພະຍາຍາມ ເພື່ອ​ສ້າງ​ກົດ​ແຫ່ງ​ການ​ປະພຶດ​ໃຫ້​ມີ​ປະສິດ​ທິ​ຜົນ​ຢ່າງ​ແທ້​ຈິງ, ມີ​ຄຸນ​ນະ​ພາບ ອາດ​ຈະ​ສະກັດ​ກັ້ນ​ບັນດາ​ເຫດ​ທີ່​ເກີດ​ຂຶ້ນ​ຢ່າງ​ສັບສົນ​ຄື​ປັດ​ຈຸ​ບັນ.