ກະ­ຊວງ ຖວທ ຮ່ວມ​ກັບ​ສູນ­ວັດ­ທະ­ນະ­ທຳ ຈີນ - ລາວ ຈັດ​ກິດ­ຈະ­ກຳ​ສົ່ງ­ເສີມ​ການ­ທ່ອງ­ທ່ຽວ

 

 

17.10.2019 9:39     

ໂດຍ​​ : ຍຸ​ພິນ​ທອງ

  ກິດ​ຈະ​ກໍາ​ຮ່ວມ​ກັນ ສົ່ງ ເສີມ​ການທ່ອງທ່ຽວ​ລາວ​-​ຈີນ​ປີ 2019 ທີ່​ນະຄອນ​ຊ່າງ​ໄຮ່, ສະຖານທີ່​ທ່ອງ​ທ່ຽວ​ທາງ​ປະ ຫວັດສາດ ແລະ ວັດ​ທະ​ນະ​ທໍາ ຫຼື ເອີ້ນ​ວ່າ; "ເມືອງເກົ່າ ຍຸ້ຍ​ຢວນ", ແຕ່​ລະ​ມື້​ສະເລ່ຍ​ມີ​ແຂກ​ເຂົ້າ​ໄປ​ທ່ຽວ​ຊົມ​ປະມານ 8 ແສນ​ເທື່ອ​ຄົນ.

  ໃນ​ຕອນ​ເຊົ້າ​ຂອງ​ວັນ​ທີ 14 ຕຸລາ​, ທີ​ມ​ງານ​ສື່​ມວນ​ຊົນ​ລາວ ໄດ້​ໄປ​ຢ້ຽມ​ຊົມ​ສະຖານທີ່​ທ່ອງ​ທ່ຽວ​ທາງ​ປະຫວັດສາດ ແລະ ວັດ​ທະ​ນະ​ທໍາ ຫຼື ເອີ້ນ​ວ່າ; "ເມືອງເກົ່າ ຍຸ້ຍ​ຢວນ" ທີ່​ມີ​ອາຍຸ​ຍາວ​ນານ​ຫຼາຍ​ກວ່າ 500 ປີ, ທີ່​ນະຄອນ​ຊ່າງ​ໄຮ່ ແຫ່ງ ສປ.ຈີນ, ທີ່​ຍັງ​ຮັກສາ​ຢູ່​ໃນ​ສະພາບ​ທີ່​ສົມບູນ ໂດຍ​ໄດ້​ມີ​ການ​ບູລະນະ​ສ້ອມແປງ​ຄືນ​ເປັນ​ບາງ​ຈຸດ, ແຕ່​ຍັງ​ຄົງ​ຮັກສາ​ໄວ້​ຮູບຊົງ​ເດີມ ແລະ ສິລະ​ປະ​ລວດລາຍ​ດັ່ງ​ເດີມ ທີ່​ເປັນ​ເອກະລັກ, ຮັກສາ​ໄວ້​ໃຫ້​ຄົນ​ຮຸ່ນ​ຫຼັງ​ໄດ້​ສຶກສາ​ຄົ້ນ​ຄ້​ວາ​ຮໍ່າ​ຮຽນ​ຕໍ່​ໄປ. ເມືອງເກົ່າ ຫຼື ຍຸ້ຍ​ຢວນ ເປັນ​ສະຖານທີ່​ທ່ອງ​ທ່ຽວ​ທາງ​ດ້ານ​ວັດ​ທະ​ນະ​ທໍາ ທີ່​ໄດ້​ຮັບ​ຄວາມ​ສົນໃຈ​ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ​ປະເ​ທດ ໄດ້​ເຂົ້າ​ມາ​ທ່ຽວ​ຊົມ​ຕະຫຼອດ​ປີ ໂດຍ​ຄິດ​ສະເລ່ຍ​ວັນ​ໜຶ່ງ​ປະມານ 8 ແສນ​ເທື່ອ​ຄົນ ຖ້າ​ເປັນ​ມື້​ພັກ ວັນ​ເສົາ ແລະ ອາທິດ ແມ່ນ​ມີ​ຫຼາຍ​ກວ່າ 1 ລ້ານ​ເທື່ອ​ຄົນ​ຕໍ່​ວັນ.

  ໃນ​ຕອນ​ບ່າຍ​ຂອງ​ວັນ​ດຽວ​ກັນ ທີ​ມ​ງານ​ສື່​ມວນ​ຊົນ​ພວກ​ເຮົາ ຍັງ​ໄດ້​ພົບ​ປະ​ກັບ ທ່ານ ໂທ​ນີ ຮອງ​ປະທານ​ບໍລິສັດ​ທ່ອງ​ທ່ຽວ​ໂຢ​ເຄີ້ ແລະ ຮັບ​ຟັງ​ການ​ລາຍ​ງານ​ກ່ຽວ​ກັບ​ວຽກ​ງານ​ການ​ສົ່ງເສີມ​ປີ​ທ່ອງ​ທ່ຽວ​ລາວ​-​ຈີນ 2019 ພ້ອມ​ທັງ​ຢ້ຽມ​ຊົມ​ສະຖານທີ່​ເຮັດ​ວຽກ ແລະ ຫ້ອງ​ສະໝຸດ​ຂອງ​ບໍລິສັດ​ດັ່ງ​ກ່າວ. ທ່ານ ໂທ​ນີ ກ່າວ​ວ່າ: ຂໍ​ຖື​ໂອກາດ​ນີ້ ໂດຍ​ຜ່ານ​ສື່​ມວນ​ຊົນ​ລາວ ທີ່​ມາ​ຮ່ວມ​ກິດ​ຈະ​ກໍາ​ໃນ​ຄັ້ງ​ນີ້, ເພື່ອ​ເປັນ​ການ​ເຊື່ອມ​ຕໍ່ໃຫ້​ປະເທດ​ຈີນ ແລະ ປະເທດ​ລາວ ເພາະວ່າ​ຍັງ​ມີ​ນັກ​ລົງທຶນ​ຂອງ​ຈີນ​ມີ​ຄວາມ​ສົນໃຈ ຢາກ​ເຂົ້າ​ໄປ​ລົງທຶນ​ຢູ່​ລາວ ເພາະ​ຢູ່​ປະເທດ​ລາວ ຍັງ​ມີ​ຫຼາຍ​ສິ່ງ​ຫຼາຍ​ຢ່າງ​ທີ່​ໜ້າ​ສົນໃຈ ສາມາດ​ພັດທະນາ​ເປັນ​ລະບົບ​ເສດຖະກິດ​ໄດ້ ໂດຍ​ໃຫ້​ທຸກ​ພາກສ່ວນ​ໄດ້​ເຮັດ​ວຽກ​ຮ່ວມ​ກັນ ແລະ ສິ່ງ​ສໍາ​ຄັນ​ປະເທດ​ລາວ ຍັງ​ມີ​ຊັບ​ພະຍາ​ກອນ​ທໍາ​ມະ​ຊາດ, ແຫຼ່ງ​ທ່ອງ​ທ່ຽວ​ວັດ​ທະ​ນະ​ທໍາ​ທີ່​ອຸດົມສົມບູນ, ຜູ້​ຄົນ​ທີ່​ມີ​ນໍ້າ​ໃຈ​ໄມຕີ​ຈິດ​ມິດຕະພາບ​ທີ່​ດີ ເປັນ​ສິ່ງ​ທີ່​ຫຼາຍ​ຄົນ​ຍັງ​ບໍ່​ເຄີຍ​ພົບພໍ້​ໃນ​ປະເທດ​ອື່ນ ແລະ ຖື​ວ່າ: ປະເທດ​ລາວ ເປັນ​ປະ​ເ​ທດ​ໜຶ່ງ ທີ່​ມີ​ຊັບ ພະຍາກອນ​ທີ່​ອຸດົມສົມບູນ, ມີ​ທ່າແຮງ​ສາມາດ​ດຶງ​ດູດ​ນັກ​ທ່ອງ​ທ່ຽວ​ຢູ່​ເມືອງ​ໃຫຍ່​ເຊັ່ນ: ນະຄອນ​ຊ່າງ​ໄຮ່, ກວາງ​ໂຈວ ແລະ ເມືອງ​ອື່ນໆ ທີ່​ໄດ້​ມີ​ການ​ພັດ​ທະ​ນາ. ເມື່ອ​ໄດ້​ມາ​ເຫັນ​ປະເທດ​ລາວ ກໍ​ເກີດ​ມີ​ຄວາມ​ສົນໃຈ​ຢາກ​ມາ​ທ່ຽວ​ປະເທດ​ລາວ​ຕື່ມ​ອີກ.

  ນອກຈາກ​ນັ້ນ, ໃນ​ຕອນ​ຄໍ່າ​ຂອງ​ວັນ​ດຽວ​ກັນ, ທີ​ມ​ງານ​ສື່​ມວນ​ຊົນ ພ້ອມ​ຄະນະ ໄດ້​ຂີ່​ກໍາ​ປັ່ນ​ທີ່​ເປັນ​ການ​ບໍລິການ​ນໍາ​ທ່ຽວ​ຢູ່​ທີ່​ແມ່​ນໍ້າ​ຫວງ​ຟູ ເພື່ອ​ຢ້ຽມ​ຊົມ​ແສງ​ສີ​ຂອງ​ຕຶກ​ອາຄານ​ຢູ່​ສອງ​ຟາກ​ຝັ່ງ​ແມ່​ນໍ້າ​ໃນ​ຍາມ​ລາຕີ ພ້ອມ​ຖ່າຍ​ພາບ​ເພື່ອ​ເປັນ​ທີ່​ລະນຶກ ແລະ ເຕັມ​ໄປ​ດ້ວຍ​ອາກາດ​ທີ່​ສົດຊື່ນ​ຂອງ​ສາຍ​ລົມ​ເຢັນ​ຂອງ​ອາຍ​ນໍ້າ ຂອງ​ແມ່​ນໍ້າ​ຫວງ​ຟູ.