ສວນ​ສະ­ໜຸກ​ດິ​ສ​ນີ​ແລນ ຊ່າງ​ໄຮ່ ມີ​ຫຼາຍ​ກິດ­ຈະ­ກຳ​ໜ້າ​ສົນ­ໃຈ

23.10.2019 9:13     

   ມື້​ທີ​ສາມ​ທີ່​ທີ​ມ​ສື່​ມວນ ​ລາວ ໄດ້​ເຄື່ອນ​ໄຫວ​ທັດສະ ນະ​ສຶກສາ​ເກັບ​ກໍາ​ຂໍ້​ມູນເພື່ອ​ ໂຄສະນາ​ສົ່ງເສີມ​ການທ່ອງ ທ່ຽວ​ລາວ​-​ຈີນ ທີ່​ນະຄອນ​ຊ່າງ​ໄຮ່ ສປ ຈີນ, ລະຫວ່າງ​ວັນ​ທີ 14 ຫາ 24 ຕຸລາ​ນີ້, ໃນ​ໂອກາດ​ດັ່ງກ່າວ​ກໍ​ໄດ້​ໄປ​ຢ້ຽມ​ຊົມ​ສວນ​ສະໜຸກ ດິ​ສ​ນີ​ແລນ (Disney Land) ຊຶ່ງ​ສວນດັ່ງ​ກ່າວ​ໄດ້​ຮັບ​ຄວາມ​ສົນໃຈ​ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ມາ​ທ່ອງ​ທ່ຽວ​ຊົມ​ເປັນ​ຈໍາ​ນວນ​ຫຼວງຫຼາຍ ຊຶ່ງ​ສະຖານທີ່​ແຫ່ງ​ນີ້ ເປັນ​ອັນ​ດັບ​ທີ 6 ຂອງ​ໂລກ​ແຫ່ງ​ດຽວ​ຂອງ​ປະເທດ​ຈີນ. ສາມາດ​ສ້າງ​ລາຍ​ຮັບ​ໄດ້ 400 ລ້ານ​ຢວນ​ຕໍ່​ເດືອນ ຫຼື ປະມານ 500 ຕື້​ກວ່າ​ກີບ.

   ສວນ​ສະໜຸກ​ດິ​ສ​ນີ​ແລນ ໄດ້​ເປີດ​ໃຫ້​ບໍລິການ​ນັກ​ທ່ອງ​ທ່ຽວ​ຢ່າງ​ເປັນ​ທາງ​ການ​ໃນ​ປີ 2016 ມີ​ເນື້ອທີ່​ປະມານ 3.600 ກວ່າ​ກິໂລ​ຕາ​ແມັດ. ຈຸດປະສົງ​ໃນ​ການ​ສ້າງ​ສວນດັ່ງ​ກ່າວ ເພື່ອ​ໃຊ້​ເປັນ​ສະຖານທີ່​ທ່ອງ​ທ່ຽວ​ຄົບ​ວົງ​ຈອນ​ທີ່​ທັນ​ສະ​ໄໝ, ຈຸດ​ເດັ່ນ​ຂອງ​ສວນ​ດິ​ສ​ນີ​ແລນ​ແມ່ນ​ໄດ້​ລວບ​ລວມ​ເອົາ​ເຫດການ​ຕ່າງໆ ມາ​ສ້າງ​ຈໍາ​ລອງ ແລະ ສ້າງ​ເປັນ​ສາມ​ມິ​ຕິ​ໃຫ້​ມີ​ຄວາມ​ສົມຈິງ​ເໝືອ​ນ​ໄດ້​ເຂົ້າ​ໄປ​ຢູ່​ໃນ​ເຫດການ​ນັ້ນໆ​ຕົວ​ຈິງ ສິ່ງ​ສໍາ​ຄັນ​ຍັງ​ສອນ​ໃຫ້​ຄົນ​ເຮົາ​ຮູ້​ໄດ້​ເຖິງ​ຄວາມ​ທັນ​ສະ​ໄ​ໝ​ຂອງ​ວິ ທະຍາສາດ, ຮັກ​ທໍາ​ມະ​ຊາດ ແລະ ສິ່ງແວດລ້ອມ​ຕື່ມ​ອີກ. ພາຍ​ໃນ​ສວນ​ຍັງ​ໄດ້​ມີ​ກິດ​ຈະ​ກໍາ ແລະ ຈໍາ​ລອງ​ເຫດການໃຫ້​ ສົມຈິງ​ທຸກ​ປະການ​ເຊັ່ນ: ເຮືອນ​ຊົນເຜົ່າ, ບ້ານ​ກະ​ຕຸນ, ລົດໄຟ​ພະ​ຈົນ​ໄ​ພ, ອານາຈັກ​ໂຈນ​ສະ ຫຼັດ ແຈັກ​ສະ​ປາຍ​ໂລ ແລະ ມີ​ຫຼາຍ​ກິດ​ຈະ​ກໍາ​ທີ່​ໜ້າ​ຕື່ນ​ຕາ​ຕື່ນ​ໃຈ ແລະ ພິເສດ​ໃນ​ຍາມແລງ​ຈະ​ມີ​ຂະບວນ​ຄາ​ລາ​ວານ​ລົດ​ຂອງ​ບັນດາ​ຕົວ​ລະຄອນ​ຮູບເງົາ​ກະ​ຕູນ​ຕ່າງໆ ເພື່ອ​ໃຫ້​ນັກ​ທ່ອງ​ທ່ຽວ​ໄດ້​ສໍາ​ຜັດ​ແບບ​ສົມຈິງ ແລະ ມີ​ຄວາມສຸກ​ເພີດເພີນ. ສໍາ​ລັບ​ຜູ້​ທີ່​ມັກ​ຄວາມ​ຕື່ນເຕັ້ນ​ທ້າ​ທາຍ​ແມ່ນ​ແນະ​ນໍາ​ກິດ​ຈະ​ກໍາ​ຂີ່​ລົດຈັກ​ຄວາມ​ໄວ​ສູງ, ສາມ​ມິ​ຕິ​ ແລະ ​ອື່ນໆ.

   ທ່ານ ຖັງ ນັກ​ທ່ອງ​ທ່ຽວ​ຊາວ​ຈີນ ທີ່​ອາ​ໄສ​ຢູ່​ນະຄອນ​ຊ່າງ​ໄຮ່ ໄດ້​ເວົ້າ​ສູ່​ຟັງ​ວ່າ: ເປັນ​ຄັ້ງ​ທີ​ສອງ​ແລ້ວ​ທີ່​ໄດ້​ມາ​ທ່ອງ​ທ່ຽວ​ຊົມ​ສວນ​ສະໜຸກ​ດິ​ສ​ນີ​ແລນ ເຫັນ​ວ່າ​ເປັນ​ສະຖານທີ່​ທ່ອງ​ທ່ຽວ​ທີ່​ຫຼາຍ​ຄົນ​ມາ​ຮອດ​ຊ່າງ​ໄຮ່​ແລ້ວ​ຕ້ອງ​ໄດ້​ມາ​ທ່ຽວ​ເພາະ​ມີ​ຫຼາຍ​ສິ່ງ​ຫຼາຍ​ຢ່າງ​ທີ່​ໜ້າ​ສົນໃຈ ແລະ ມີ​ຄວາມ​ຕື່ນເຕັ້ນ, ສວຍ​ງາມ ເມື່ອ​ໄດ້​ມາ​ທ່ຽວ​ຊົມ​ແລ້ວ​ແມ່ນ​ຢາກ​ມາ​ທ່ຽວ​ຕື່ມ​ອີກ.
(ຂ່າວ: ຍຸ​ພິນ​ທອງ)