IMF ເຕືອນ​ກ່ຽວ​ກັບ​ການ​ປົກ​ປ້ອງ​ຜົນ​ປະ­ໂຫຍດ

24.10.2019 9:18     

   ຂ່າວ​ຕ່າງປະເທດ​ລາຍ​ງານ​ຫວ່າງ​ບໍ່​ດົນ​ມາ​ນີ້, ທ່ານ ນາງ ຄຣິ​ສ​ຕາ​ລິ​ນາ ຈໍ​ເຈຍ​ວາ ປະທານ​ກອງ​ທຶນ​ການ​ເງິນ​ສາກົນ ຫຼື IMF ຄົນ​ໃໝ່ ທີ່ຫາກໍເຂົ້າ​ຮັບ​ຕຳແໜ່ງ​ໃນ​ຕົ້ນ​ເດືອນ​ນີ້ ໃຫ້​ສຳພາດຕໍ່​ຜູ້​ສື່​ຂ່າວ NHK ຂອງ​ຍີ່ປຸ່ນ ໂດຍ​ກ່າວ ​ເຕືອນ​ເລື່ອງ​ການ​ປົກ​ປ້ອງ​ຜົນປະໂຫຍດດ້ວຍ​ການ​ຕັ້ງ ກຳແພງ​ພາສີ ເພື່ອ​ປົກ​ປ້ອງ​ອຸດສາຫະກຳ​ໃນ​ປະເທດ, ໃນ​ກໍລະນີ​ຂໍ້​ຂັດ​ແຍ່ງ​ທາງ​ການ​ຄ້າ ລະຫວ່າງສະຫະລັດ ແລະ ຈີນ ເປັນ​ຕົວຢ່າງ: ການ​ຜິດ​ຖຽງ​ກັນ ລະຫວ່າງ ສອງ​ປະເທດ​ມະຫາ​ອຳນາດ​ໄດ້​ເຮັດ​ໃຫ້​ຜະລິດ​ຕະ​ພັນ​ມວນ​ລວມ (GDP) ຂອງ​ໂລກ​ຫຼຸດ​ລົງ​ເຖິງ 0,8% ໃນ​ປີ​ທີ່​ຜ່ານ​ມາ.

   ຜູ້ອຳນວຍການ IMF, ຍັງ​ສະແດງ​ຄວາມ​ກັງວົນ​ຕໍ່​ເລື່ອງ ສະຫະລັດ ຈະ​ຕັ້ງ​ກຳແພງ​ພາສີ​ຕໍ່​ສິນຄ້າ​ນຳ​ເຂົ້າ​ຈາກ​ເອີ​ຣົບ​ບາງ​ລາຍການ ແຕ່​ກໍໄດ້​ສະແດງ​ຄວາມ​ຫວັງ​ວ່າ: ທັງ​ສອງ​ຝ່າຍ​ຈະ​ສາມາດ​ຊອກ​ຫາ​ວິທີ​ແກ້​ໄຂ​ຮ່ວມ​ກັນ​ໄດ້ ພ້ອມ​ທັງ​ກ່າວ​ວ່າ: ຫຼັງ​ສົງຄາມ​ໂລກ​ຄັ້ງ​ທີ 2 ເປັນຕົ້ນ​ມາ, ການ​ຄ້າ​ເສລີ​ຄື​ສິ່ງ​ທີ່​ຊ່ວຍ​ຫຼຸດຜ່ອນ​ຄວາມທຸກ​ຍາກ, ຍົກ​ສູງ​ລະດັບ​ມາດຕະຖານ​ການ​ຄອງ​ຊີບ ແລະ ນຳ​ຄວາມ​ສະ ຫງົບ​ສຸກ​ມາ​ໃຫ້​ຊາວ​ໂລກ.

   ສ່ວນ​ບັນຫາ​ເລື່ອງ​ສະກຸນ​ເງິນ​ດີ​ຈີ​ຕອນ ຫຼື ຄຣິບ​ໂຕ​ເຄີ​ເຣນ​ຊີ​ເຊິນ ລິບ​ຣາ​ຂອງ Facebook ນັ້ນ ທ່ານ ນາງ ຈໍ​ເຈຍ​ວາ ລະບຸ​ວ່າ: ຄະ​ນະ​ກໍາ​ມະ​ການ​ຄຸ້ມ​ຄອງ​ຂອງ​ແຕ່​ລະ​ປະເທດ ຕ້ອງ​ໄດ້​ຕິດຕາມ​ເບິ່ງ​ເພື່ອ​ໃຫ້​ໝັ້ນ​ໃຈ​ວ່າ ສະກຸນ​ເງິນ​ດີ​ຈີ​ຕອນ​ເຫຼົ່າ​ນີ້​ຖືກ​ນຳ​ໃຊ້​ຢ່າງ​ປອດ​ໄພ.