ນະ­ໂຍ­ບາຍ ແລະ ທິດ​ທາງ​ການ­ທ່ອງ­ທ່ຽວ​ຂອງ ສ.ເຊັກ

 

 

28.10.2019 9:47     

(ເນື່ອງ​ໃນ​ໂອ​ກາດ​ວັນ​ຊາດ ສ.ເຊັກ 28 ຕຸ​ລາ 2019)

ຮຽບຮຽງ​ໂດຍ​​ : ລຸ້ງ​ດາວ

   ປັດຈຸບັນ, ສ.ເຊັກ ພວມ​ດຳເນີນ​ງານ​ເພື່ອ​ປັບປຸງ​ໂຄງ​ສ້າງ​ໜ່ວຍ​ງານ​ດ້ານ​ການທ່ອງ ທ່ຽວ ໂດຍ​ພະຍາຍາມ​ສ້າງ​ການ​ຮ່ວມ​ມື ແລະ ປັບປຸງ​ການ​ເຮັດ​ວຽກ ລະຫວ່າງ ໜ່ວຍ​ງານ​ດ້ານ​ການ​ສົ່ງເສີມ ແລະ ພັດ ທະນາ​ການທ່ອງທ່ຽວ, ການ​ລົງທຶນ ແລະ ການ​ຄ້າ ພາຍໃຕ້​ ກອບ​ການ​ພັດທະນາ​ຕາມ​ຍຸດ ທະສາດ​ດ້ານ​ນະ​ວັດຕະ​ກຳ​ແຫ່ງ​ ຊາດ ໃນ​ໄລຍະ​ປີ 2019- 2030, ຈຸດປະສົງ​​ເພື່ອ​ເພີ່ມທະ ວີ​ການ​ຮ່ວມ​ມື ລະຫວ່າງ ໜ່ວຍ​ງານ​ສູນ​ກາງ ກັບ ທ້ອງຖິ່ນ ແລະ ພະແນກການ​ອື່ນໆ ທັງພາກ ​ລັດ ແລະ ເອກະ​ຊົນທີ່​ກ່ຽວ​ຂອງ ເພື່ອ​ໃຫ້​ບັນລຸ​ການ​ເຊື່ອມ​ໂຍງ​ດ້ານ​ການ​ຕະຫຼາດ, ການ​ຈັດ​ກິດ​ຈະ​ກໍາ​ຕ່າງໆ​ໃຫ້​ເໝາະ​ສົມ ສໍາ​ລັບ​ນັກ​ທ່ອງ​ທ່ຽວ ແລະ ສາມາດ​ກຳນົດ​ທິດ​ທາງ​ນະໂຍ ບາຍ, ການ​ພັດທະນາ ແລະ ຍົກ​ລະດັບ​ການທ່ອງທ່ຽວ​ໃນ​ປະ ເທດ​ໄດ້​ຢ່າງ​ມີ​ປະສິດ​ທິພາບ. ຮັກສາ​ລະດັບ​ການ​ເຕີບ​ໂຕ​ດ້ານ​ການທ່ອງທ່ຽວ​ຂອງ​ປະເທດ, ປັດຈຸບັນ ອຸດສາຫະກຳ​ການ ທ່ອງທ່ຽວ​ສາມາດ​ສ້າງ​ລາຍ​ໄດ້​ໃຫ້​ກັບ​ປະເທດ​ຫຼາຍ​ກວ່າ ດ້ານ​ກະ​ສິ​ກຳ. ພ້ອມ​ດຽວ​ກັນ, ເພື່ອ​ຂະຫຍາຍ​ຕະຫຼາດ ແລະ ຮອງ​ຮັບ​ນັກ​ທ່ອງ​ທ່ຽວ​ຈາກ​ທະວີບ​ຕ່າງໆ​ໃນ​ທົ່ວ​ໂລກ ໂດຍ​ສະເພາະ​ນັກ​ທ່ອງ​ທ່ຽວ​ຈາກ​ອິນ​ເດຍ ແລະ ອົສ​ຕຣາ​ລີ ທີ່​ມີ​ຈຳນວນ​ສູງ​ເຖິງ 95.000 ຄົນ ແລະ 86.000 ຄົນ ຕາມ​ລຳ​ດັບ.ໃນ​ປີ 2018, ສ.ເຊັກ ໄດ້​ຫັນ​ມາ​ໃຫ້​ຄວາມ​ສຳຄັນ​ກັບ​ກຸ່ມ​ນັກ​ທ່ອງ​ທ່ຽວ​ອິດສະຫຼະ ທີ່​ເນັ້ນ​ການ​ເດີນທາງ​ຄົນ​ດຽວ (flexible independent traveler), ລວມ​ທັງ​ນັກ​ທ່ອງ​ທ່ຽວ​ແບບ​ຄອບຄົວ ທີ່​ເດີນທາງ​ກັບ​ເດັກນ້ອຍ ແລະ ເນັ້ນ​ໃສ່​ເປີດ​ເສັ້ນທາງ​ການບິນ​ໂດຍ​ກົງ​ໃໝ່ໆ ໄປ​ຍັງ​ປະເທດ​ທີ່​ເປັນ​ຕະຫຼາດ​ທ່ອງ​ທ່ຽວ​ທີ່​ສຳຄັນ​ຂອງ ສ.ເຊັກ​ເຊັ່ນ: ອັງກິດ, ໄທ, ຍີ່ປຸ່ນ, ອິນ​ເດຍ, ເອີ​ຣົບ​ຕາເວັນ​ອອກ ແລະ ບັນດາ​ລັດ​ຂອງ​ປະເທດ​ເອກະລາດ (CIS).

   ສຳລັບ​ປີ 2019, ນະໂຍ ບາຍ​ການທ່ອງທ່ຽວ​ທີ່​ສຳຄັນ ສ.ເຊັກ​ຄື: ການ​ດຶງ​ດູດ​ນັກ​ທ່ອງ​ທ່ຽວ​ໃຫ້​ຫັນ​ໄປ​ສູ່​ການທ່ອງທ່ຽວ​ໃນ​ບັນດາ​ເມືອງ, ເຂດ​ແຄວ້ນ​ທີ່​ຍັງ​ບໍ່​ທັນ​ເປັນ​ທີ່​ຮູ້ຈັກ ພາຍ​ໃຕ້​ນະໂຍບາຍ "ອັນຍະ​ມະນີ​ດ້ານ​ການທ່ອງທ່ຽວ​ທີ່​ຍັງ​ບໍ່​ໄດ້​ສຳຫຼວດ", ເພື່ອ​ສົ່ງເສີມ​ການທ່ອງທ່ຽວ​ໃນ​ເມືອງ ຊຶ່ງ​ມີ​ຫຼາຍ​ກວ່າ 39 ແຫ່ງ​ໃນ​ທົ່ວ​ປະ​ເທດ. ສ.ເຊັກ ເນັ້ນ​ການ​ສົ່ງເສີມ​ການທ່ອງທ່ຽວ​ໄປ​ຍັງ​ສະຖານທີ່​ບູຮານ​ສະຖານ, ຜາສາດ, ໂບດ ແລະ ມໍລະດົກ​ທາງ​ວັດທະນະທຳ​ໃນ​ເຂດ​ໂມ​ຣາ​ວີ. ພ້ອມ​ດຽວ​ກັນ​ນັ້ນ, ອົງການ​ທ່ອງ​ທ່ຽວ ສ.ເຊັກ ຍັງ​ໃຫ້​ຄວາມ​ສຳຄັນ​ກັບ​ການ​ພັດທະນາ​ການທ່ອງທ່ຽວ​ຮູບ​ແບບ​ໃໝ່​ເຊັ່ນ: ການທ່ອງທ່ຽວ​ທາງ​ວັດ ທະນະທຳ, ການທ່ອງທ່ຽວ​ທາງ​ສຸຂະພາບ, ການທ່ອງທ່ຽວ​ທາງ​ດ້ານ​ກິລາ​ຕາມ​ລະດູ​ການ (ການ​ຫຼິ້ນ​ສະ​ກີ​ໃນ​ລະດູ​ໜາວ, ການ​ຂີ່​ລົດຖີບ​ໃນ​ຍາມ​ລະດູ​ຮ້ອນ) ແລະ ການທ່ອງທ່ຽວ​ເພື່ອ​ການ​ປະຊຸມ (MICE). ໃນ​ເດືອນ​ກໍລະກົດ​ທີ່​ຜ່ານ​ມາ, ສະຖານທີ່​ສຳຄັນ​ຂອງ ສ.ເຊັກ ຈຳນວນ​ສອງ​ແຫ່ງ​ໄດ້​ຮັບ​ການ​ຂຶ້ນ​ທະບຽນ​ເປັນ​ມໍລະດົກ​ໂລກ ໂດຍ​ອຸຍ​​ແ​ນັສ​ໂກ (UNESCO)ຄື: ໜຶ່ງ, ເຂດ​ຂຸດ​ຄົ້ນ​ບໍ່​ແຮ່ Erzgebirge/Krusnohori ຊຶ່ງ​ເປັນ​ພື້ນ​ທີ່​ບໍລິເວນ​ຕາເວັນຕົກ​ທາງ​ພາກ​ເໜືອ​ຂອງ​ປະເທດ​ທີ່​ຕິດ​ກັບ​ເຂດ​ຊາຍ​ແດນ Saxony ຂອງ​ເຢຍ​ລະ​ມັນ, ບ່ອນ​ທີ່​ມີ​ແຮ່​ທາດ​ເງິນ, ກົ່ວ ແລະ ທາດ​ຢູ​ເຣ​ນຽມ ​ຈາກ​ສະຕະວັດ​ທີ 12 ເຖິງ​ສະຕະວັດ​ທີ 20 ຊຶ່ງ​ເປັນ​ສູນ​ກາງ ບໍລິຫານ​ຈັດ​ການ​ນໍ້າ, ການ​ປະດິດ​ສ້າງ​ໃນ​ການ​ຂຸດ​ຄົ້ນ ແລະ ການ​ຫຼອມ​ໂລ​ຫະ. ສອງ, Kladruby Landscape ເປັນ​ພື້ນ​ທີ່​ທົ່ງພຽງ EIbe ສຳລັບ​ການ​ເພາະ​ພັນ ແລະ ຝຶກ​ມ້າ​ລາຍ ຊຶ່ງ​ເປັນ​ມ້າ​ທີ​່ໃຊ້​ໃນ​ພິທີ​ສຳຄັນ​ຂອງ​ລາດ​ຊະ​ວົງ Habsburg ນັບ​ແຕ່​ປີ 1579 ແລະ ໃນ​ປັດຈຸບັນ ເປັນ​ທີ່​ຕັ້ງ​ຂອງ​ສະ​ຖາ​ບັນ​ຊັ້ນ​ນຳ​ໃນ​ດ້ານ​ການ​ເພາະ​ພັນ​ມ້າ (ຂະຫຍາຍ​ພັນ) ທີ່​ສຳຄັນ​ທີ່​ສຸດ​ແຫ່ງ​ໜຶ່ງ​ຂອງ​ເອີ​ຣົບ. ສະຖານທີ່​ສຳຄັນ​ໃນ​ລັກສະນະ​ດັ່ງກ່າວ, ຈະ​ຖືກ​ນຳ​ສະເໜີ​ໃຫ້​ເປັນ​ແຫຼ່ງ​ທ່ອງ​ທ່ຽວ​ໃໝ່​ຂອງ​ປະ​ເທດ. ນອກຈາກ​ນັ້ນ, ເມືອງ​ທີ່​ເຄີຍ​ເປັນ​ເຂດ​ອຸດສາຫະກຳ ຈະ​ໄດ້​ຮັບ​ການ​ພັດທະນາ​ໃຫ້​ກາຍເປັນ​ເມືອງ​ທ່ອງ​ທ່ຽວ ດ້ວຍ​ການ​ຈັດ​ງານ​ບຸນ​ຕ່າງໆ​ເຊັ່ນ: ສີສັນ​ຂອງ​ອົສ​ຕຣາ​ວາ (Ostrava). ສ່ວນ​ຂົງເຂດ​ໂບ​ຮີ​ເມຍ ແລະ ໂມ​ຮາ​ເວຍ ຈະ​ມີ​ການ​ຂະຫຍາຍ​ເປັນ​ເສັ້ນທາງ​ສຳລັບ​ລົດຖີບ, ທາງ​ຍ່າງ ແລະ ແລ່ນ ໂດຍ​ມີ​ແຜນການ​ທີ່​ຈະ​ຈັດ​ງານ​ຕະຫຼາດ​ຄຣິ​ສ​ມາສ ທີ່​ເມືອງ Brno ແລະ OlomouC ເຊັ່ນ​ກັນ.

   ສປປ ລາວ ແລະ ສາທາ ລະນະ​ລັດ ​ເຊັກສ້າງຕັ້ງ​ສາຍ​ພົວພັນ​ທາງ​ການ​ທູດ​ນໍາ​ກັນ ໃນ​ວັນ​ທີ 5 ກັນຍາ ປີ 1962.