ການ​ຂາຍ​ລົດ​ໃນ​ຕວກ​ກີ​ເພີ່ມ​ຂຶ້ນ

 

 

29.10.2019 8:29     

(ເນື່ອງ​ໃນ​ໂອ​ກາດ​ວັນ​ຊາດ ຕວກ​ກີ 29 ຕຸ​ລາ 2019)

ຮຽບຮຽງ​ໂດຍ​​ : ລຸ້ງ​ດາວ

   ສາທາລະນະ​ລັດ ຕວກ​ກີ ຕັ້ງ​ຢູ່​ສອງ​ທະວີບ​ຄື: ໃນ​ອາຊີ​ຕາເວັນຕົກ (ເກືອບ​ທັງ​ໝົດ​ຂອງ​ແຫຼມ​ອານາ​ໂຕ​ລຽນ) ແລະ ເຂດ​ຕາເວັນ​ອອກ​ສ່ຽງ​ໃຕ້​ຂອງ​ເອີ​ຣົບ, ມີ​ເນື້ອທີ່​ທັງ​ໝົດ 783.562 ກິໂລແມັດ​ມົນທົນ, ມີ​ຊາຍ​ແດນ​ທາງ​ດ້ານ​ເໜືອ​ຕິດ​ກັບ ບູນ​ກາ​ຣີ, ດ້ານ​ຕາເວັນຕົກ​ຕິດ​ກັບ ເກັ​ຣກ, ຕິດ​ກັບ​ປະເທດ​ຈໍ​ເຈຍ ທາງ​ດ້ານ​ຕາເວັນ​ອອກ​ສ່ຽງ​ເໜືອ, ຕິດ​ກັບ ອາ​ກ​ເມ​ນີ, ອາ​​ແຊັກ​ໄບ​ຊານ ແລະ ອີ​ຣານ ທາງ​ດ້ານ​ຕາເວັນ​ອອກ, ຕິດ​ກັບ ອີ​ຣັກ ແລະ ຊີ​ຣີ ທາງ​ດ້ານ​ຕາເວັນ​ອອກ​ສ່ຽງ​ໃຕ້, ມີ​ນະຄອນຫຼວງ​ແມ່ນ ອັງກາ​ຣາ.

   ຕວກ​ກີ ມີ​ພົນລະເມືອງ​ທັງ​ໝົດ 79,81 ລ້ານ​ຄົນ (ຂໍ້​ມູນ​ປີ 2017), ອັດຕາ​ການ​ຂະຫຍາຍຕົວ​ຂອງ​ປະຊາກອນ 1,5% (ຂໍ້​ມູນ​ປີ 2017). ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP ບັນລຸ 851,1 ຕື້​ໂດ​ລາ (ປີ 2017), ອັດຕາ​ການ​ຂະຫຍາຍຕົວ​ຂອງ GDP 3%, ອັດຕາ​ເງິນ​ເຟີ້ 8,2%. ລາຍ​ໄດ້​ສະເລ່ຍ​ຕໍ່​ຫົວ​ຄົນ​ບັນລຸ 9.646 ກວ່າ​ໂດ​ລາ, ຊັບພະຍາກອນ​ທີ່​ເປັນ​ທ່າແຮງ​ໃຫ້​ກັບ​ປະເທດ​ແມ່ນ ແຮ່​ທາດ​ຕ່າງໆ​ເຊັ່ນ: ຖ່ານ​ຫີນ, ທອງແດງ, ໂຄ​ຣ​ໂມ​ໂຊມ, ກົ່ວ, ທອງ. ອຸດສາຫະກຳ​ຕົ້ນຕໍ​ຂອງ​ປະເທດ​ແມ່ນ ແຜ່ນແພ, ລົດ, ບໍ່​ແຮ່, ເຫຼັກ, ນ້ຳມັນ, ການ​ກໍ່ສ້າງ, ເຈ້ຍ, ອາ​ຫານ. ສິນຄ້າ​ສົ່ງ​ອອກ​ຕົ້ນຕໍ​ແມ່ນ ຍານພາຫະນະ ແລະ ອາ​ໄຫຼ່, ເຄື່ອງ​ຈັກ, ຜະລິດ​ຕະ​ພັນ​ເຫຼັກ​ທີ່​ໃຊ້​ໃນ​ອຸດສາຫະກຳ, ເຄື່ອງນຸ່ງ, ແຜ່ນແພ, ເຄື່ອງຮັບ​ສັນຍານ​ວິທະຍຸ, ໂທລະພາບ ແລະ ອຸປະກອນ​ສື່​ສານ. ຕະຫຼາດ​ສົ່ງ​ອອກ​ຕົ້ນຕໍ​ແມ່ນ ເຢຍ​ລະ​ມັນ, ອັງກິດ, ຣັດ​ເຊຍ, ອີ​ຣັກ, ອີ​ຣານ, ອີ​ຕາ​ລີ, ຝຣັ່ງ, ສະຫະລັດ​ອາ​ເມ​ຣິ​ກາ. ຕະຫຼາດ​ນຳ​ເຂົ້າ​ຕົ້ນຕໍ​ແມ່ນ ເຢຍ​ລະ​ມັນ, ອາ​ເມ​ຣິ​ກາ, ອີ​ຕາ​ລີ, ອັງກິດ, ຝຣັ່ງ, ຣັດ​ເຊຍ, ອີ​ຣານ. ສິນຄ້າ​ນຳ​ເຂົ້າ​ຕົ້ນຕໍ​ຄື: ນ້ຳມັນ ແລະ ແ​ກັສ​ທຳ​ມະ​ຊາດ, ເຄື່ອງ​ຈັກ, ເຄ​ມີ.

   ຂະແໜງ​ອຸດສາຫະກຳ ທີ່​ມີ​ຄວາມ​ສຳຄັນ​ຕໍ່​ເສດຖະກິດ​ປະເທດ​ເຊັ່ນ: ອຸດສາຫະກຳ​ບໍ່​ແຮ່, ການ​ກັ່ນ​ນ້ຳມັນ, ອາຫານ ແລະ ເສື້ອ​ຜ້າ​ອາພອນ ແລະ ອື່ນໆ. ໃນ​ນັ້ນ, ອຸດສາຫະກຳ​ຜະລິດ​ລົດ ແມ່ນ​ອຸດສາຫະກຳ​ຂະໜາດ​ໃຫຍ່, ໃນ​ປີ 2014 ຜະລິດ​ລົດ​ໄດ້​ເຖິງ 1.170.445 ຄັນ, ຖືກ​ຈັດ​ຢູ່​ອັນ​ດັບ​ທີ 17 ຂອງ​ຜູ້​ຜະລິດ​ລົດ​ໃນ​ໂລກ. 75% ລົດ​ທີ່​ຜະລິດ​ແມ່ນ​ສົ່ງ​ອອກ​ໄປ​ຕ່າງ​ປະ​ເທດ. ໃນ​ປີ 2014 ລົດ​ເກືອບ 9 ແສນ​ຄັນ​ແມ່ນ​ສົ່ງ​ໄປ​ຕ່າງ​ປະ​ເທດ. ຕະຫຼາດ​ລົດ​ທີ່​ສຳຄັນ​ໄດ້ແກ່ ເຢຍ​ລະ​ມັນ, ອັງກິດ, ຝຣັ່ງ, ອີ​ຕາ​ລີ ແລະ ແ​ອັສ​ປາຍ. ຂະແໜງ​ນີ້​ປະກອບສ່ວນ​ໃຫ້​ກັບ GDP 26%, ສະເພາະ​ໃນ​ເດືອນ​ກັນຍາ ປີ 2016 ການ​ຂາຍ​ລົດ​ພາຍ​ໃນ​ປະເທດ​ຕວກ​ກີ ເພີ່ມ​ຂຶ້ນ 5,6%, ຖ້າ​ທຽບໃສ່​ໄລຍະ​ດຽວ​ກັນ​ຂອງ​ປີ 2015, ບັນລຸ 67.593 ຄັນ, ລົດ​ເບົາ​ເພີ່ມ​ຂຶ້ນ 9%, ບັນລຸ 51.340 ຄັນ. ຂະນະ​ດຽວ​ກັນ​ລົດ​ບັນທຸກ​ຂະໜາດ​ນ້ອຍ​ພັດ​ຫຼຸດ​ລົງ 4%, ບັນລຸ​ພຽງ 16.253 ຄັນ. ນອກຈາກ​ນີ້, ຕວກ​ກີ ຍັງ​ເປັນ​ປະເທດ​ຜູ້​ຜະ​ລິດ​ກໍາ​ປັ່ນ ເພື່ອ​ສົ່ງ​ອອກ​ໂດຍ​ມີ​ໂຮງງານ​ສ້າງ​ກໍາ​ປັ່ນ​ເຖິງ 15 ແຫ່ງ ທີ່​ມີ​ຂະໜາດ​ແຕກ​ຕ່າງ​ກັນ. ໃນ​ເຂດ​ຕູ​ເຊຍ, ຢາ​ໂລ​ວາ ແລະ ອິດ​ສະ​ມິດ ຊຶ່ງ​ໄດ້​ພັດທະນາ​ໃຫ້​ເປັນ​ສູນ​ກາງຂອງ​ການ​ສ້າງ​ກໍາ​ປັ່ນ​ຂອງ​ປະ​ເທດ. ການ​ສົ່ງ​ອອກ​ກໍາ​ປັ່ນ​ສ່ວນ​ຫຼາຍ​ແມ່ນ​ສົ່ງ​ໄປ ອັງກິດ, ມອນ​ຕາ, ປາ​ນາ​ມາ ແລະ ເກາະ​ມາ​ແຊນ.

   ສປປ ລາວ ແລະ ສ.ຕວກ​ກີ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 20 ມິຖຸນາ ປີ 1958.