70 ປີ ວັນ​ມູນ­ເຊື້ອ​ທະ­ຫານ​ອາ­ສາ​ສະ­ໝັກ ຫວຽດ­ນາມ​ຢູ່​ລາວ

31.10.2019 9:26     

   ວິທະຍຸ​ກະຈາຍສຽງຫວຽດ ນາມ​ລາຍ​ງານ​ວ່າ: ວັນ​ທີ 29 ຕຸລາ​ນີ້, ຢູ່​ນະຄອນຫຼວງ​ຮ່າ​ໂນ້ຍ, ໄດ້​ດຳເນີນ​ພິທີ​ສະເຫຼີມສະ ຫຼອງ 70 ປີ​ແຫ່ງ​ວັນ​ມູນເຊື້ອ​ຂອງ​ທະຫານ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດນາມ ຢູ່ ລາວ (30/10/1949-30/ 10/2019) ແລະ ມອບ​ນາມມະຍົດ​ວິລະ​ຊົນ​ກຳລັງ​ປະກອບ​ອາວຸດ​ປະ ຊາ​ຊົນ. 

   ຂ່າວ​ລາຍ​ງານ​ວ່າ: ເຂົ້າ ຮ່ວມ​ໃນ​ພິທີ​ມີ ທ່ານ ນາງ ຫ​ງວຽນທິ​ກີ​ມ​ເງິນ ປະທານ​ສະ ພາ​ແຫ່ງ​ຊາດ​ຫວຽດນາມ, ທ່ານ ບຸນຍັງ ວໍລະ​ຈິດ ເລຂາທິການ​ໃຫຍ່ປະທານ​ປະເທດລາວ ແລະ ຄະນະ​ຜູ້​ແທນ​ຂັ້ນ​ສູງ ສປປ ລາວ, ບັນດາ​ການ​ນຳ, ອະດີດ​ ການ​ນຳ​ພັກ, ລັດ ຂອງ​ຫວຽດນາມ ແລະ ລາວ ພ້ອມ​ກັບ​ບັນດາ​ນັກຮົບ​ເກົ່າ ຊຶ່ງ​ແມ່ນ​ທະຫານ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດນາມ ຢູ່​ລາວ.

   ໃນ​ພິທີ​ດັ່ງກ່າວ: ທ່ານ ພົນ​ເອກ ໂງ​ຊັວນ​ລິກ ລັດຖະມົນຕີ​ກະຊວງ​ປ້ອງ​ກັນ​ປະເທດ​ຫວຽດນາມ ກ່າວ​ວ່າ: ໜຶ່ງ​ໃນ​ບັນດາ​ສັນຍາ​ລັກ​ອັນ​ດີງາມ​ຂອງ​ການ​ພົວພັນ​ສາມັກຄີ​ແບບ​ພິເສດ, ການ​ຮ່ວມ​ສຳພັນ​ສູ້​ຮົບ ຫວຽດນາມ - ລາວ ໃນການ​ ຕໍ່ຕ້ານ​ຈັກກະພັດ​ອາ​ເມ​ຣິ​ກາ ແມ່ນ​ເສັ້ນທາງ​ເຈື່ອງ​ເຊີນ (ສາຍ ພູ​ຫຼວງ) - ເສັ້ນທາງ​ໂຮ່​ຈິ​ມິນ ແຫ່ງ​ເທບ​ນິຍາຍ, ກ້າວ​ເຂົ້າ​ສູ່​ໄລຍະ​ໃ​ໝ່, ໄລຍະ​ປົກ​ປັກຮັກ ສາ ແລະ ສ້າງສາ​ປະເທດຊາດ, ຕາມ​ຄຳ​ຮຽກຮ້ອງຕ້ອງການ ​ຂອງ​ການ​ປະຕິວັດ​ລາວ, ສູນ​ກາງ​ພັກ​ກອມ​ມູ​ນິດ​ຫວຽດນາມ ແລະ ກະຊວງ​ປ້ອງ​ກັນ​ປະເທດ​ ຫວຽດນາມ ໄດ້​ມອບ​ໜ້າທີ່ໃຫ້​ ບາງ​ຫົວ​ໜ່ວຍ​ທະຫານອາສາ ສະໝັກ ແລະ ຜູ້​ຊ່ຽວຊານ​ ໃນ​ທຸກ​ຂົງເຂດ ໄປ​ຊ່ວຍລາວ ແກ້​ໄຂ​ຜົນ​ຮ້າຍ​ຢ້ອນ​ຫຼັງ​ຈາກສົງ ຄາມ, ສ້າງສາ ແລະ ພັດທະນາ ​ເສດຖະກິດ, ວັດທະນະທຳ, ສັງ ຄົມ, ວິທະຍາສາດ - ເຕັກນິກ ​ພ້ອມ​ກັບ​ກອງທັບ, ປະຊາຊົນ​ລາວຕໍ່ສູ້, ປົກ​ປັກ​ຮັກສາ​ເອກະ ລາດ, ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ​ຂອງ​ລາວ​ທີ່​ໄດ້​ນໍາ​ເອົາ ຄວາມ​ສັນຕິ​ສຸກ​ໃຫ້​ປະຊາ​ຊົນ.

   ທ່ານ ພົນ​ເອກ ໂງ​ຊັວນ​ລິກ ຢືນຢັນ​ວ່າ: ໂດຍ​ຜ່ານ​ສົງຄາມ​ຕ້ານ​ພວກ​ລ່າ​ເມືອງ​ຂຶ້ນ​ຝຣັ່ງ ແລະ ຈັດ​ກະ​ພັດ​ອາ​ເມ​ຣິ​ກາ ອັນ​ຍືດ​ເຍື້ອ​ຍາວ​ນານ, ລຳບາກ, ກໍ​ຄື​ໃນ​ພາລະກິດ​ສ້າງສາ ແລະ ປົກ​ປັກ​ຮັກສາ​ປະເທດ​ຊາດ​ຂອງ​ປະຊາຊົນ 2 ປະເທດ​ຫວຽດນາມ - ລາວ, ພະນັກງານ, ທະຫານ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດນາມ ຢູ່​ລາວ ​ຮຸ່ນ​ຕ່າງໆ ໄດ້​ຈົດ​ຈຳ​ຄຳ​ສັ່ງສອນ​ຂອງ ປະທານ ໂຮ່​ຈິ​ມິນ, ຍົກ​ສູງ​ຈິດໃຈ​ສາກົນ​ກຳ​ມະ​ຊີບ, ຜ່ານ​ຜ່າ​ທຸກ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ນາໆ​ປະການ, ຄຽງ​ບ່າ​ຄຽງ​ໄຫຼ່​ ພ້ອມ​ກັບ​ກຳລັງ​ປະກອບ​ອາວຸດ ແລະ ປະຊາຊົນ​ລາວ ຕໍ່ສູ້​ຮອດ​ມື້​ຍາດ​ໄດ້​ໄຊຊະນະ​ຢ່າງ​ສົມບູນ, ປະກອບສ່ວນ​ໂດຍ​ກົງ​ເຂົ້າ​ໃນ​ໄຊຊະນະ​ອັນ​ຍິ່ງ​ໃຫຍ່​ຂອງ​ການ​ປະຕິວັດ 3 ປະເທດ​ອິນດູຈີນ; ຫວຽດນາມ, ລາວ, ກຳ​ປູ​ເຈຍ. ມີ​ພະນັກງານ, ທະຫານ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດນາມ ຫຼາຍ​ຮຸ່ນ​ຄົນ​ທີ່​ເສຍສະຫຼະ​ຊີວິດ ຫຼື ເສຍ​ເລືອດ​ເນື້ອ​ໃນ​ດິນແດນ​ປະເທດ​ລາວ.

   ທ່ານ ພົນ​ເອກ ໂງ​ຊວັນ​ລິກ ກ່າວ​ຢໍ້າ​ວ່າ: ສອງ​ປະເທດ​ສືບຕໍ່​ຮ່ວມ​ມື​ຢ່າງ​ແໜ້ນ​ແຟ້ນ​ໃນ​ການ​ສ້າງສາ ແລະ ປົກ​ປັກ​ຮັກສາ​ເສັ້ນ​ຊາຍ​ແດນ ລະຫວ່າງ ຫວຽດ ນາມ - ລາວ ໃຫ້​ມີ​ສັນຕິພາບ, ມິດຕະພາບ, ສະຖຽນ​ລະ​ພາບ ແລະ ວັດທະນາ​ຖາ​ວອນ ພ້ອມ​ກັນ​ນັ້ນ, ສອງ​ຝ່າຍ​ຄວນ​ຕັ້ງໜ້າ​ຮ່ວມ​ມື​ຊອກ​ຫາ, ເຕົ້າໂຮມອັດ ຖິ​ທະຫານ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດນາມ ທີ່ເສຍ ສະຫຼະ​ຊີວິດ​ຢູ່​ລາວ ເພື່ອ​ໃຫ້​ ບັນດາ​ນັກຮົບ​ວິລະ​ຊົນ​ທີ່​ເສຍ ສະຫຼະ​ຊີວິດ​ເພື່ອ​ຊາດ​ກັບ​ຄືນ​ສູ່​ບ້ານ​ເກີດ​ເມືອງ​ນອນ​ຂອງ​ຕົນ. ທ່ານກ່າວ​ວ່າ: ສອງ​ປະ ເທດ​ຄວນ​ສຸມ​ໃສ່​ເຂົ້າ​ໃນ​ການ​ສ້າງສາ​ກອງທັບ​ປະຊາຊົນ​ປະຕິວັດ ໃຫ້​ກາຍເປັນ​ກຳລັງ​ຫຼວງ, ຍອດ​ຢ້ຽມ, ທັນ​ສະໄໝ​ເທື່ອ​ລະ​ກ້າວ, ຍົກ​ສູງ​ຄຸນ​ນະ​ພາບ​ສັງ​ລວມ, ກຳລັງ​ແຮງ ແລະ ຄວາມ​ສາມາດ​ໃນ​ການ​ຕໍ່ສູ້, ພ້ອມ​ທັງ​ຍູ້​ແຮງ​ການ​ຮ່ວມ​ມື​ໃນ​ຂົງເຂດ​ການ​ທະຫານ, ປ້ອງ​ກັນ​ຊາດ, ຕໍ່​ສູ​້ເຮັດ​ໃຫ້​ທຸກໆ​ກົນອຸບາຍ​ຂອງ​ພວກ​ບໍ່​ຫວັງ​ດີ ທີ່​ຢາກ​ທຳລາຍ, ແບ່ງ​ແຍກ​ສາຍ​ພົວພັນ​ມິດຕະພາບ​ທີ່​ເປັນ​ມູນເຊື້ອ, ຄວາມ​ສາມັກຄີ​ພິເສດ, ການ​ຮ່ວມ​ມື​ຮອບດ້ານ ລະຫວ່າງ ສອງ​ປະເທດ​ຖືກ​ປະ​ລາ​ໄຊ.

   ພ້ອມ​ກັນ​ນັ້ນ, ທ່ານ ນາງ ຫ​ງວຽນ​ທິ​ກີມ​ເງິນ ໄດ້​ຕາງໜ້າ ໃຫ້​ແກ່​ພັກ, ລັດ ມອບ​ນາມມະ ຍົດ​ວິລະ​ຊົນ​ກຳລັງ​ປະກອບ​ອາ ວຸດ​ປະຊາຊົນ ໃຫ້​ແກ່​ກຳລັງ​ອາສາ​ສະໝັກ ແລະ ຜູ້​ຊ່ຽວຊານ​ຫວຽດ ນາມ ຢູ່ ລາວ ຍ້ອນ​ມີຜົນງານ​ດີ ເດັ່ນ​ພິເສດ​ໃນ​ການ​ຕໍ່ສູ້​ ຕ້ານ​ອາ​ເມ​ຣິ​ກາ ກູ້​ຊາດ.