ເວ­ທີ​ປາ​ໄສ​ເສັ້ນ­ທາງ​ສາຍ­ໄໝ​ທາງ​ທະ­ເລ​ສະ­ຕະ­ວັດ​ທີ 21 ຄັ້ງ​ທີ 3 ສືບ­ຕໍ່​ຮ່ວມ​ມື​ກັນ​ພັດ­ທະ­ນາ

31.10.2019 9:28     

ໂດຍ​​ : ລູກ​ເຂົ້າໜຽວ

   ເວທີ​ປາ​ໄສ​ເສັ້ນທາງ​ສາຍ ໄໝ​ທາງ​ທະເລ​ສະຕະວັດ​ທີ 21 ຄັ້ງ​ທີ 3 ໄດ້​ຈັດ​ຂຶ້ນ​ເມື່ອ​ວັນ​ທີ 22/10/2019 ຜ່ານ​ມາ​ທີ່ ເມືອງ​ຈູ່​ໄຮ ແຂວງ​ກວາງ​ຕຸ​ງ​ແຫ່ງ ສປ ຈີນ ໂດຍ​ການ​ຮ່ວມ​ກັນ​ຈັດ​ຂຶ້ນ​ຂອງ​ກຸ່ມ​ສື່​ມວນ​ຊົນ ສປ ຈີນ ກັບ​ຄະນະ​ປົກຄອງ​ແຂວງ​ກວາງ​ຕຸ​ງ​ຊຶ່ງ​ມີ​ແຂກ​ທີ່​ຖືກ​ເຊີນ​ຈາກ​ສື່​ມວນ​ຊົນ, ນັກທຸລະກິດ ແລະ ພາກສ່ວນ​ທີ່​ກ່ຽວຂ້ອງ​ຈາກບັນ​ດາປະເທດ​ອາ​ຊີ, ເອີ​ຣົບ, ອາ​ເມ​ຣິ​ກາ​ລາ​ຕິນ, 300 ກວ່າ​ທ່ານ ເຂົ້າ​ຮ່ວມ. ພິເສດ​ທ່ານ ແອນ​ກຸດ ດິດ​ຕັນ (Angus Deaton) ເຈົ້າ​ຂອງ​ລາງວັນ​ໂນ​ແບວ ສາຂາ​ເສດຖະກິດ ປີ 2015 ກໍ່​ໄດ້​ໃຫ້​ກຽດ​ເຂົ້າ​ຮ່ວມ ແລະ ມີ​ຄຳ​ເຫັນ​ຕໍ່​ກອງ​ປະ​ຊຸມ.

   ໃນ​ກອງ​ປະຊຸມ​ນີ້​ສະເພາະ​ຕອນ​ເຊົ້າ​ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ປະກອບ​ຄຳ​ເຫັນ​ຈາກ​ການ​ນຳ​ທັງ​ພາຍ​ໃນ ແລະ ຕ່າງ ປະເທດ​ກ່ຽວ​ກັບ​ຜົນ​ການ ຈັດຕັ້ງ​ປະຕິບັດ​ເສັ້ນທາງ​ສາຍໄໝ​ທາງ​ທະເລ ຊຶ່ງ​ແມ່ນ​ພາກສ່ວນ​ໜຶ່ງ​ການ​ປະຕິບັດ ໜຶ່ງ​ແລວ​ທາງ​ໜຶ່ງ​ເສັ້ນທາງ​ຂອງ ສປ ຈີນ ທີ່​ມີ​ຜົນ​ປະໂຫຍດ​ບໍ່​ສະເພາະ​ແຕ່ ສປ ຈີນ ຫາກ​ທຸກ​ປະເທດ​ທີ່​ໄດ້​ເຂົ້າ​ຮ່ວມ​ໂຄງການ​ນຳ​ລ້ວນ​ແຕ່​ໄດ້​ຮັບ​ຜົນ​ປະໂຫຍດ​ເຊັ່ນ​ດຽວ​ກັນ. ສະເພາະ​ຕອນ​ບ່າຍ​ເປັນ​ກອງ​ປະຊຸມ​ວິຊາ​ການ​ໂດຍ​ໄດ້​ແບ່ງ​ເປັນ 3 ກອງ​ປະຊຸມ​ຫຼັກ​ທີ່​ປີ່ນ​ອ້ອມ​ການ​ເຊື່ອມ​ໂຍງ​ເສັ້ນທາງ​ສາຍໄໝ​ທາງ​ທະເລ ແລະ ການ​ພັດທະນາ​ເຂດ​ອ່າວ​ໃຫຍ່​ຄື ເວທີ​ປຶກສາ​ຫາລື​ການ​ສື່ສານ ພາຍ​ນອກ​ຂອງ​ການ​ພັດທະນາ​ເຂດ​ອ່າວ​ໃຫຍ່, ກອງ​ປະຊຸມ​ວ່າ​ດ້ວຍ​ການ​ປະສົມ​ປະສານ​ນະ​ວັດຕະ​ກຳ​ໃນ​ການ​ສື່ສານ​ລະຫວ່າງ​ປະເທດ ແລະ ກອງ​ປະຊຸມ​ພາຍ​ໃຕ້​ຫົວຂໍ້ "ຂໍ້​ລິ​ເລີ່ມ​ໜຶ່ງ​ແລວ​ໜຶ່ງ​ເສັ້ນທາງ"ຂອງ ສປ ຈີນ.

   ກ່າວ​ມີ​ຄຳ​ເຫັນ​ຕໍ່​ກອງປະ ຊຸມ​ນີ້ ທ່ານ​ຟູ​ຮາວ (Fu Hua) ຄະນະ​ປະ​ຈໍາ​ພັກ​ແຂວງ​ກວາງ​ຕຸ​ງ​ຫົວໜ້າ​​ໂຄ​ສະ​ນາ​ແຂວງ​ໄດ້​ກ່າວ​ວ່າ: ຈຸດປະສົງຂອງ​ກອງ​ປະຊຸມ​ນີ້​ແມ່ນ​ເພື່ອ​ສະແດງ​ໃຫ້​ເຫັນ​ຜົນ​ໄດ້​ຮັບ​ທີ່​ດີ​ຈາກ​ການຈັດຕັ້ງ​ປະຕິບັດ ເສັ້ນທາງ​ສາຍໄໝ​ທາງ​ທະເລ​ສະຕະວັດ​ທີ 21 ຂອງ​ເຂດ​ອ່າວ​ກວາງ​ຕຸ​ງ-​ຮົງ​ກົງ​-​ມາ​ກາວ, ຊຶ່ງ​ແມ່ນ​ໜຶ່ງ​ໃນ​ບັນດາ​ຂົງເຂດ​ທີ່​ມີ​ຄວາມ​ເຂັ້ມແຂງ​ທີ່​ສຸດ​ດ້ານ​ເສດຖະກິດ​ໃນ​ການ​ເປີດ​ປະຕູ​ສູ່​ໂລກ​ພາຍ​ນອກ​ຂອງ ສປ​ຈີນ. ຈາກ​ເສັ້ນທາງ​ນີ້​ໄດ້​ມີ​ການ​ເຊື່ອມ​ໂຍງ​ເຂົ້າ​ຫາ​ກັນ​ໃນ​ດ້ານ​ການ​ຄ້າ, ອຸດ​ສາ​ຫະ​ກໍາ​ແລະ​ການ​ບໍລິການ​ທາງ​ທະເລ​ດ້ວຍ​ຜົນ​ສຳ​ເລັດ​. ສ່ວນ ​ທ່ານ ຮູ​ແບັງ​ເຊິງ (Hu Bang sheng) ຄະ​ນະຮັບ ຜິດ​ຊອບ​ຈັດ​ງານ​ໃນ​ກຸ່ມ​ສື​່ມວນຊົນ ສ​ປ ຈີນ ໄດ້​ກ່າວ​ວ່າ: ສື່ມວນ​ຊົນ​ມີ​ບົດ​ບ​າດ​ສຳ​ຄັນ​ໃນ ການ​ໂຄ​ສະ​ນາ​ສົ່ງ​ເສີມ​ສາຍພົວ​ພັນຊຶ່ງ​ກັນ ແລະ ກັນ, ຫວັງ​ຢ່າງ​ຍິ່ງວ່າ​ຜ່ານກອງ​ປະ​ຊຸມນີ້​ສື່ມວນ​ຊົນ​ແຕ່​ລະ​ປະ​ເທດ​ຈະ​ໄດ້​ນຳ​ເອົາ​ຜົນ​ສຳ​ເລັດ​ຂອງກອງ​ປະ​ຊຸມນີ້​ອອກ​ສູ່​ສາຍ​ຕາ​ສ​ັງ​ຄົມ​ຢ່າງ​ຖືກ​ຕ້ອງ.

   ສັງ​ລວມ​ແລ້ວ​ຜົນ​ຂອງ​ກອງ​ປະຊຸມ​ຜູ້​ເຂົ້າ​ຮ່ວມ​ແມ່ນ​ສະແດງ​ຄວາມ​ຊົມເຊີຍ​ຕໍ່​ໂຄງ ການ​ເສັ້ນທາງ​ສາຍໄໝ​ທາງ​ ທະເລ ກໍ​ຄື​ໜຶ່ງ​ແລວ​ໜຶ່ງ​ເສັ້ນ ທາງຂອງ ສປ ຈີນ ແລະ ເຫັນດີ​ໃຫ້​ສືບຕໍ່ການ​ຮ່ວມ​ມື​ໃຫ້​ກ້​ວາງ​ຂວາງ​ຫຼາຍ​ຂຶ້ນ​ເພື່ອ​ນຳ​ເອົາ​ຜົນ​ປະໂຫຍດ​ມາ​ໃຫ້​ປະຊາຊົນ​ບັນດາ​ປະເທດ​ທີ່​ເຂົ້າ​ຮ່ວມ​ໃນ​ໂຄງການ​ດັ່ງ​ກ່າວ. ກ່າວ​ມີ​ຄຳ​ເຫັນ​ຕໍ່​ກອງ​ປະຊຸມ ທ່ານ ແອນ​ກຸດ ດິດ​ຕັນ ເຈົ້າ​ຂອງ​ລາງວັນ​ໂນ​ແບວ ສາຂາ​ເສດຖະກິດ​ປີ 2015 ໄດ້​ກ່າວ​ວ່າ: ຈາກ​ບົດຮຽນ​ການ​ເປີດ​ກ້​ວາງ ແລະ ເປີດ​ປະຕູ​ຂອງ ສປ ຈີີນ ໄດ້​ເຮັດ​ໃຫ້ ສປ ຈີນ ປະສົບ​ຜົນສຳເລັດ​ໃນ​ການ​ພັດທະນາ​ຢ່າງຮອບດ້ານ​ແບບ​ກ້າວ​ກະໂດດ​ທີ່​ບໍ່​ເຄີຍ​ມີ​ມາ​ກ່ອນ​ໃນ​ປະຫວັດສາດ ຂອງ ສປ ຈີນ, ເວົ້າ​ສະເພາະ​ດ້ານ​ເສດຖະກິດ​ໄດ້​ມີ​ການ​ຂະຫຍາຍຕົວ​ໃນ​ອັນ​ດັບ 2 ຂອງ​ໂລກ.