ສ. ເກົາ­ຫຼີ ວາງ​ແຜນ​ນະ­ໂຍ­ບາຍຮ່ວມ​ມື​ກັບ​ອາ​ຊຽນ

31.10.2019 9:30     

   ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 28 ຕຸລາ​ຜ່ານ​ມາ, ໃນ​ກອງ​ປະຊຸມ​ກັບ​ບັນດາ​ທູດ​ພິເສດ​ຂອງ 10 ປະເທດ​ສະມາຊິກ​ອາ​ຊຽນ, ທ່ານ ຊອນ ຢຸງ​ດູ ຮອງ​ປະທານ​ຄະນະ​ກຳມະການ​ບໍລິການ​ການ​ເງິນ ສ.ເກົາຫຼີ ໃຫ້​ຮູ້​ວ່າ: ການ ​ວາງ​ແຜນ​ນະ​ໂຍ​ບາຍຂອງ ສ.ເກົາຫຼີ ແມ່ນ​ການ​ເພີ່ມ​ທະວີ​ການ​ຮ່ວມ​ມື​ກັບ​ອາ​ຊຽນ​ໃນ​ຂົງເຂດ​ເຕັກ​ໂນ​ໂລ​ຊີ​ດ້ານ​ການ​ເງິນ.
ຂ່າວ​ລະບຸ​ວ່າ: ທ່ານ ຊອນ​ຢຸງ​ດູ ສະແດງ​ຄວາມ​ມຸ່ງ​ມາດ​ປາຖະໜາ​ຢາກ​ໃຫ້ ກອງ​ປະຊຸມ​ສຸດ​ຍອດ​ລະຫວ່າງ ສ.ເກົາ​ຫຼີ​-​ອາ​ຊຽນ ຄາດ​ວ່າ: ຈະ​ດຳເນີນ ຢູ່​ນະຄອນ​ປູ​ຊານ ແຫ່ງ ສ.ເກົາຫຼີ ໃນ​ວັນ​ທີ 25 ພະຈິກ​ປີ​ນີ້, ຈະ​ເປັນ​ການ​ປະກອບສ່ວນ​ໃນ​ການ​ໜູນ​ຊ່ວຍ​ເຊື່ອມ​ຕໍ່ລະຫວ່າງ ສອງ​ຝ່າຍ​ໃຫ້​ດີກ​ວ່າເກົ່າ. ທ່ານ ຊອນ​ຢຸງ​ດູ ເນັ້ນ​ໜັກ​ວ່າ: ກອງ​ປະຊຸມ​ດັ່ງກ່າວ, ຈະ​ເປັນ​ກາລະ​ໂອກາດ​ອັນ​ດີ​ເພື່ອ​ໃຫ້ ສ.ເກົາຫຼີ ແລະ​ ອາ​ຊຽນ ໄດ້​ມີ​ການ​ພົວພັນ​ເລິກເຊິ່ງ​ຂຶ້ນ​ຕື່ມ, ລະອຽດ​ແມ່ນ​ໃນ​ດ້ານ​ເຕັກ​ໂນ​ໂລ​ຊີ​ການ​ເງິນ.