ຣັດ​ເຊຍ​-​ກູ​ບາ ເພີ່ມ​ທະ­ວີ​ການ​ຮ່ວມ​ມື​ສອງ​ຝ່າຍ

01.11.2019 10:29     

   ຕາມ​ແຫຼ່ງ​ຂ່າວ​ໜັງສືພິມ​ເຢິ​ນເຢີນ, ໃນ​ກອງ​ປະຊຸມ​ປຶກ ສາ​ຫາລື ລະຫວ່າງ ທ່ານ ວະ​ລາ​ດີ​ເມຍ ປູ​ຕິນ ປະທານາທິບໍດີ​ຣັດ​ເຊຍ ແລະ ທ່ານ ມິ​ກ​ແກວ ດິ​ອາສ ກາ​ແນວ ປະທານ​ປະ ເທດ​ກູ​ບາ, ຢູ່​ນະຄອນຫຼວງ​ມົສ​ກູ ປະເທດ​ຣັດ​ເຊຍ, ໃນ​ວັນ​ທີ 29 ຕຸລາ​ຜ່ານ​ມາ, ທ່ານ ກາ​ແນວ ໄດ້​ສະແດງ​ໃຫ້​ເຫັນ​ວ່າ: ການ​ຢ້ຽມຢາມ​ຣັດ​ເຊຍ ຄັ້ງ​ນີ້ ຂອງ ທ່ານ ກາ​ແນວ ແມນ​ໂດ​ກາດ​ ເພື່ອໃຫ້​ສອງ​ປະເທດ​ຕີ​ລາຄາ​ສູງ​ໝາກຜົນ​ການ​ພົວພັນ​ສອງ​ຝ່າຍ​ສາມາດ​ຍາດ​ໄດ້​ໃນ​ໄລຍະ​ຜ່ານ​ມາ ພ້ອມ​ກັນ​ນັ້ນ ໄດ້​ຍົກ​ໃຫ້​ເຫັນ​ບັນດາ​ຫົວຄິດ​ປະດິດ​ສ້າງ​ໃໝ່ ແນໃສ່​ຊຸກຍູ້​ການ​ຮ່ວມ​ມື​ທາງ​ດ້ານ​ການ​ຄ້າ, ການ​ລົງທຶນ ແລະ ພະລັງ​ງານ. ຂະນະ​ດຽວ​ກັນ, ທ່ານ ປູ​ຕິນ ກໍ​ສະແດງ​ຄວາມ​ຍິນດີ​ຕໍ່​ທ່ານ ກາ​ແນວ ທີ່​ໄດ້​ຮັບ​ແຕ່ງຕັ້ງ​ໃຫ້​ດໍາ​ລົງ​ຕໍາ​ແໜ່​ງ​ປະທານ​ປະເທດ​ກູ​ບາ ພ້ອມ​ທັງ​ຢັ້ງຢືນ​ວ່າ: ຣັດ​ເຊຍ ຮູ້ສຶກ​ພູມໃຈ​ຕໍ່​ຄວາມ​ເກັ່ງ​ກ້າ​ສາມາດ​ຂອງ​ກູ​ບາ ໃນ​ການ​ຕໍ່ສູ້​ກັບ​ຄວາມ​ຫຍຸ້ງຍາກ​ນາໆ​ປະການ ແລະ ຣັດ​ເຊຍ ມີ​ຄວາມ​ພ້ອມ​ໃນ​ການ​ເພີ່ມ​ທະວີ​ຮ່ວມ​ມື​ກັບ ກູ​ບາ.

   ຂ່າວ​ລະບຸ​ວ່າ: ໃນ​ການ​ພົບ​ປະ​ສອງ​ຝ່າຍ ລະຫວ່າງ ທ່ານ ກາ​ແນວ ແລະ ທ່ານ ດິ​ມິ​ຕຣີ ເມັດ​ເວ​ເດບ ນາຍົກລັດຖະມົນຕີ​ຣັດ​ເຊຍ​ນັ້ນ, ສອງ​ຝ່າຍ​ຕ່າງ​ກໍ​ເຊື່ອ​ໝັ້ນ​ວ່າ: ໃນ​ການ​ພົບ​ປະ​ສົນທະນາ ລະຫວ່າງ​ການ​ນໍາ​ຂັ້ນ​ສູງ​ຂອງ​ສອງ​ປະເທດ ຈະ​ຊຸກຍູ້​ບັນດາ​ແນວ​ຄວາມ​ຄິດ​ຮ່ວມ​ມື​ໃໝ່. ທ່ານ ເມັດ​ເວ​ເດບ ນັ້ນໜັກ​ ວ່າ: ໃນ​ການ​ຢ້ຽມຢາມ ຣັດ​ເຊຍ ຄັ້ງ​ນີ້ ຂອງ​ທ່ານ​ປະທານ​ກູ​ບາ ສາມາດ​ຢັ້ງຢືນ​ດ້ວຍ​ຕົນ​ເອງ​ທີ່​ມີ​ການເຄື່ອນໄຫວ​ເສດຖະກິດ - ສັງຄົມ ແລະ ວັດ​ທະ​ນະ​ທໍາຂອງ​ ຣັດ​ເຊຍ, ໃນ​ນັ້ນ​ມີ​ບັນດາ​ພື້ນ ຖານ​ການ​ຜະລິດ, ເຂດ​ອຸດ​ສາ​ຫະ​ກໍາ. ການ​ພົວພັນ​ຄູ່​ຮ່ວມ​ມື ລະຫວ່າງ ຣັດ​ເຊຍ - ກູ​ບາ ສືບຕໍ່​ໄດ້​ຮັບ​ການ​ພັດທະນາ​ເຂົ້າ​ສູ່​ລວງ​ເລິກ ແລະ ກວ້າງຂວາງ ບົນ​ພື້ນຖານ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ.