ຈີນ ຮຽກ­ຮ້ອງ​ໃຫ້​ປະ­ຊາ​ຄົມ​ໂລກ​ຮ່ວມ​ມື​ກັນ​ພັດ­ທະ­ນາ

04.11.2019 10:40     

     ຂ່າວສານ​ຊີ​ອາ​ໄອລາຍ​ງານ​ວ່າ: ອີງ​ຕາມ​ຂໍ້​ມູນຂອງອົງ ການ​ ການ​ຮ່ວມ​ມື​ເສດຖະກິດ ແລະ ການ​ພັດທະນາ, ທ່ານ ເກີງ​ສວງ ໂຄສົກ​ກະຊວງ​ການ​ຕ່າງປະເທດ​ຈີນ ໄດ້​ກ່າວ​ໃນວັນ ​ທີ 30 ຕຸລາ​ຜ່ານ​ມາ​ວ່າ: ບາດ ກ້າວ​ເດີນ​ໃນ​ການ​ປະຕິ​ຮູບ​ຂອງ​ຈີນ​ຈະ​ນັບ​ມື້​ນັບ​ໄວ​ຂຶ້ນ, ທັງ ຈະ​ເປີດ​ປະຕູ​ນັບ​ມື້​ນັບ​ກວ້າງ​ຂວາງ.

   ໃນ​ກອງ​ປະຊຸມ​ຖະແຫຼງ​ຂ່າວ ຂອງ​ກະຊວງ​ການ​ຕ່າງ ປະເທດ​ຈີນ ຊີ້​ອອກ​ວ່າ: ອົງການ​ການ​ຮ່ວມ​ມື​ເສດຖະກິດ ແລະ ການ​ພັດທະນາ​ເປີດເຜີຍ​ຂໍ້​ມູນ​ດັ່ງກ່າວ ໄດ້​ສະແດງ​ໃຫ້​ເຫັນ​ວ່າ: ການ​ລົງທຶນ​ໂດຍ​ກົງ​ຂອງ​ຕ່າງປະເທດ​ທົ່ວ​ໂລກ​ໃນ 6 ເດືອນ​ຕົ້ນ​ປີ​ນີ້ ຫຼຸດ​ລົງ 20% ເມື່ອ​ທຽບໃສ່ 6 ເດືອນ​ທ້າຍ​ປີ​ກາຍ. ໃນ​ນັ້ນ​ການ​ລົງທຶນ​ໂດຍ​ກົງ​ຂອງ​ຕ່າງປະເທດ​ຢູ່​ອາ​ເມ​ຣິ​ກາ ຫຼຸດ​ລົງ​ຫຼາຍ​ກວ່າ 25%, ແຕ່​ການ​ລົງທຶນ​ໂດຍ​ກົງ​ຂອງ​ຕ່າງປະເທດ​ຢູ່​ຈີນ ພັດ​ເພີ່ມ​ຂຶ້ນ 5%.

   ທ່ານ ເກີ​ງ​ສວງ ກ່າວ​​ຕື່ມ​ວ່າ: ຂໍ້​ມູນ​ຂອງ​ອົງການ​ດັ່ງກ່າວ ສ່ອງ​ແສງ​ໃຫ້​ເຫັນ​ບັນຫາ​ຕົວ​ຈິງ​ຈຳນວນ​ໜຶ່ງ​ເຊັ່ນ: ການ​ລົງທຶນ​ໂດຍ​ກົງ​ຂອງ​ຕ່າງປະເທດ​ທົ່ວ​ໂລກ ໃນ 6 ເດືອນ​ຕົ້ນ​ປີ​ນີ້ ໄດ້​ຫຼຸດ​ລົງ​ເມື່ອ​ທຽບໃສ່ 6 ເດືອນ​ທ້າຍ​ປີ2018. ນີ້​ສະແດງ​ໃຫ້​ເຫັນ​ອີກ​ຄັ້ງ​ໃໝ່​ວ່າ: ປັດຈຸບັນ ສະພາບ​ແວດ​ລ້ອມ​ດ້ານ​ການ​ລົງທຶນ​ໃນ​ທົ່ວ​ໂລກ​ຫົດ​ຕົວ​ລົງ. ໃນ​ນັ້ນ ລັດທິ​ປົກ​ປ້ອງ ແລະ ລັດທິ​ຝ່າຍ​ດຽວ ແມ່ນ​ປັດ​ໄຈ​ຈຳກັດ​ທີ່​ໃຫຍ່​ກວ່າ​ໝູ່.

   ທ່ານ ເກີ​ງ​ສວງ ກ່າວ​ຢໍ້າ​ວ່າ: ພວກ​ເຮົາ​ຮຽກຮ້ອງ​ໃຫ້​ປະ ຊາ​ຄົມ​ໂລກ ຈົ່ງ​ເກາະ​ແຂນ​ຮ່ວມ​ມື​ກັນ ພ້ອມ​ກັນ​ຕໍ່ຕ້ານ​ລັດທິ​ຝ່າຍ​ດຽວ ແລະ ລັດທິ​ປົກ​ປ້ອງ, ສ້າງ​ສະພາບ​ແວດ​ລ້ອມ​ທີ່​ທ່ຽງ​ທຳ, ຍຸຕິ​ທຳ ແລະ ສາມາດ​ຄາດ​ຄະເນ​ໄດ້​ໃຫ້​ແກ່​ນັກ​ລົງທຶນ​ຂອງ​ບັນດາ​ປະເທດ, ສ້າງ​ໂອກາດ​ການ​ພັດທະນາ​ໃຫ້​ຫຼາຍ​ກວ່າ​ເກົ່າ ພ້ອມ​ກັນ​ຊຸກຍູ້​ການ​ຫັນ​ເປັນ​ເສລີ ແລະ ສະດວກ​ກວ່າ​ເກົ່າ ສຳລັບ​ການ​ລົງທຶນ ແລະ ດ້ານ​ການ​ຄ້າ​ທົ່ວ​ໂລກ, ຮ່ວມ​ກັນ​ສ້າງ​ເສດຖະກິດ​ໂລກ​ແບບ​ເປີດ​ກວ້າງ.