ຊີ​ລີ ປະ­ກາດ​ຍົກ­ເລີກ​ຈັດ​ກອງ​ປະ­ຊຸມ​ເອ​ເປັກ

04.11.2019 10:47     

     ຂ່າວສານ​ຊິນ​ຮວາ​ລາຍ ງານວ່າ: ທ້າຍ​ເດືອນ​ຕຸລາ​ຜ່ານ​ມາ, ທ່ານ ເຊ​ບາ​ສ​ຕຽນ ປິ​ເນ​ຣາ ປະທານາທິບໍດີ​ຊີ​ລີ ໄດ້​ປະກາດ​ຜ່ານ​ທາງ​ໂທລະພາບ ທີ່​ທໍາ​ນຽບ​ປະທານາທິບໍດີ​ວ່າ: ລັດຖະບານ​ຊີ​ລີ ຕົກລົງ​ຈະ​ຍົກເລີກ​ການ​ຈັດ​ກອງ​ປະຊຸມ​ຜູ້​ນໍາ​ເອ​ເປັກ ຢ່າງ​ບໍ່​ເປັນ​ທາງ​ການ ແລະ ກອງ​ປະຊຸມ​ຮັບ​ມື​ກັບ​ການ​ປ່ຽນແປງ​ຂອງ​ດິນ​ຟ້າ​ອາກາດ ແຫ່ງ ສະຫະ​ປະຊາຊາດ ທີ່​ກໍາ​ນົດ​ຈະ​ຈັດ​ຂຶ້ນ​ໃນ​ເດືອນ​ພະຈິກ ແລະ ທັນວາ ປີ 2019 ເພື່ອ​ຮັບ​ມື​ກັບ​ສະຖານະ​ການ​ພາຍ​ໃນ​ປະ​ເທດ.

   ທ່ານ ປິ​ເນ​ຣາ ກ່າວ​ວ່າ: ໃນ​ສອງ​ອາທິດ​ທີ່​ຜ່ານ​ມາ,ສະ ຖານະ​ການ​ຢູ່​ພາຍ​ໃນ​ປະເທດ ​ຊີ​ລີ ປະສົບ​ກັບ​ຄວາມ​ຫຍຸ້ງຍາກ​ຫຼາຍ​ຢ່າງ. ປັດຈຸບັນ, ລັດຖະ ບານມີ​ແຜນ​ຢ່າງ​ຮີບ​ດ່ວນ​ໃນ​ການ​ສ້າງ​ລະບົບ​ສັງຄົມ​ໃໝ່ ເພື່ອ​ຄຸ້ມ​ຄອງ​ຄວາມ​ປອດ​ໄພ​ຂອງ​ປະຊາ​ຊົນ. ດັ່ງນັ້ນ, ລັດຖະ ບານ ຊີ​ລີ ຈຶ່ງ​ຕ້ອງ​ຕັດສິນ​ໃຈ​ຍົກເລີກ​ເຫດການ​ດັ່ງ​ກ່າວ.

   ຂະນະ​ດຽວ​ກັນ, ທ່ານ ປິ​ ເນ​ຣາ ສະແດງ​ຄວາມ​ເສຍ​ໃຈ​ຕໍ່​ເຫດການ ແລະ ຄວາມ​ບໍ່​ສະ ດວກ​ທີ່​ເກີດ​ຂຶ້ນ​ຈາກ​ຂໍ້​ຕົກລົງ​ດັ່ງ​ກ່າວ. ທ່ານ ກ່າວ​ຢໍ້າ​ວ່າ: ເອ​ເປັກ ມີ​ຄວາມ​ສໍາ​ຄັນ​ຕໍ່​ການ​ພັດທະນາ​ເສດຖະກິດ​ຊີ​ລີ. ສ່ວນ ຊີ​ລີ ຈະ​ຍັງ​ດໍາ​ເນີນ​ປະຕິບັດ​ການ​ຢ່າງ​ມີ​ປະສິດທິພາບ ຕາມ​ຄໍາ​ໝັ້ນ​ສັນຍາ​ທີ່​ໃຫ້​ໄວ້ ໃນ​ການ​ຮັບ​ມື​ກັບ​ການ​ປ່ຽນແປງ​ສະພາບ​ດິນ​ຟ້າ​ອາ​ກາດ.