ອຸຍ​ແ​ນັສ​ໂກ ສົ່ງ­ເສີມ​ຄວາມ​ຮູ້​ຄວາມ​ເຂົ້າ­ໃຈ​ຮ່ວມ​ປະ­ເທດ​ຕ່າງໆ

05.11.2019 9:27     

     (ເນື່ອງ​ໃນ​ໂອກາດ​ວັນ​ສ້າງຕັ້ງ​ອົງການ​ອຸຍ​ແນັ​ສ​ໂກ 4/11/1946 - 4/11/2019)

   ຮຽບຮຽງ​ໂດຍ​​ : ລຸ້ງ​ດາວ

   ອົງການ​ການ​ສຶກສາ, ວິທະຍາສາດ ແລະ ວັດທະນະ ທຳ ແຫ່ງ​ສະຫະ​ປະຊາ​ຊາດ ຫຼື ອຸຍ​ແນັ​ສ​ໂກ ສ້າງຕັ້ງ​ຂຶ້ນ​ເພື່ອ​ເປັນ​ກຳລັງ​ຊ່ວຍເຫຼືອ​ພາ ລະກິດ​ຂອງ​ອົງການ​ສະຫະ​ປະຊາຊາດ​ໃນ​ການ​ຮັກສາ​ໄວ້​ຊຶ່ງ​ສັນຕິພາບ​ທີ່​ໝັ້ນຄົງ ແລະ ຍືນ​ຍົງ, ແກ້​ໄຂ​ບັນຫາ ແລະ ຈຸດ​ອ່ອນ​ທີ່​ເປັນ​ສາເຫດ​ໃຫ້​ເກີດ​ຄວາມ​ຂັດ​ແຍ່ງ ແລະ ສົງຄາມ​ທຳລາຍ​ລ້າງ, ຮ່ວມ​ພະລັງ​ກຸ່ມ ບຸກຄົນ​ດ້ານ​ສະຕິປັນຍາ, ວັດ ທະນະທຳ, ສິລະ​ປະ, ການ​ສຶກ ສາ, ວິທະຍາສາດ, ເຕັກ​ໂນໂລ​ ຊີ, ສັງຄົມ​ສາດ ແລະ ມະນຸດ ​ສາດ ເພື່ອ​ສົ່ງເສີມ​ຄວາມ​ເຂົ້າ ໃຈ​ທີ່​ດີ​ລະຫວ່າງ​ກັນ, ຮ່ວມ​ມື​ກັນ ເຖິງ​ວ່າ​ຈະ​ແຕກ​ຕ່າງ​ກັນ​ທາງ​ເຊື້ອ​ຊາດ, ພາສາ, ສັງຄົມ, ວັດທະນະທຳ ແລະ ລະດັບ​ການ​ສຶກສາ. ດັ່ງນັ້ນ, ພາຍ​ໃນ​ໜຶ່ງ​ປີ​ ຫຼັງ​ຈາກ​ການ​ສ້າງຕັ້ງ​ອົງການ​ສະຫະ​ປະຊາຊາດ ຜູ້ນຳ​ປະເທດ​ຝ່າຍ​ພັນທະ​ມິດ, ຜູ້​ຊະນະ​ສົງຄາມ​ກໍໄດ້​ຕົກລົງ​ກັນ​ໃນ​ກອງ​ປະຊຸມ​ລັດຖະມົນຕີ​ກະຊວງ​ສຶກສາ​ທິ​ການ ທີ່​ນະຄອນຫຼວງ​ລອນ​ດອນ ປະເທດ​ອັງກິດ ໃນ​ປີ 1946, ໃຫ້​ຈັດ​ຕັ້ງ​ອົງການ​ສຶກສາ, ວິທະຍາສາດ ແລະ ວັດ ທະນະ​ທຳ.

   ຈຸດປະສົງ​ຂອງອຸຍ​ແນັ​ສ​ ໂກ ຄື: ສົ່ງເສີມ​ຄວາມ​ຮູ້​ຄວາມ ​ເຂົ້າໃຈ​ຮ່ວມ​ກັນລະຫວ່າງ ​ປະ ເທດ​ຕ່າງໆ ໃຫ້​ຍອມຮັບ​ລະບົບ​ສັງຄົມ, ວັດທະນະທຳ, ແນວຄິດ ແລະ ຜົນງານ​ດ້ານ​ສິລະປະ ​ຂອງ​ກັນ ແລະ ກັນ ກຳຈັດ​ຄວາມ​ບໍ່​ຮູ້​ໃນ​ວິຖີ​ຊີວິດ​ຂອງ​ຄົນອື່ນ, ເນື່ອງ​ຈາກ​ຄວາມ​ບໍ່​ຮູ້​ນີ້​ເປັນ​ຕົວ​ການ​ກໍ່ໃຫ້ ເກີດ​ຄວາມ​ກຽດ​ຊັງ, ຄວາມ​ບໍ່​ຍຸຕິທຳ ແລະ ສົງຄາມ ລະຫວ່າງ​ປະ​ເທດ. ພາລະກິດ​ຫຼັກ​ຂອງອຸຍ​ແນັ​ສ​ໂກ ກວມ​ເອົາ​ການ​ສົ່ງເສີມ​ດ້ານການ​ສຶກສາ, ການ​ພັດທະນາ​ດ້ານ​ວິທະຍາສາດ, ສັງຄົມສາດ, ມະນຸດ​ສາດ, ວັດ​ທະ​ນະ​ທໍາ ​ແລະ ການ​ສື່ສານ ເພື່ອ​ຜົນ​ປະ ໂຫຍດ​ຂອງ​ປະເທດ​ສະ​ມາ​ຊິກ.

   ໂຄງການ​ຫຼັກ​ໃນ​ເລື່ອງ​ດັ່ງກ່າວ, ເປັນ​ໂຄງການ​ສົ່ງເສີມ​ແນວ​ຄວາມ​ຄິດ, ຄວາມ​ຮູ້, ສະຕິປັນຍາ ແລະ ເປັນ​ການ​ປະຕິບັດ​ທີ່​ເປັນ​ຮູບ​ປະ​ທຳ ໂດຍ​ຈັດ​ລຳດັບ​ຄວາມ​ສຳຄັນ​ທີ່​ຈະ​ສຸມ​ໃສ່​ກິດຈະກຳ​ໃນ 3 ດ້ານ​ຄື: 1; ການ​ສຶກສາ​ຂັ້ນ​ພື້ນຖານ ສຳລັບ​ທຸກໆ​ຄົນ​ໃນ​ໂລກ ຢ່າງ​ໜ້ອຍ​ໃນ​ລະດັບ​ປະຖົມ​ສຶກສາ, ລຶບ​ລ້າງ​ຄວາມ​ບໍ່​ຮູ້​ໜັງສື, ໃຫ້​ບໍລິການ​ດ້ານ​ການ​ສຶກສາ​ແກ່​ຜູ້​ໃຫຍ່​ທີ່​ຈົບ​ຊັ້ນ​ປະຖົມ​ສຶກສາ​ແລ້ວ, ສົ່ງເສີມ​ການ​ສຶກສາ​ຢ່າງ​ຕໍ່​ເນື່ອງ ໂດຍ​ສະເພາະ​ໃນ​ກຸ່ມ​ທີ່​ດ້ອຍ​ໂອກາດ​ເຊັ່ນ: ແມ່ຍິງ, ເດັກນ້ອຍ, ຊົນເຜົ່າ​ກຸ່ມ​ນ້ອຍ, ຜູ້​ທຸກ​ຍາກ, ທັງ​ໃນ​ຕົວ​ເມືອງ ແລະ ຊົນນະບົດ, ສົ່ງເສີມ​ການ​ພັດທະນາ​ວິທີ​ການ​ໃໝ່ໆ​ໃນ​ການ​ໃຫ້ການ​ສຶກສາ. 2; ປັບປຸງ​ຄຸນ​ນະ​ພາບ​ການ​ສຶກສາ ແລະ ການ​ສຶກສາ​ກ່ຽວ​ກັບ​ສິ່ງແວດລ້ອມ ເພື່ອໃຫ້​ ມີ​ສະພາບ​ແວດ​ລ້ອມ​ທີ່​ດີ​ຕໍ່​ເນື່ອງ ແລະ ຍືນ​ຍົງ. 3; ອຳນວຍ​ຄວາມ​ສະດວກ​ໃນ​ການ​ຮ່ວມ​ມື ເພື່ອ​ອະນຸລັກ​ຮັກສາ​ມໍລະດົກ​ວັດທະນະທຳ​ອັນ​ລຳ້​ຄ່າ.
​ອຸຍ​ແນັ​ສ​ໂກ ເປັນ​ອົງການ​ຊ່ຽວຊານ​ພິເສດ ແຫ່ງ ສະຫະ​ປະຊາຊາດ ສ້າງຕັ້ງ​ຂຶ້ນ​ໂດຍ​ໄດ້​ລົງ​ນາມ​ໃນ​ລັດ​ຖະ​ທຳ​ມະນູນ​ຂອງ​ອົງການ​ໃນ​ວັນ​ທີ 16 ພະຈິກ ປີ 1945 ແລະ ຕໍ່​ມາ​ໃນ​ວັນ​ທີ 4 ພະຈິກ ປີ 1946 ຫຼັງ​ສົງຄາມ​ໂລກ​ຄັ້ງ​ທີ 2, ປະເທດ​ສະມາຊິກ​ສ້າງຕັ້ງ 20 ປະເທດ ໄດ້​ຮ່ວມ​ມື​ກັນ​ໃຫ້​ສັດຕະຍາບັນ​ລັດ​ຖະ​ທຳ​ມະນູນ ລິ​ເລີ່ມ​ດ້ວຍ​ຂໍ້ຄວາມ​ທີ່​ວ່າ; "ສົງຄາມ​ເລີ່ມ​ຕົ້ນ​ໃນ​ຫົວໃຈ​ຂອງ​ມະນຸດ​ແນວໃດ, ຄວາມ​ຫວງ​ແຫນ​ສັນຕິພາບ ກໍຕ້ອງ​ສ້າງ​ຂຶ້ນ​ໃນ​ຈິດໃຈ​ຂອງ​ມະນຸດ​ເຊັ່ນ​ດຽວ​ກັນ". ປັດຈຸບັນ, ມີ​ປະເທດ​ສະມາຊິກ​ທັງ​ໝົດ 195 ປະເທດ ໂດຍ​ປົກກະຕິ ອຸຍ​ແນັ​ສ​ໂກ ຈະ​ໃຊ້​ພາສາ​ອັງກິດ ແລະ ພາສາ​ຝຣັ່ງ ເປັນ​ພາສາ​ທາງການ. ແຕ່​ໃນ​ລະຫວ່າງ​ກອງ​ປະຊຸມ​ສະໄໝ​ສາມັນ ແລະ ກອງປະຊຸມ​ຄະນະ​ບໍລິຫານ​ງານ​ຂອງ ອຸຍ​ແນັ​ສ​ໂກ ຈະ​ໃຊ້​ພາສາ​ທີ່​ກ່ຽວຂ້ອງ​ເຖິງ 6 ພາສາ​ຄື: ອັງກິດ, ຝຣັ່ງ, ຣັດ​ເຊຍ, ອາ​ຣັບ, ແ​ອັສ​ປາຍ ແລະ ຈີນ. ການ​ດຳເນີນ​ງານ​ຂອງ​ອົງການອຸຍແນັ​ສ​ໂກ ຈະ​ປະກົດ​ຂຶ້ນ​ໃນ​ຮູບ​ແບບ​ຂອງ​ກອງ​ປະຊຸມ​ສະໄໝ​ສາມັນ​ໃນ​ທຸກໆ 2 ປີ ໂດຍ​ຄະນະ​ກຳມະການ​ປະກອບ​ດ້ວຍ​ຜູ້​ຊົງ​ຄຸນ​ວຸດ​ທິ​ທາງ​ດ້ານ​ການ​ສຶກສາ, ວິທະຍາສາດ ແລະ ວັດທະນະທຳ ຈຳນວນ 58 ຄົນ ທີ່​ເລືອກ​ມາ​ຈາກ​ຜູ້ຕາງໜ້າ​ຂອງ​ປະເທດ​ສະ​ມາ​ຊິກ. ກຳມະ ການ​ດັ່ງກ່າວ​ຈະ​ດໍາ​ລົງ​ຕໍາ​ແໜ່​ງ ​ໃນ​ວາລະ 4 ປີ ແລະ ຈັດ​ໃຫ້​ມີ​ ການ​ເລືອກ​ຕັ້ງ​ກຳມະການ​ໃໝ່​ ເຄິ່ງ​ໜຶ່ງ​ທຸກ 2 ປີ. ຜູ້ອຳນວຍ ການ​ໃຫຍ່​ທີ່​ເປັນ​ເຈົ້າ​ໜ້າທີ່​ສູງ​ ສຸດ​ຂອງ​ອົງການ​ຈະ​ຢູ່​ໃນ​ວາ ລະ 6 ປີ.

   ອຸຍແນັ​ສ​ໂກ ໄດ້​ຈັດ​ໃຫ້​ມີ​ສຳນັກງານ​ປະຈຳ​ພາກ​ພື້ນ ແລະ ສຳນັກງານ​ຜູ້ຕາງໜ້າ​ປະຈຳ​ພາກພື້ນ ເພື່ອ​ໃຫ້ອຸຍ ແນັ​ສໂກ ປະສານ​ງານ​ກັບ​ປະ ເທດ​ຕ່າງໆ ໄດ້​ຢ່າງ​ໃກ້​ຊິດ. ແຕ່ ລະ​ປະເທດ​ສະມາຊິກຈະ​ຈັດ​ ໃຫ້​ມີສຳນັກງານ​ຜູ້ຕາງໜ້າ​ຖາ ວອນ​ປະຈຳອຸຍ​ແນັ​ສ​ໂກ ແລະ ສຳນັກງານ​ເລຂາທິການຄະນະ​ ກຳມະການ​ແຫ່ງ​ຊາດ ວ່າ​ດ້ວຍ ອຸຍແນັ​ສໂກຂອງ​ປະເທດ ເພື່ອດຳເນີນ​ງານ​ໃນ​ສ່ວນ​ທີ່ ກ່ຽວຂ້ອງ​ກັບ​ຂອບ​ເຂດ​ວຽກ​ຂອງອຸຍ​ແນັ​ສ​ໂກ ໂດຍ​ສະ​ເພາະ. ອົງການ ​ອຸຍ​ແນັ​ສ​ໂກ ມີ​ສຳນັກງານ​ໃຫຍ່​ຢູ່​ນະຄອນຫຼວງ​ປາ​ຣີ ປະເທດ​ຝຣັ່ງ.