ປີ 2019 ເສດ­ຖະ­ກິດ - ສັງ­ຄົມ ຫວຽດ­ນາມ ພັດ­ທະ­ນາ​ຮອບ­ດ້ານ

06.11.2019 9:25     

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ໃນ​ການ​ປຶກສາ​ຫາລື​ກ່ຽວ​ກັບ​ສະພາບ​ເສດ​ຖະ​ກິດ​-​ສັງຄົມ ທີ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ​ຂອງສະພາ​ແຫ່ງ​ຊາດ​ຫວຽດນາມ ຊຸດ​ທີ 14, ບັນດາ​ຜູ້​ແທນ​ໄດ້ຕີ​ລາຄາ​ສູງ​ກ່ຽວ​ກັບ​ການ​ພັດທະນາເສດ​ຖະ​ກິດ​-​ສັງຄົມ ທີ່​ບັນລຸ​ໄດ້​ໃນ​ປີ 2019 ແມ່ນ​ມີ​ຄວາມ​ຕັ້ງໜ້າ ແລະ ຮອບ​ດ້ານ. ລະດັບ​ການ​ເຕີບ​ໂຕ​ເສດຖະກິດ GDP ຄາດ​ວ່າ; ບັນລຸ 6,8%, ລື່ນ​ກາຍ 12 ຄາດ ໝາຍທີ່​ສະພາ​ວາງ​ອອກ.

   ປີ 2019 ແມ່ນ​ປີ​ທີ 2 ຕິດ ຕໍ່​ກັນ​ທີ່​ບັນລຸ​ລື່ນ​ກາຍ 12 ຄາດ ໝາຍ​ທີ່​ສະພາ​ແຫ່ງ​ຊາດ​ມອບ​ໝາຍ​ໃຫ້. ເສດຖະກິດ​ມະຫາ​ພາກ​ເປັນ​ປົກ​​ກະຕິ, ລະດັບ​ການ​ເຕີບ​ໂຕ GDP ຄາດ​ວ່າ; ບັນລຸ 6,8%, ໄພ​ເງິນ​ເຟີ້​ຕ່ຳ​ກວ່າ 3% GDP; ຕະຫຼາດ​ເງິນຕາ​ຕ່າງປະເທດ, ອັດຕາ​ແລກປ່ຽນ​ເປັນ​ປົກກະຕິ, ການ​ສະ​ສົມ​ເງິນຕາ​ຕ່າງປະເທດ​ເພີ່ມ​ຂຶ້ນ​ທົບ​ສອງ​ເທົ່າ ເມື່ອ​ທຽບ​ກັບ​ໄລຍະ​ຜ່ານ​ມາ. ທ່ານ ຫວູ້​ຕຽນ​ລົກ ສະມາຊິກ​ສະພາ​ແຫ່ງ​ຊາດ​ແຂວງ​ຖາ​ຍບິິງ ກ່າວ​ວ່າ: ປີ 2019 ແມ່ນ​ປີ​ທຳອິດ​ທີ່​ກຳລັງ​ໜູນ​ເ​ເຫ່ງ​ການ​ເຕີບ​ໂຕ ແມ່ນ​ມາ​ຈາກ​ຂົງເຂດ​ປຸງ​ແຕ່ງ, ແປ​ຮູບ. ອັດຕາ​ສ່ວນ​ການ​ສົ່ງ​ອອກ ແລະ ການ​ລົງທຶນ​ຂອງ​ພາກ​ເສດຖະກິດ​ເອກະ​ຊົນ​ພາຍ​ໃນ​ປະເທດ​ກໍເພີ່ມ​ຂຶ້ນ. ຫວຽດນາມ ຮັກສາ​ໄດ້​ລະດັບ​ການ​ເຕີບ​ໂຕ​ສູງ​ກວ່າ​ໝູ່​ໃນ​ອາ​ຊຽນ ແລະ ນອນ​ໃນ​ກຸ່ມ​ບັນດາ​ພື້ນຖານ​ເສດຖະກິດ​ທີ່​ມີ​ຄວາມ​ຈະເລີນ​ເຕີບ​ໂຕ​ດີ​ທີ່​ສຸດ​ຢູ່​ອາ​ຊີ.