ຜົນສຳເລັດຂອງຈີນເປັນບົດຮຽນທີ່ດີໃຫ້ແກ່ລາວ ເພື່ອດຶງດູດການລົງທຶນ

06.11.2019 15:35     

     ຕາມຂ່າວສານຊີອາໄອ: ງານວາງສະແດງສິນຄ້ານຳເຂົ້າສາກົນຈີນຄັ້ງທີ 2 ໄດ້ຈັດຂຶ້ນຢູ່ນະຄອນຊຽງໄຮ້ຂອງຈີນຢ່າງເປັນທາງການ ໃນວັນທີ 5 ພະຈິກນີ້, ທ່ານ ສີຈິ້ນຜິງ ປະທານປະເທດຈີນ ໄດ້ກ່າວຄຳປາໄສທີ່ສຳຄັນໃນພີທີເປີດງານດັ່ງກ່າວ ຊຶ່ງໄດ້ສ້າງຄວາມສົນໃຈໃຫ້ແກ່ແຂກຮ່ວມງານທັງພາຍໃນແລະ ຕ່າງປະເທດ.

   ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ໄດ້ໃຫ້ສຳພາດຕໍ່ນັກຂ່າວ CRI ວ່າ: “ຄຳປາໄສຂອງທ່ານ ສີຈິ້ນຜິງ ເຮັດໃຫ້ຂ້າພະເຈົ້າຮູ້ສຶກພາກພູມໃຈຫຼາຍທີ່ທ່ານ ໄດ້ກ່າວໃນ​ບົດ​ລາຍ​ງານ​ກ່ຽວ​ກັບ​ສະ​ພາບ​ແວດ​ລ້ອມ​ການ​ດຳ​ເນີນ​ທຸ​ລະ​ກິດປີ 2020, ທີ່​ປະ​ກາດ​ໂດຍ​ທະ​ນາ​ຄານ​ໂລກ ​ຊຶ່ງໄດ້​ຈັດ​ເອົາ​ນ​ສະ​ພາບ​ແວດ​ລ້ອມ​ການ​ດຳ​ເນີນ​ທຸ​ລະ​ກິດ​ຂອງ​ຈີນ​​ ຫຍັບ​ຂຶ້ນ​ຈາກ​ອັນ​ດັບ​ທີ 46 ​ມາຢູ່ໃນອັນ​ດັບທີ 31 ​ຊຶ່ງໄດ້ສະ​ແດງ​ໃຫ້​ເຫັນ​ວ່າ: ຜ່ານ​ຈາກ​ການ​ລົງ​ເລິກ​ການ​ປະ​ຕິ​ຮູບ ​ແລະ ​ເປີດ​ປະ​ຕູ​ສູ່​ພາຍນອກ, ຈີນ​ ໄດ້​ປັບ​ປຸງ​ສະ​ພາບ​ແວດ​ລ້ອມ​ດ້ານ​ການ​ດຳ​ເນີນ​ທຸ​ລະ​ກິດ​ຂອງ​ຕົນ​ໃຫ້​ດີ​ຂຶ້ນ​ຢ່າງ​ຫຼວງ​ຫຼາຍ, ມີຫຼາຍອັນທີ່ພວກຂ້າພະເຈົ້າ​ຈະໄດ້ຖອດຖອນບົດຮຽນນຳ ສປ ຈີນ ເພື່ອ​ສ້າງ​ສະ​ພາບ​ແວດ​ລ້ອມ​ດ້ານການລົງທຶນຂອງລາວ​ ໃຫ້ດີຂຶ້ນເພື່ອດຶງດູດການລົງທຶນ ແລະ ເຮັດໃຫ້ສິນຄ້າ, ການບໍລິການຂອງລາວ​ ສາ​ມາດແຂ່ງຂັນໃນທົ່ວໂລກ​ໄດ້.

   ງານວາງສະແດງສິ້ນຄ້ານຳເຂົ້າສາກົນຈີນຄັ້ງທີ 2, ມີ 64 ປະເທດ ແລະ 3 ອົງການຈັດຕັ້ງສາກົນເຂົ້າຮ່ວມ. ເນື້ອທີ່ການວາງສະແດງຂອງ​ບັນ​ດາປະເທດມີເຖິງ 300,000 ຕາແມັດ ຊຶ່ງຈະສຸມໃສ່ການສະແດງຜົນສຳເລັດດ້ານການພັດທະນາ, ສະພາບແວດລ້ອມຂອງການດຳເນີນທຸລະກິດ ແລະ ອຸດສາຫະກຳ ທີ່ມີເອກະລັກພິເສດຂອງປະເທດຕ່າງໆ.

   ປີນີ້, ເປັນປີທີສອງ ທີ່ວິສາຫະກິດລາວ ເຂົ້າຮ່ວມງານວາງສະແດງ ຊຶ່ງນັກທຸລະກິດລາວ ໄດ້ນຳເອົາສິນຄ້າຕ່າງໆ​ ທີ່​ມີ​ຄວາມ​ຫຼາກ​ຫຼາຍເປັນຕົ້ນ​ແມ່ນ ເຂົ້າ, ຊາ, ກາເຟ ແລະ​ ເຄື່ອງເຟີນິເຈີມາວາງສະແດງໃນງານຄັ້ງນີ້. ທ່ານ ນາງ ເຂັມມະນີ ພົນ​ເສ​ນາ ກ່າວ​ຕື່ມວ່າ: ງານວາງສະແດງສິນຄ້ານຳເຂົ້າສາກົນຈີນ ມີຄວາມສຳຄັນຫຼາຍ ແລະ ເປັນໂອກາດທີ່ດີທີ່ເຮັດໃຫ້ຜູ້ບໍ​ລິ​ໂພກຂອງຈີນ ກໍຄືຂອງໂລກໄດ້ເຫັນສິນຄ້າລາວ, ລັດຖະບານລາວ ພະຍາຍາມສ້າງນະໂຍບາຍເພື່ອສົ່ງເສີມໃຫ້ນັກທຸລະກິດລາວມາຮ່ວມງານນີ້.