ຈີນ  ເພີ່ມ​ການ​ຊຸກ­ຍູ້​ສ້າງ​ເສດ­ຖະ­ກິດ​ໂລກ ແບບ​ເປີດ​ປະ­ຕູ​ຢ່າງ​ຕໍ່​ເນື່ອງ

07.11.2019 9:42     

   ຂ່າວສານ​ຊີ​ອາ​ໄ​ອລາຍ​ງານ​ວ່າ: ວັນ​ທີ 5 ພະຈິກ​, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ກ່າວ​ຄຳ​ປາ​ໄສ​ທີ່​ສຳຄັນ​ໃນ​ພິທີ​ເປີດ​ງານ​ວາງສະແດງ​ການ​ນຳ​ເຂົ້າ​ສາກົນ​ຈີນ ຄັ້ງ​ທີ 2 ພາຍ​ໃຕ້​ຫົວຂໍ້, "ເປີດ​ກວ້າງ​ການ​ຮ່ວມ​ມື ມີ​ຊາຕາກຳ​ຮ່ວມ​ກັນ" ໂດຍ​ໄດ້​ສະເໜີ 3 ຂໍ້ ກ່ຽວ​ກັບ​ການ​ຊຸກຍູ້​ເສດຖະກິດ​ໂລກາ​ພິ​ວັດ​ແມ່ນ​ກະແສ​ປະຫວັດສາດ ແລະ ໃຫ້​ຄວາມ​ສຳຄັນ​ຕໍ່​ຄວາມ​ເປັນ​ມະນຸດ, ປະກາດ​ມາດ​ຕະການ 5 ດ້ານ ທີ່​ສຳຄັນ​ຂອງ​ຈີນ ໃນ​ການ​ຊຸກຍູ້​ການ​ເປີດ​ປະຕູ​ສູ່​ພາຍ​ນອກ ໃຫ້​ມີ​ລະດັບ​ທີ່​ສູງ​ກວ່າ​ເກົ່າ, ເພື່ອ​ເພີ່ມ​ພະລັງ​ແຮງ​ຂອງ​ຈີນ​ເຂົ້າ​ໃນ​ການ​ຮ່ວມ​ກັນ​ສ້າງ​ເສດຖະກິດ​ໂລກ​ແບບ​ເປີດ​ປະຕູ ແລະ ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ ຊຶ່ງ​ໄດ້​ສະແດງ​ໃຫ້​ເຫັນ​ເຖິງ​ນ້ຳໃຈ​ຮັບຜິດຊອບ​ໃນ​ຖານະ​ເປັນ​ປະເທດ​ໃຫຍ່.

   ໃນ​ງານ​ວາງສະແດງ​ການ​ນຳ​ເຂົ້າ​ສາກົນ​ຄັ້ງ​ທຳອິດ​ໃນ​ປີ 2018, ທ່ານ ສີ​ຈິ້ນ​ຜິງ ໄດ້​ປະກາດ​ມາດ​ຕະການ​ໃນ 5 ດ້ານ ກ່ຽວ​ກັບ​ການ​ເປີດ​ກວ້າງ​ການ​ເປີດ​ປະຕູ​ສູ່​ພາຍ​ນອກ​ຂອງ​ຈີນ ແລະ ໄດ້​ສະເໜີ 3 ຂໍ້​ກ່ຽວ​ກັບ​ການ​ເປີດ​ປະຕູ​ຂອງ​ນະຄອນ​ຊຽງ​ໄຮ້. ທ່ານ ສີ​ຈິ້ນ​ຜິງ ໄດ້​ແຈ້ງ​ໃຫ້​ຮູ້​ສະພາບ​ການຈັດຕັ້ງ​ປະຕິບັດ​ມາດ​ຕະການ​ດ້ານ​ການ​ເປີດ​ປະຕູ​ໃນ​ຂົງເຂດ​ຕ່າງໆ, ຈາກ​ການ​ສ້າງຕັ້ງ​ເຂດ​ທຽບ​ທ່າ​ກຳປັ່ນ​ແຫ່ງ​ໃໝ່​ໃນ​ເຂດ​ທົດ​ລອງ​ການ​ຄ້າ​ເສລີ​ຊຽງ​ໄຮ້ ຢ່າງ​ເປັນ​ທາງ​ການ, ຈົນ​ຮອດ​ຕະຫຼາດ​ຮຸ້ນ​ຊຽງ​ໄຮ້​ສ້າງ​ກະດານ​​ຮຸ້ນ​ການ​ປະດິດ​ສ້າງ​ໃໝ່ ດ້ານ​ວິທະຍາສາດ ແລະ ທົດ​ລອງ​ນຳ​ໃຊ້​ລະບຽບ​ການ​ຈົດ​ທະບຽນ; ຈາກ​ການ​ປະຕິບັດ​ຍຸດທະສາດ​ແຫ່ງ​ຊາດ ກ່ຽວ​ກັບ​ການ​ພັດທະນາ​ທີ່​ເປັນ​ອັນ​ໜຶ່ງ​ອັນ​ດຽວ​ກັນ​ຂອງ​ເຂດ​ສາມຫຼ່ຽມ​ປາກ​ແມ່ນຳ້​ຢາງ​ຊີ​ກຽງ​ ຢ່າງ​ເປັນ​ທາງ​ການ, ການ​ປະຕິບັດ​ລະບຽບ​ການ​ຄຸ້ມ​ຄອງ​ບັນຊີ​ລາຍ​ຊື່​ທາງ​ລົບ ແລະ ການ​ໃຫ້​ສິດ​ນັກ​ລົງທຶນ​ຕ່າງປະເທດ​ເທົ່າ​ທຽມ​ກັບ​ພົນລະເມືອງ​ຈີນ ໃນ​ການ​ອະນຸມັດ​ໃຫ້​ເຂົ້າ​ເຖິງ​ຕະຫຼາດ​ຢ່າງຮອບດ້ານ, ມີມາດ​ຕະການ​ກ່ຽວ​ກັບ​ການ​ເປີດ​ປະຕູ​ຂອງ​ຈີນ ໄດ້​ຮັບ​ການຈັດຕັ້ງ​ປະຕິບັດ​ຕາມ​ລຳ​ດັບ.

   ຈີນ ເປັນ​ປະເທດ​ໃຫຍ່ ທີ່​ມີ​ປະຊາກອນ 1,4 ຕື້​ຄົນ ແລະ ກຸ່ມ​ຄົນ​ທີ່​ມີ​ລາຍ​ຮັບ​ປານ​ກາງ​ຂະໜາດ​ໃຫຍ່​ທີ່​ສຸດ​ຂອງ​ໂລກ, ໄດ້​ປະກອບສ່ວນ​ຫຼາຍ​ກວ່າ 30% ຕໍ່​ການ​ເຕີບ​ໂຕ​ຂອງເສດຖະກິດ​ໂລກ​ຫຼາຍ​ປີ​ ລຽນຕິດ, ການ​ຈັດ​ອັນ​ດັບ​ສະ ພາບ​ແວດ​ລ້ອມ​ດ້ານ​ການ​ດຳ ເນີນ​ທຸລະ​ກິດ​ຢູ່​ໃນ​ໂລກ​ໄດ້​ຮັບ​ການ​ຍົກ​ສູງ​ຂຶ້ນ​ຢ່າງ​ຫຼວງ​ຫຼາຍ.