ການ​ເປັນ​ປະ­ທານ​ອາ​ຊຽນ ປີ 2020 ຂອງ​ຫວຽດ­ນາມ ແມ່ນ​ຄວາມ​ຮັບ­ຜິດ­ຊອບ ແລະ ໂອ­ກາດ

08.11.2019 8:51     

ຮຽບຮຽງ​ໂດຍ: ສີ​ວັນ

   ໃນ​ຂອບ​ເຂດ​ກອງ​ປະຊຸມ ​ສຸດ​ຍອດອາ​ຊຽນ ຄັ້ງ​ທີ 35, ຢູ່​ບາງກອກ ປະເທດ​ໄທ, ລະ ຫວ່າງ​ວັນ​ທີ 2-4 ພະຈິກ​ຜ່ານ​ມາ, ຫວຽດນາມ ໄດ້​ຮັບ​ໜ້າທີ່​ບົດບາດ​ເປັນ​ປະທານ​ອາ​ຊຽນ ໃນ​ປີ 2020 ຕໍ່​ຈາກ ໄທ ຢ່າງ​ເປັນ​ທາງ​ການ, ເລີ່ມ​ຮັບ​ດໍາ​ລົງ​ຕໍາ​ແໜ່​ງ​ດັ່ງກ່າວ ນັບ​ແຕ່​ວັນ​ທີ 1 ມັງກອນ 2020 ເປັນຕົ້ນ​ໄປ. ໃນ​ອາຍຸ​ການ​ເປັນ​ປະທານ​ອາ​ຊຽນ ຄັ້ງ​ນີ້, ມີ​ບັນດາ​ສິ່ງ​ທີ່​ໃໝ່​ອ່ຽມ ດ້ວຍ​ບັນດາ​ລັກສະນະ​ພົ້ນ​ເດັ່ນ. ໃນ​ສະພາບ​ການ​ທີ່​ປະຊາ​ຄົມອາ​ຊຽນ ພວມ​ມີ​ບັນດາ​ບາດ​ລ້ຽວ​ຢ່າງ​ເຂັ້ມແຂງ ຊຶ່ງ​ບໍ່​ພຽງ​ແຕ່​ມີໜ້າ​ທີ່​ກໍາ​ນົດ​ທິດ​ໃຫ້​ແກ່ ປະຊາ​ຄົມ ບືນ​ຕົວ​ຂຶ້ນ, ເພີ່ມ​ທະວີ​ການ​ຮ່ວມ​ສໍາ​ພັນ, ຜ່ານ​ຜ່າ​ຄວາມ​ຫຍຸ້ງຍາກ​ເທົ່າ​ນັ້ນ, ປະທານ​ອາ​ຊຽນ ຍັງ​ຕ້ອງ​ນໍາ​ເອົາ​ກາລະ​ໂອກາດ​ອັນ​ໃຫຍ່​ຫຼວງ ເພື່ອ​ໃຫ້​ຫວຽດນາມ ຍົກ​ສູງ​ພາບ​ພົດ, ທີ່​ຕັ້ງ​ບົດບາດ​ຂອງ​ຕົນ ຊຶ່ງ​ບໍ່​ພຽງ​ແຕ່​ໃນ​ພາກ​ພື້ນ​ອາຊີ​ຕາເວັນ​ອອກ​ສ່ຽງ​ໃຕ້​ເທົ່າ​ນັ້ນ ແຕ່​ຫາກ​ຍັງ​ແມ່ນ​ຢູ່​ໃນ​ບັນດາ​ເວທີ​ປາ​ໄສ​ສາກົນ​ໃຫ້​ຫຼາຍ​​ອີກ​ດ້ວຍ.

   ປີ 2020 ​ຖື​ວ່າ ແມ່ນ​ປີ​ສໍາ​ຄັນ​ທີ່​ສຸດ​ໃນ​ຂະບວນ​ວິວັດ​ການ​ຜັນ​ຂະຫຍາຍ​ແຜນການ​ປະຕິບັດ​ວິໄສ​ທັດ​ອາ​ຊຽນ 2025 ແລະ ກໍ​ແມ່ນ​ໂອກາດ​ສະເຫຼີມສະຫຼອງ​ວັນ​ຫວຽດນາມ​ເຂົ້າ​ເປັນ​ສະມາຊິກ​ອາ​ຊຽນ ຄົບຮອບ 25 ປີ. ບຸລິມະສິດ​ການ​ເປັນ​ປະທານ​ອາ​ຊຽນ ປີ 2020 ຂອງ​ຫວຽດນາມ ແມ່ນ​ສຸມ​ໃສ່່​ຊຸກຍູ້​ສ້າງ​ສາຍ​ສໍາ​ພັນ​ພາຍ​ໃນ​ກຸ່ມ ແລະ ກໍາ​ລັງ​ຄວາມ​ສາມາດ​ຂອງ​ອາ​ຊຽນ ໃນ​ການ​ຮັບ​ມື​ກັບ​ບັນດາ​ການ​ຜັນ​ປ່ຽນ​ຂອງ​ສະພາບ​ການ, ເພື່ອ​ການ​ພັດທະນາ​ຂອງ​ອາ​ຊຽນ.

   ໃນ​ໄລຍະ​ຜ່ານ​ມາ ໂດຍ​ສະເພາະ​ແມ່ນ​ໃນ​ປີ 2019, ການເຄື່ອນໄຫວ​ຂອງ​ອາ​ຊຽນ ລ້ວນ​ແຕ່​ກ້າວ​ໄປ​ເຖິງ​ເປົ້າ​ໝາຍ​ປັບປຸງ​ລັກສະນະ​ໝັ້ນຄົງ​ທັງ 3 ເສົາ​ຄໍ້າ​ຂອງ ປະຊາ​ຄົມ ອາ​ຊຽນ.

   ໃນ​ນັ້ນ, ກ່ຽວ​ກັບ​ດ້ານ​ເສດຖະກິດ, ອາ​ຊຽນ ໄດ້​ສຸມ​ໃສ່​ຊຸກຍູ້​ການ​ພັດທະນາ​ແບບ​ຍືນ​ຍົງ, ຍົກ​ສູງ​ກໍາ​ລັງ​ຄວາມ​ສາມາດ​ໃນ​ການ​ຊົມໃຊ້​ບັນດາ​ໝາກຜົນ​ຂອງ​ການ​ປະຕິວັດ​ອຸດ​ສາ​ຫະ​ກໍາ​ຄັ້ງ​ທີ 4, ສ້າງ​ປະຊາ​ຄົມ "ອາ​ຊຽນ​ດີ​ຈີ​ຕອນ", ເຊື່ອມ​ຕໍ່​ເພື່ອ "ອາ​ຊຽນ​ລຸ​ລ່ວງ​ໄປ​ດ້ວຍ​ດີ". ພ້ອມ​ກັນ​ນັ້ນ, ອາ​ຊຽນ ໄດ້​ເພີ່ມ​ທະວີ​ສະຫວັດດີ​ການ​ສັງຄົມ ແລະ ປັບ​ປຸງ​ກໍາ​ລັງ​ຄວາມ​ສາມາດ​ກຽມພ້ອມ​ເພື່ອ​ຮັບ​ມື​ກັບ​ໄພ​ທໍາ​ມະ​ຊາດ, ຍົກ​ສູງ​ສີສັນ​ວັດ​ທະ​ນະ​ທໍາ ຂອງ​ອາ​ຊຽນ, ຄວາມ​ສໍາ​ພັນ​ຂອງ​ປະຊາຊົນ​ທຸກ​ຊັ້ນ​ວັນນະ​ທັງ​ຢູ່​ພາຍ​ໃນ ແລະ ພາຍ​ນອກ​ພາກ​ພື້ນ. ມີ​ຫຼັກ​ຖານ​ອີກ​ອັນ​ໜຶ່ງ​ທີ່​ຈະແຈ້ງ​ຄື: ອາ​ຊຽນ ນັບ​ມື້​ນັບ​ໄດ້​ຮັບ​ຄວາມ​ສົນໃຈ​ຈາກ​ບັນດາ​ນັກ​ລົງທຶນ​ສາ​ກົນ. ໃນ​ສະພາບ​ການ​ທີ່​ຄວາມ​ເຄັ່ງ​ຕຶງ​ດ້ານ​ການ​ຄ້າ ລະຫວ່າງ ບັນດາ​ພື້ນຖານ​ເສດຖະກິດ​ໃຫຍ່​ຂອງ​ໂລກ​ຄື: ອາ​ເມ​ຣິ​ກາ - ຈີນ, ອາ​ເມ​ຣິ​ກາ - ອີ​ຢູ ພວມ​ນັບ​ມື້​ເພີ່ມ​ຂຶ້ນ ບວກ​ກັບ​ການ​ຫຼຸດ​ໜ້ອຍ​ຖອຍ​ລົງ​ຂອງ​ເສດຖະກິດ​ທົ່ວ​ໂລກ ແຕ່​ການ​ລົງທຶນ​ຕ່າງປະເທດ​ເຂົ້າ​ອາ​ຊຽນ ຍັງ​ຄົງ​ບັນລຸ​ລະດັບ​ການ​ເຕີບ​ໂຕ 5,3% ໃນ​ປີ 2018. ນີ້​ແມ່ນ​ກາລະ​ໂອກາດ​ເພື່ອ​ໃຫ້ ອາ​ຊຽນ ເສີມ​ຂະຫຍາຍ​ບົດບາດ​ເປັນໃຈ​ກາງຂອງ​ຕົນ, ສ້າງ​ສະພາບ​ແວດ​ລ້ອມ​ທີ່​ສະດວກ​ໃຫ້​ແກ່​ການ​ພັດທະນາ​ແບບ​ຍືນ​ຍົງ​ຂອງ​ແຕ່​ລະ​ປະເທດ ແລະ ຂອງ​ພາກ​ພື້ນ.

   ຕາມ​ແຫຼ່ງ​ຂ່າວ​ຈາກ​ວິທະ ຍຸ​ກະຈາຍສຽງ​ຫວຽດນາມ, ໃນ​ສະພາບ​ການ​ຄື​ປັດຈຸບັນ​ໂດຍ​ໄດ້​ຮັບ​ໜ້າທີ່​ເປັນ​ປະທານ​ອາ​ຊຽນ​ປີ 2020, ຫວຽດນາມ ຈະ​ສືບຕໍ່​ໂຄງ​ການ​ດໍາ​ເນີນ​ງານ​ຂອງ​ໄທ ກ່ຽວ​ກັບ​ການ​ພັດທະນາ​ແບບ​ຍືນ​ຍົງ, ສືບຕໍ່​ຮັກສາ​ສັນຕິພາບ, ສະຖຽນ​ລະ​ພາບ ແລະ ການ​ຮ່ວມ​ມື​ຂອງ​ພາກ​ພື້ນ, ເອົາໃຈໃສ່​ເປັນ​ພິເສດ ເຖິງ​ການ​ປະຕິວັດ​ອຸດ​ສາ​ຫະ​ກໍາ 4.0. ຄຽງ​ຄູ່​ກັນ​ນັ້ນ, ປີ 2020 ແມ່ນ​ປີ​ທີ່​ສໍາ​ຄັນ​ສໍາ​ລັບ​ຂະບວນ​ວິວັດ​ການ​ເຈລະຈາ ກົດ​ແຫ່ງ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະເລ​ຕາເວັນ​ອອກ (COC). ໃນ​ຖານະ​ເປັນ​ປະທານ ອາ​ຊຽນ​ປີ 2020 ພ້ອມ​ທັງ​ເປັນ​ສະມາຊິກ​ບໍ່​ຖາວອນ​ສະພາ​ຄວາມ​ໝັ້ນຄົງ ສປຊ, ສົກ​ປີ 2020 - 2021, ຫວຽດນາມ ຈະ​ມີ​ພື້ນຖານ​ເພື່ອ​ຊຸກຍູ້ ແລະ ສ້າງ​ວິ​ທີ​ສໍາ​ຜັດ​ທີ່​ເໝາະ​ສົມ​ໃຫ້​ແກ່​ບັນດາ​ການ​ເຈລະຈາ COC ລະຫວ່າງ ຈີນ ກັບ ອາ​ຊຽນ, ຊອກ​ຫາ​ສຽງ​ ເວົ້າ​ລວມ, ສ້າງ​ຄວາມ​ເຫັນ​ດີ​ເຫັນ​ພ້ອມ​ພາຍ​ໃນ​ກຸຸ່ມ. ທ່ານ ຫວູ​ໂຮ່ ຫົວໜ້າ​ກົມ​ອາ​ຊຽນ. ກະຊວງ​ການ​ຕ່າງປະເທດ​ຫວຽດນາມ ຮອງ​ເລຂາທິການ​ໃຫຍ່​ຄະ​ນະ​ກໍາ​ມະ​ການ​ແຫ່ງ​ຊາດ ອາ​ຊຽນ ປີ 2020, ຢັ້ງຢືນ​ວ່າ: ປັດຈຸບັນ ແມ່ນ​ຈຸດ​ເວລາ​ເພື່ອ​ໃຫ້ ອາ​ຊຽນ ກ້າວ​ໄປ​ໜ້າ. ຫວຽດນາມ ຮັບ​ໜ້າທີ່​ບົດບາດ​ເປັນ​ປະທານ​ອາ​ຊຽນ​ປີ 2020 ກົງ​ກັບ​ຈຸດ​ເວລາ​ສະເຫຼີມສະຫຼອງ​ວັນ ຫວຽດນາມ ເຂົ້າ​ເປັນ​ສະມາຊິກ ອາ​ຊຽນ ຄົບຮອບ 25 ປີ. ນີ້​ບໍ່​ພຽງ​ແຕ່​ແມ່ນ​ໂອກາດ​ທີ່​ດີ​ເພື່ອ​ໃຫ້ ຫວຽດນາມ ຊຸກຍູ້​ການ​ສ້າງ​ປະຊາ​ຄົມ​ອາ​ຊຽນ ໃຫ້​ໝັ້ນຄົງ​ເຂັ້ມແຂງ​ເທົ່າ​ນັ້ນ, ແຕ່​ຫາກ​ຍັງ​ແມ່ນ​ໜ້າທີ່​ຄວາມ​ຮັບຜິດຊອບ​ຊັກ​ຈູງ ອາ​ຊຽນ ໃຫ້​ມີ​ຄວາມ​ໝັ້ນຄົງ​ເຂັ້ມແຂງ ບໍ່​ສະເພາະ​ດ້ານ​ກໍາ​ລັງ​ພາຍ​ໃນ​ກຸ່ມ​ເທົ່າ​ນັ້ນ, ແຕ່​ຫາກ​ຍັງ​ຕ້ອງ​ເພີ່ມ​ອິດ​ທິ​ພົນ​ຊື່​ສຽງ, ບົດບາດ​ຂອງ​ຕົນ​ໃນ​ພາກ​ພື້ນ ກໍ​ຄື​ປະກອບສ່ວນ​ເຂົ້າ​ໃນ​ຂະບວນ​ວິວັດ​ການ​ແກ້​ໄຂ​ບັນດາ​ບັນຫາ ຊຶ່ງ​ທົ່ວ​ໂລກ​ມີ​ຄວາມ​ສົນໃຈ​ອີກ​ດ້ວຍ.

   ໃນ​ຕະຫຼອດ​ເວລາ​ເກືອບ 25 ປີ​ທີ່​ຜ່ານ​ມາ, ນັບ​ແຕ່​ເຂົ້າ​ຮ່ວມ​ອາ​ຊຽນ, ຫວຽດນາມ​ຍາມ​ໃດ​ກໍແມ່ນ​ສະມາຊິກ​ທີ່​ຕັ້ງໜ້າ, ມີ​ຄວາມ​ຮັບຜິດຊອບ ແລະ ມາ​ຮອດ​ປັດຈຸບັນ ໄດ້​ກາຍເປັນ​ສະ ມາຊິກ​ຫຼັກ​ແຫຼ່ງ. ຫວຽດນາມ ໄດ້​ປະສົບ​ຜົນສຳເລັດ​ໃນການ ​ເປັນ​ປະທານ​ອາ​ຊຽນ ປີ 2010. ໃນ​ບັນດາ​ຂົງເຂດ​ຄວາມ​ຮັບ ຜິດຊອບ​ທັງ​ໝົດ, ໄດ້​ຮັບ​ການ​ຕີ​ລາຄາ​ສູງ​ຈາກ​ບັນດາ​ປະເທດ​ສະມາຊິກ ແລະ ຄູ່​ຮ່ວມ​ມື. ເລື່ອງ​ຫວຽດນາມ​ມີ​ທີ່​ຕັ້ງ​ໃນ​ສະພາ​ຄວາມ​ໝັ້ນຄົງ ສປຊ, ໄດ້​ປະກອບສ່ວນ​ຍົກ​ສູງ​ອິດ​ທິິ​ພົນ​ຊື່​ສຽງ​ຂອງ​ອາ​ຊຽນ. ເພາະສະນັ້ນ, ໃນ​ການ​ດຳລົງ​ຕຳແໜ່ງ​ເປັນ​ປະທານ​ອາ​ຊຽນ​ຄັ້ງ​ທີ 2 ນີ້, ບັນດາ​ປະເທດ ໄດ້​ຕັ້ງ​ຄວາມ​ຫວັງ​ຢ່າງ​ໃຫຍ່​ຫຼວງ​ຕໍ່​ກັບ​ບົດບາດ​ທີ່​ເປັນ​ການ​ນຳ​ຂອງ ຫວຽດນາມ.

   ທ່ານ ລິ​ມ​ຈອກ​ໂຮຍ ເລຂາທິການ​ໃຫຍ່​ອາ​ຊຽນ ຢັ້ງ ຢືນ​ວ່າ: ໃນ​ຕະຫຼອດ​ໄລຍະ 15 ປີ​ມາ​ນີ້, ຫວຽດນາມ ພັດທະນາ​ ຢ່າງ​ໄວວາ, ພິເສດ​ແມ່ນໃນການ​ ເຕີບ​ໂຕ​ດ້ານ​ເສດຖະກິດ, ກາຍ ເປັນ​ໜຶ່ງ​ໃນ​ບັນດາ​ປະເທດ​ທີ່​ເຂັ້ມແຂງ​ທາງ​ດ້ານ​ເສດ ຖະກິດ​ຂອງ​ພາກ​ພື້ນ. ຄະນະ​ເລຂາ​ທິ ການ​ອາ​ຊຽນ ຈະ​ຮ່ວມ​ມື ແລະ ປະຕິບັດ​ໜ້າທີ່​ວຽກ​ງານ​ກັບ​ຫວຽດນາມ ຢ່າງ​ແໜ້ນ​ແຟ້ນ​ໃນ​ປີ​ໜ້າ. ຂ້າພະເຈົ້າ​ລໍຄອຍ ຫວຽດນາມ ດຳລົງ​ຕຳແໜ່ງ​ເປັນ​ປະທານ​ອາ​ຊຽນ. ນີ້ິ້​ຈະ​ເປັນ​ປີ​ສຳຄັນ​ໃຫ້​ແກ່ ຫວຽດນາມ ແລະ ໃຫ້​ແກ່​ອາ​ຊຽນ ໃນ​ຂະບວນ​ວິວັດ​ການ​ເຊື່ອມ​ໂຍງ​ເຂົ້າ​ກັບ​ສາ​ກົນ.

   ຮອດ​ປີ 2020, ອາ​ຊຽນ ກ້າວ​ເດີນ​ໄດ້​ເຄິ່ງ​ໄລຍະ​ທາງ​ຂອງ​ຂະບວນ​ວິວັດ​ການ​ຜັນ​ຂະຫຍາຍ​ບັນດາ​ແຜນການ​ສັງ​ລວມ​ກ່ຽວ​ກັບ​ການ​ສ້າງ​ປະຊາ​ຄົມ​ອາ​ຊຽນ (2025). ດັ່ງນັ້ນ, ການຈັດຕັ້ງ​ປະຕິບັດ​ໜ້າທີ່​ເປັນ​ປະທານ​ອາ​ຊຽນ​ຂອງ​ຫວຽດນາມ ປີ 2020 ໃຫ້​ສຳເລັດ​ແມ່ນ​ມີ​ຄວາມ​ໝາຍ​ພິເສດ​ໃນ​ການ​ຫວນ​ຄືນ, ຕີ​ລາຄາ​ບັນດາ​ສິ່ງ​ທີ່​ໄດ້​ປະຕິບັດ​ຕາມ​ແຜນການ ແລະ ກຳນົດ​ທິດ​ຢ່າງ​ຖືກຕ້ອງ​ໃນ​ບັນດາ​ວຽກ​ຕ້ອງການ​ເຮັດ​ໃນ​ໄລຍະ​ຈະ​ມາ​ເຖິງ ເພື່ອ​ປະຕິບັດ​ສຳເລັດ​ເປົ້າ​ໝາຍ​ສ້າງ​ປະຊາ​ຄົມ​ອາ​ຊຽນ ໃນ​ປີ 2025. ນີ້​ບໍ່​ແມ່ນ​ເທື່ອ​ທຳອິດ​ທີ່ ຫວຽດນາມ ດຳລົງ​ຕຳແໜ່ງ​ປະທານ​ອາ​ຊຽນ. ປີ 2010, ຫວຽດນາມ ຮັບ​ໜ້າທີ່​ຕຳແໜ່ງ​ດັ່ງ​ກ່າວ​ໄດ້້​ເປັນ​ຢ່າງ​ດີ, ສ້າງ​ບາດກ້າວ​ພັດທະນາ​ຢ່າງ​ກະໂດດ​ຂັ້ນ​ຂອງ ຫວຽດນາມ ໃນ​ຂະບວນ​ວິວັດ​ການ​ເຊື່ອມ​ໂຍງ​ເຂົ້າ​​ກັບພາກ​ພື້ນ ແລະ ສາ​ກົນ. ບັນດາ​ບົດຮຽນ​ທີ່​ມີ​ຢູ່​ແລ້ວ ແລະ ການ​ພັດທະນາ​ໃນ​ຊຸມ​ປີ​ມໍ່ໆ​ມາ​ນີ້ ພ້ອມ​ກັບ​ແຜນ ການ​ທີ່​ໄດ້​ກະກຽມ​ຢ່າງ​ລະອຽດ, ແນ່ນອນ​ວ່າ ຫວຽດນາມ ຈະ​ຕອບ​ສະໜອງ​ຄວາມ​ໄວ້​ວາງໃຈ ແລະ ຄວາມ​ຫວັງ​ຂອງ​ບັນດາ​ປະເທດ​ສະມາຊິກ​ອາ​ຊຽນ, ບັນດາ​ຄູ່​ຮ່ວມ​ມື, ດ້ວຍ​ການເຮັດ ​ໜ້າທີ່​ເປັນ​ປະທານ​ອາ​ຊຽນປີ 2020 ໄດ້​ເປັນ​ຢ່າງ​ດີ.