ທ່ານ​  ນາງ  ດາລາ​ວອນ  ມະນີ​ຈັນ ອະດີດ​ນັກ​ກິລາ​ປິ່ງ​ປ່ອງ​ທີ​ມ​ຊາດ​ລາວ ທັງ​ເປັນ​ປະທານ​ສະ​ໂມສອນ​ປິ່ງ​ປ່ອງດາລາ​ວອນ ແຈ້ງ​ໃຫ້​ຊາບ​ວ່າ: ເພື່ອ​ເປັນ​ການຈັດຕັ້ງ​ປະຕິບັດ​ຕາມ​ແຈ້ງ​ການ​ຂອງ​ລັດຖະບານກໍ​ຄືກະຊວງ​ສຶກສາ​ທິ​ການ ແລະ ກິລາ ໄດ້​ແຈ້ງ​ໃຫ້​ບັນດາ​ໂຮງຮຽນທຸກ​ພາກສ່ວນ​ໃນ​ຂະແໜງ​ສຶກສາ ແລະ ບັນດາ​ສະໂມສອນ​ຕ່າງໆໃຫ້​ຢຸດ​​ການຝຶກຊ້ອມ​ຊົ່ວຄາວ​ນັບ​ແຕ່​ນີ້ເປັນຕົ້ນ​ໄປທາງ​ສະໂມສອນ ຈຶ່ງ​ໄດ້​ປະກາດ​ໃຫ້​ນັກ​ກິລາ​ພາຍ​ໃນ​ສະໂມສອນ​ໄດ້​ຮັບ​ຊາບ​ຢ່າງ​ທົ່ວ​ເຖິງ ເພື່ອ​ຢຸດ​ການ​ຝຶກຊ້ອມ​ໃຫ້​ແກ່​ນັກ​ກິລາ​ເຍົາວະ​ຊົນ ແລະ ໄວ​ໜຸ່ມຊົ່ວຄາວ  ເພື່ອ​ເປັນ​ການ​ປ້ອງ​ກັນ​ບໍ່​ໃຫ້​ນັກ​ກິລາ​ຕິດເຊື້ອ​ຈຸ​ລະ​ໂ​ຣກ​ສາຍ​ພັນ​ໃໝ່ໂຄ​ວິດ-19 ທີ່​ກຳລັງ​ແຜ່​ລະບາດ​ເປັນ​ວົງ​ກວ້າງ​ໃນ​ທົ່ວ​ໂລກ ຫຼັງ​ຈາກ​ພະຍາດ​ດັ່ງກ່າວຢຸດ​ການ​ແຜ່​ລະບາດ​ເປັນ​ທີ່​ຮຽບຮ້ອຍທາງ​ສະໂມສອນດາລາ​ວອນ ຈຶ່ງ​ຈະ​ກັບ​ມາ​ເປີດ​ສອນ​​ຝຶກຊ້ອມ​ຢ່າງ​ເປັນ​ປົກ​ກະ​ຕິ.
  ທ່ານ ນາງ  ດາລາ​ວອນ  ມະນີຈັນ ໃຫ້​ຮູ້​ຕື່ມ​ອີກ​ວ່າ: ສຸດ​ເສຍດາຍ​ທີ່​ສຸດສູນ​ຂອງ​ພວກ​ເຮົາ​ກຳລັງ​ໄດ້​ຮັບ​ຄວາມ​ສົນໃຈນິຍົມ​ຊົມ​ຊອບ​ຈາກ​ມວນ​ຊົນ​ເປັນ​ຢ່າງ​ຫຼວງຫຼາຍ ແລະ ມີ​ທ່າ​ອ່ຽງ​ດີ​ຂຶ້ນ​ເລື້ອຍໆ  ໂດຍ​ໄດ້​ມີ​ການ​ວາງ​ແຜນ​ກະກຽມ​ຈະ​ຈັດການ​ແຂ່ງຂັນ ແລະ ຈັດ​ກິດຈະກຳ​ຫຼາຍ​ຢ່າງ ໃນ​ລະຫວ່າງ​ເດືອນ​ມີນາ ຫາ ເດືອນ​ທັນວາ 2020 ແຕ່​ມາ​ພົບ​ກັບ​ບັນຫາ​ພະຍາດ ​ໂຄ​ວິດ-19 ແຜ່​ລະບາດ ​ຊຶ່ງເຮັດ​ໃຫ້​ພວກ​ເຮົາ​ຕ້ອງ​ມີ​ຄວາມ​ຈຳເປັນ​ຢຸດ​ກິດຈະກຳ​ທຸກ​ຢ່າງ​ແບບ​ບໍ່​ມີ​ກຳນົດ ໄດ້​ສ້າງ​ຜົນ​ເສຍ​ຫາຍ​ຫຼາຍ​ພໍ​ສົມຄວນສະເລ່ຍ​ໃນ​ຕອນ​ນີ້​ປະມານ 40-50% ແຕ່​ຖ້າ​ແກ່ຍາວ​ໄປ​ຮອດ​ເດືອນ​ພຶດສະພາ ຫຼື ເດືອນ​ມິຖຸນາຍັງ​ບໍ່​ສາມາດ​ເປີດ​ບໍລິການ​​ຝຶກຊ້ອມ​ຢ່າງ​ເປັນ​ປົກກະຕິຈະ​ສ້າງ​ຜົນ​ເສຍ​ຫາຍ​ເພີ່ມ​ຂຶ້ນ​ຫຼາຍ​ຢ່າງ​ແນ່ນອນ ແຕ່​ເຖິງ​ຢ່າງໃດ​ກໍ​ຕາມສິ່ງ​ທີ່​ເຮັດ​ໄດ້ກໍ​ພະຍາຍາມ​ບອກສອນ ແລະ ແນະນຳ​ສະມາຊິກ​ຂອງ​ສະໂມສອນ ຈຳນວນ 30-40 ຄົນ ເຖິງ​ວ່າ​ຈະ​ບໍ່​ໄດ​ຝຶກຊ້ອມ​ກັບ​ສະໂມສອນ​ພວກ​ເຮົາ ຢູ່​ທາງ​ບ້ານ​ກໍ​ຕ້ອງ​​ຝຶກ​ທັກ​ສະ  ແລະ  ເທັກ​ນິກ​ຕ່າງໆເພື່ອ​ເສີມ​ສ້າງ ແລະ ຮັກສາ​ສະມັດຖະພາບ​ຂອງ​ຮ່າງກາຍ​ໄວ້​ຄົງ​ເດີມ​ຄືເກົ່າ  ແລະ  ບັນຫາ​ໃດ​ທີ່​ຍັງ​ບໍ່​ເຂົ້າໃຈ​ກໍ​ສາມາດ​ໂທ​ມາ​ສອບ​ຖາມ​ພົວພັນ​ໄດ້. 
  ປັດຈຸບັນ​ສະໂມສອນປິ່ງ​ປ່ອງດາລາ​ວອນ ເປີດ​ສອນ​ຢູ່​ທີ່​ສູນ​ການ​ຄ້າລາວ​-​ໄອ​ເຕັກ  (ຊັ້ນ 4)  ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ມີ​ຄູ​ຝຶກ​ສອນ 4 ທ່ານ ແລະ ນັກ​ກິລາ​ປະມານ 30-40 ຄົນ ຊ້ອມ​ທຸກໆ​ວັນ ເລີ່ມ​ແຕ່​ເວລາ 10:00-20:00 ໂມງ ເປັນຕົ້ນ​ໄປ.
(ວົງ​ຈອນ​ກິລາ)