ໜັງສືພິມ ປະຊາຊົນ

ທີມເຕະບານຍິງທີມຊາດລາວຊຸດໃຫຍ່ ໂຈະການຝຶກຊ້ອມຊົ່ວຄາວ ຍ້ອນພະຍາດໂຄວິດ-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 31/03/2020 08:51:07 ຈຳນວນຢ້ຽມຊົມ 3731 ຄັ້ງ

ທ່ານ ວົງມີໄຊ ສຸບົວຄຳ ຫົວໜ້າຄູຝຶກເຕະບານຍິງທີມຊາດລາວຊຸດໃຫຍ່ ແຈ້ງໃຫ້ຊາບໃນເມື່ອບໍ່ດົນມາ ນີ້ວ່າ: ເພື່ອເປັນການສ້າງຜົນງານຄັ້ງປະຫວັດສາດໃຫ້ແກ່ຊາດລາວ ກໍຄືວົງການກິລາບານເຕະລາວ ໃນການແຂ່ງຂັນເຕະບານຍິງຊີງແຊັມ ອາຊຽນ ປະຈຳປີ 2020 ໃນເບື້ອງຕົ້ນມີກຳນົດຈະຈັດເດືອນພຶດສະພາ 2020 ແຕ່ຍ້ອນມີສະພາບເຊື້ອພະຍາດໂຄວິດ-19 ທີ່ກຳລັງແຜ່ລະບາດຢ່າງໜັກໃນທົ່ວໂລກ ສະນັ້ນຈຶ່ງໄດ້ເລື່ອນໄປຈັດແຂ່ງຂັນເດືອນສິງຫາ 2020 ທີ່ປະເທດຟີລິບປິນຮັບກຽດເປັນເຈົ້າພາບ ສະ ຫະພັນບານເຕະແຫ່ງຊາດລາວ (ສຕລ) ຈຶ່ງໄດ້ແຕ່ງຕັ້ງໃຫ້ຂ້າພະເຈົ້າ ພ້ອມຄະນະຄູຝຶກ ຊ່ວຍກັນຈັດຕັ້ງປະຕິບັດການຄັດເລືອກນັກກິລາພອນສະຫວັນດີເດັ່ນຮ່ວມທີມຊຸດໃຫຍ່ໃຫ້ໄດ້ 20 ກວ່າຄົນ ໃນເບື້ອງຕົ້ນກໍສາມາດຮວບຮ່ວມນັກກິລາໄດ້ແລ້ວ 40 ກວ່າຄົນ ສ່ວນຫຼາຍແມ່ນເປັນນັກກິລາຊຸດຕິດທີມຊາດຢູ-19 ຊຸດສ້າງຜົນງານຄວ້າແຊັມລາຍ ການບັງກາມາຕາ ຢູ-19 ທີ່ປະເທດບັງກລາເທດ ເປັນເຈົ້າພາບ ເມື່ອປີ 2019 ເປັນກຳລັງຫຼັກຕິດທີມຊາດລາວຊຸດໃຫຍ່ ແຕ່ໜ້າເສຍດາຍຊຸດນີ້ຍັງບໍ່ມີ ນາງ ເປ້ ພົມພັກດີ ນັກເຕະຫົວໃຈສຳຄັນຮ່ວມທີມນຳ ເນື່ອງຈາກຜູ້ກ່ຽວໄດ້ຮັບອາການບາດ ເຈັບ ແລະ ກຳລັງພັກຟື້ນ ແຕ່ຈະພະຍາຍາມຕິດຕາມພົວພັນກັບຕົວນ້ອງອີກຄັ້ງ ຖ້າຫາກປົວເຊົາໄວກໍຈະຮຽກຕົວມາຊ່ວຍທີມ.
ຢ່າງໃດກໍຕາມທີມຊຸດນີ້ ໄດ້ຈັດແຜນການຝຶກຊ້ອມມາແຕ່ວັນທີ 3 ກຸມພາ 2020 ທີ່ສະໜາມກິລາສູນຝຶກແຫ່ງຊາດ ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ ໃນນັ້ນມີນັກກິລາມາຈາກ ແຂວງສະຫວັນນະເຂດ ແຂວງຫົວພັນ ແຂວງໄຊຍະບູລີ ແລະ ນະຄອນຫຼວງວຽງຈັນ ປັດຈຸບັນມີຄວາມພ້ອມ70% ແຕ່ຍ້ອນມີສະພາບການແຜ່ລະບາດຂອງເຊື້ອພະຍາດໂຄວິດ-19 ສະນັ້ນຄະນະ ສຕລ ຈຶ່ງໄດ້ສັ່ງໂຈະການຝຶກຊ້ອມອອກໄປຊົ່ວຄາວ ແລະ ວັນທີ 24 ມີນາ 2020 ໄດ້ສັ່ງໃຫ້ນັກກິລາກັບບ້ານໃຜລາວກ່ອນ ຈາກນັ້ນເດືອນພຶດສະພາ 2020 ກໍຈະຮຽກກັບຄືນມາຝຶກຊ້ອມຢ່າງເປັນປົກກະຕິ.
ທ່ານ ວົງມີໄຊ ສຸບົວຄຳ ກ່າວຕື່ມວ່າ: ໃນໄລຍະສັ່ງໂຈະການຝຶກ ຊ້ອມໄດ້ມີການເຕົ້າໂຮມຄະນະຄູຝຶກ ແລະ ນັກກິລາຮ່ວມກັນໃນນັ້ນກໍໄດ້ມີການຮຽກຮ້ອງ ແລະ ແນະນຳນັກກິລາແຕ່ລະຄົນ ຫຼັງຈາກກັບເຖິງບ້ານເກີດເມືອງນອນແລ້ວ ກໍຕ້ອງພ້ອມກັນເອົາໃຈໃສ່ຕໍ່ການຮັກສາສະມັດຖະພາບຂອງຕົນເອງ ໃຫ້ເປັນປົກກະຕິ ເວລາວ່າງກໍພາກັນແລ່ນອອກກຳລັງກາຍເພື່ອເອົາພະລະກຳລັງ ແລະ ຝຶກຊ້ອມດ້ວຍຕົນເອງ ສິ່ງສຳຄັນຕ້ອງປະຕິບັດຕາມແຈ້ງການທາງລັດຖະບານທີ່ເພີ່ນແຈ້ງເຕື່ອນ ແລະ ຕິດຕາມເຝົ້າລະວັງໃນການປ້ອງກັນເຊື້ອພະຍາດໂຄວິດ-19.
(ຂ່າວ:ວົງຈອນກິລາ)

ຂ່າວທີ່ໄດ້ຮັບຄວາມນິຍົມ